އިއްޒުއްދީން ފާލަން ތަރައްގީކޮށް އަލުން ހުޅުވާފައިވަނީ ކުރީގެ ރައީސް އިބްރާހިމް މުހައްމަދު ސާލިހު ސަރުކާރުގައި ހަދާފައިވާ ކުރެހުމާއި އެއްގޮތަށްކަން ހާމަވެއްޖެއެވެ.

ކުރީގެ ހައުސިންގ މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ ރައީސް ޑރ.މުހައްމަދު މުއިއްޒު ކޮންމެ ވާހަކައެއް ދެއްކެވި ނަމަވެސް އެކަމެއްގެ ތެދުދޮގު ބަލަންޖެހޭ ކަމަށެވެ.

އެކްސްގައި އަކްރަމް ހިއްސާކުރެއްވި ޕޯސްޓުގައި ފާލަމަށް އިޝާރާތް ކުރައްވައި ވިދާޅުވީ އިއްޒުއްދީން ފާލަން މަރާމާތް ކުރުން ނުވަތަ އަލުން އެފާލަން ފަރުމާ ކުރުމުގެ މަޝްވަރާ އޭރުގެ އިންފްރާސްޓަރކްޗަރ އާއި ބެހޭ މިނިސްޓްރީން އެމްޓީސީސީއާއެކު 2021 ވަނަ އަހަރުގެ ފަހުކޮޅު ފެށުނު ކަމަށެވެ.

އެމްޓީސީސީގެ ޑިޒައިން ޓީމުން އެ ފާލަމުގެ ކުރެހުން ތައް ފަރުމާކޮށް، ޕްރޮޖެކްޓް ޕްރޮޕޯސަލް 2022 ގެ މެއި މަހުގައި މިނިސްޓްރީ އަށް ހުށަހެޅި ކަމަށާއި، 2022 ގެ ތެރޭގައި މިނިސްޓްރީ ގެ އެންޖީނިއަރުން ޓީމުން އެ ކުރެހުންތައް ބަލާ ދެ ފަރާތުން މަޝްވަރާތަށް ކުރިއަށް ގެންދިޔަ ކަމަށް އަކްރަމް ވިދާޅުވިއެވެ. ނަމަވެސް އެ އަހަރު ގެ ބަޖެޓްގެ ތާށި ކަމާ މިއަށް ވުރެއްބޮޑަށް ރައްޔިތުންނާ ގުޅޭ ތަރައްގީގެ މަސައްކަތް ހުރުމާއި އެކު މި ފާލަން ހެދުން އޭރު މަޑު ޖައްސާލީ ކަމަށް އޭނާ ވިދާޅުވިއެވެ.

މީގެ އިތުރުން އަކްރަމް ވިދާޅުވީ 2023 ވަނަ އަހަރުގެ މެދުތޭރޭ ގައި މި ފާލަމުގެ ހާލަތު ދަށަށް ގޮސް ފާލަން ވެއްޓި ދާނެ ކަމުގެ ބިރު އޮތުމާ އެކު އެމްޓީސީސީ އާއި މިނިސްޓްރީގެ ޓެކްނިކަލް ޓީމް އާއިއެކު މަޝްވަރާ ކުރެވި 2023 އޯގަސްޓް މަހު އެކުންފުންޏާ އެކު ޑިޒައިން އެންޑް ބިލްޑް ކޮންޓްރެކްޓް އެއްގައި ސޮއިކުރެވުނު ކަމަށެވެ.

ނަމަވެސް އެ ދުވަސް ވަރަކީ ރިޔާސީ އިންތިޚާބް ގެ ދުވަސްވަރު ކަމަށްވެފައި އަދި ބަޖެޓްގެވެސް ދަތިކަމާއެކު މަޑު ޖައްސާލާ އެ ކޮންޓްރެކްޓް ގެ ދަށުން އެ ފާލަން ނުވެއްޓޭވަރަށް މަރާތުކޮށް، ބެލެހެއްޓުމާއި، 2024 ގައި އިތުރަށް އެ ފާލާން ތަރައްގީ ކުރުމުގެ މަސައްކަތް ފެށުމަށް އެމްޓީސީސީއާއިއެކު އެއްބަސް ވެވުނު ކަމަށް އަކްރަމް ވިދާޅުވިއެވެ.

