ޓްރަމްޕް އާއި ޒެލެންސްކީގެ ބައްދަލުވުން - ހޫނު ޒުވާބަކަށް

މުޅި ދުނިޔޭގެ ސަމާލުކަން ހުއްޓިފައި އޮތް އެމެރިކާގެ ރައީސް ޑޮނަލްޑް ޓްރަމްޕް އާއި ޔުކްރެއިންގެ ރައީސް ވުލޮޑިމިއަރ ޒެލެންސްކީ ގެ ބައްދަލު ވުން ފެނިގެން ދިޔައީ އެއް ފަރާތުން އަނެއް ފަރާތައް ހޫނު ބަސްތަކެއް ރައްދު ކޮށް ޒުވާބަކަށް ބަދަލުވެގެން ދިޔަ ބައްދަލުވުމަކަށެވެ.

ބައްދަލުވުމުގައި އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައިވަނީ ރަޝިއާގެ ރައީސް ވްލަޑިމިއަރ ޕުޓިންއާ ދެކޮޅަށް ހަރުކަށި ވުމަކީ ރަޝިއާ-ޔުކްރެއިން ހަނގުރާމަ އަށް ސުލްހަވެރި ހައްލެއް ހޯދުމަށް ހުރަސްއެޅިދާނެ ކަމެއް ކަމަށެވެ.

ރަޝިއާ-ޔުކްރެއިން ހަނގުރާމައިގައި ޑޮނަލްޑް ޓްރަމްޕް ރަޝިއާގެ ރައީސް ޕުޓިން ކޮޅަށް ބުރަވެވަޑައިގެންފައި ކަމުގެ ޝަކުވާ ޒެލެންސްކީ ކުރެއްވިއެވެ.

ވައިޓް ހައުސްގެ އޯވަލް އޮފީހުގައި ޔުކްރެއިންގެ ރައީސް ވޮލޮޑިމިރް ޒެލެންސްކީ އާއެކު ހުކުރު ދުވަހު ބޭއްވި ބައްދަލުވުމުގައި ޓްރަމްޕް ވިދާޅުވީ އެމަނިކުފާނުގެ އެއްވެސް ގޮތަކަށް ވަކިފަރާތަކަށް ޖެހުމެއް ނެތް ކަމަށެވެ. ޕުޓިން ކޮޅަށް ނުވަތަ ޒެލެންސްކީ ކޮޅަށް ވެސް ޖެހިވަޑައި ނުގަންނަވާ ކަމަށެވެ. އަދި އެމަނިކުފާނު މަސައްކަތް ކުރައްވަނީ މުޅި ދުނިޔޭގެ ސުލްހަ އާއި މަސްލަހަތަށްޓަކައި ކަމަށެވެ.

"ޒެލެންސްކީގެ ހިތުގައި ޕުޓިންއާ ދޭތެރޭ އޮތް ނަފްރަތު އެހެރީ ފެންނަން. އެފަދަ ރުޅިވެރިކަމެއް އޮއްވައި އެއްބަސްވުމަކަށް އާދެވޭނީ ވަރަށް އުނދަގުލުން،" ޓްރަމްޕް ޒެލެންސްކީ އަށް އަތްޕުޅުން އިޝާރާތް ކުރައްވާ ވިދާޅުވިއެވެ.

ޔޫރަޕާއި މުޅި ދުނިޔެއާއެކު ހަނގުރާމަ އަށް ސުލްހަވެރި ހައްލެއް ހޯދުމަށް މަސައްކަތްކުރައްވާ ކަމަށް ވިދާޅުވެ ޓްރަމްޕް، ވިދާޅުވީ "ހަރުކަށިވެވިދާނެ. އެކަމަކު އެގޮތަށް ދިޔައިމަ އެއްބަސްވުމަކަށް ދެވޭނެ ގޮތެއް ނޯންނާނެ،"

ހުކުރު ދުވަހުގެ މި ބައްދަލުވުމުގައި ދެ ބޭފުޅުންގެ ދެމެދުގައި ބަހުގެ ހޫނު ހަމަލާތަކެއް ބަދަލުކޮށް، އޯވަލް އޮފީހުގައި އަޑު ގަދަވެގެން ދިޔަކަން ރިޕޯޓަރުން ވަނީ ފާހަގަ ކޮށްފައެވެ.

މި ދަތުރުފުޅުގައި ޒެލެންސްކީ އުއްމީދު ކުރައްވަނީ ޔުކްރެއިންގެ ސަލާމަތައް އެމެރިކާ އިން ގެރެންޓީ ހޯއްދެވުމަށެވެ.

އޭގެ ބަދަލުގައި ޒެލެންސްކީ ހުންނެވީ ޔުކްރެއިންގެ މައުދަނުގެ ވަސީލަތްތަކަށް އެމެރިކާ އަށް ފުރުސަތު ލިބޭ އެއްބަސްވުމަކަށް ވަޑައިގަތުމަށް ތައްޔާރަށެވެ.

އެމެރިކާގެ ނައިބު ރައީސް ޖޭޑީ ވާންސް ވެސް ބައިވެރިވެވަޑައިގެންނެވި މި ބައްދަލުވުން ހޫނު ޒުވާބަކަށް ބަދަލުވެ އެއް ފަރާތުން އަނެއް ފަރާތައް ރައްދު ދެއްވަމުން ގެންދެވީ، އެމެރިކާ އިން ރަޝިއާ ކޮޅަށް ބުރަވުމާއި، ޒެލެންސްކީގެ ފަރާތުން އެމެރިކާ އަށް ޝުކުރުވެރި ނުވުމުގެ ވާހަކަތަކުގެ ތެރެއިންނެވެ.

"މަނިކުފާނު ތިޔަ ހުންނެވީ ރަނގަޅު ޕޮސިޝަން އެއް ގައެއް ނޫން މިހާރު؛" ޒެލެންސްކީ އާ ދިމާލަށް އަޑުފުޅު ގަަދަ ކުރައްވާ ޓްރަމްޕް ވިދާޅުވިއެވެ.

"މިހާރު ގެމްބްލް ކުރަމުން ތިޔަ ގެންދަވަނީ ދުނިޔޭގެ ތިންވަނަ ބޮޑު ހަނގުރާމައަށް" ޓްރަމްޕް އިތުރު ކުރެއްވިއެވެ.

ނައިބު ރައީސް ވާންސް ވިދާޅުވީ، އެމެރިކާ އާއި ޔުކްރެއިން އާ ދެމެދު ހުރި ޚިޔާލު ތަފާތުވުން ތަކުގެ ވާހަކަ ދައްކަވާ، އެމެރިކާ ސަރުކާރަށް އެމެރިކާގެ މީޑިއާގެ ކުރިމަތީގައި ޒެލެންސްކީ ހަމަލާ ދެއްކެވުމަކީ "އިހްތިރާމް ކުޑަކުރެއްވުން" ކަމަށެވެ.