އަކްރަމް ވީދާޅުވީ ރައީސް މުއިއްޒު ގެ ނާގާބިލް ސަރުކާރުން މި ފާލަން ހެދުމުގެ މަސައްކަތް ކުރިއަށް ގެންދިޔުމަށް ނިންމާއި 2024 ގެ މޭމަހުގެ ތެރޭގައި ފާލަން ބަންދުކޮއް ބިއްގަޑު ޖަހާ ހެދި ކަމަށެވެ. އަދި މިހައި ފައިސާ ދަތި ދުވަސް ވަރެއްގައި މިފަދަ މަސައްކަތެއް ކުރާން ފެށުމުން އާންމުގެ ފާޑު ކިޔުންތައް ގިނަވުމުން މިހާރުގެ ހައުސިން އަދި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު އެކަމުން އެކިވަޑައިގަތުމަށް މަސައްކަތް ކޮށް، އެކްސްގައި ކުރެއްވި ޕޯސްޓުން ވެސް މި މަސައްކަތް ފަށާފައިވަނީ އެމްޑީޕީ ސަރުކާރުންކަން ހާމަވާ ކަމަށެވެ.

އިއްޒުއްދީން ފާލަން ތަރައްގީކޮށް އަލުން ހުޅުވާފައިވަނީ ކުރީގެ ރައީސް އިބްރާހިމް މުހައްމަދު ސާލިހު ސަރުކާރުގައި ހަދާފައިވާ ކުރެހުމާއި އެއްގޮތަށްކަން ހާމަވި ނަމަވެސް 27 ފެބުރުއަރީ 2025 ވީ ބުރާސްފަތި ދުވަހުގެ ރޭ މިފާލަން ރަސްމީކޮށް ހުޅުއްވައި ދެއްވައި ރައީސް މުއިއްޒު ވިދާޅުވީ ރަސްމީ ފާލަމަކީ، ގައުމިއްޔަތު ދިރުވައި އާލާކުރުމުގެ ފިކުރު ބިނާކުރުން ހިމެނޭ ގޮތަށް، މި ސަރުކާރުގެ ގައުމީ ތަރައްގީގެ ސިޔާސަތާ ގުޅިލާމެހޭ ގޮތަށް ފަރުމާކޮށްފައިވާ ފާލަމެއް ކަމަށެވެ. ފާލަން ފަރުމާކުރުމުގައި ދިވެހި ސަގާފަތާއި، ދިވެހީންގެ އަމިއްލަވަންތަކަން ދައްކުވައިދިނުމަށް ޚާއްސަ އިސްކަމެއް ދީފައިވާ ކަމަށް ރައީސް މުއިއްޒު ވިދާޅުވިއެވެ.

އިއްޒުއްދީން ފާލަން ފަރުމާކޮށްފައިވަނީ، ރާއްޖޭގެ ފުރަތަމަ ރައީސް މުހައްމަދު އަމީންގެ ވެރިކަމުގައި ބޭނުންކުރެއްވި ރަސްމީ ފާލަމާއި، ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި ބޭނުންކުރެއްވި ރަސްމީ ފާލަމުގެ ފަރުމާއަށް ބަލައިގެންނެވެ. އަދި އެންމެ ފަހުން ރަސްކަންކުރެއްވި މުހައްމަދު ފަރީދު ދީދީގެ ތޮފިކޮޅު ސިފަވާފަދަ ނިޝާނެއް ވެސް ފަރުމާގައި ހިމަނާފައިވެ އެވެ.

2015 ވަނަ އަހަރު ރާއްޖޭގެ މިނިވަންކަމަށް 50 އަހަރު ފުރުމާއި ދިމާކޮށް، އޭރުގެ ސަރުކާރުން ފާލަން ތަރައްގީ ކުރިއެވެ. އޭގެފަހުން ފާލަން ވަނީ ދެ ފަހަރެއްގެ މަތިން މަރާމާތު ކުރުމުގެ މަސައްކަތްތައް ކޮށްފައެވެ.