ފްލިކް ބުނީ ބާސެލޯނާ އޮތީ ރަނގަޅު ފޯމުގައި ކަމަށް

ބާސެލޯނާ މިވަގުތު އޮތީ ނަފްސާނީ ގޮތުން ވެސް ވަރަށް ފުރިހަމަ އަށް ކަމަށާއި، އެ ޓީމު އޮތީ އެންމެ ރަނގަޅު ފޯމުގައި ކަމަށް، ބާސެލޯނާ އަށް އިރުޝާދު ދެމުން އަންނަ ޖަރުމަނުގެ ހަންސީ ފްލިކް ބުނެފި އެވެ.

ފްލިކް މިހެން ބުނީ ކޮޕާ ޑެލް ރޭ ފުޓުބޯޅަ މުބާރާތުގެ ސެމީ ފައިނަލްގައި އެތުލެޓިކޯ މެޑްރިޑާ ދެކޮޅަށް ބާސެލޯނާ ނިކުންނަ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ.

ފްލިކް ބުނީ، ބާސެލޯނާ އިން ބޭނުން ވަނީ އެ ޓީމުގެ އަސްލު ފެންވަރު ދައްކައިދޭން ކަމަށާއި، ކޮންމެ މެޗެއްގައި ވެސް އެކަން ދައްކައިދޭން ބޭނުންވާ ކަމަށެވެ. ޚާއްސަކޮށް ޓީމުގައި ތިބި ހުރިހާ ކުޅުންތެރިންނާ އެކު، ބާސެލޯނާ އޮތީ ނަފްސާނީ ގޮތުން ވަރަށް ފުރިހަމަ އަށް ކަމަށާއި، އެ ޓީމު އޮތީ ރަނގަޅު ރޫޙެއްގައި ކަމަށް އޭނާ ބުންޏެވެ.

ސެމީ ފައިނަލް މެޗަށް ނިކުންނައިރު އޭނާ އަށް އޮތް އެންމެ ބޮޑު ހިތްހަމަ ޖެހުމަކީ، އެކަތި ގަނޑެއްގެ ގޮތުގައި ބާސެލޯނާ އޮތް އޮތުން ކަމަށް ފްލިކް ވަނީ ބުނެފަ އެވެ. އެއީ ހަމައެކަނި ކުޅުންތެރިން ނޫން ކަމަށާއި، މުޅި ޓީމު އޮތީ އެގޮތުގައި ކަމަށް އޭނާ ބުންޏެވެ. ޚާއްސަކޮށް ކޮންމެ ކުޅުންތެރިޔަކު ވެސް ހުރީ، އެ ކުޅުންތެރިޔެއްގެ ސަތޭކަ އިންސައްތަ މަސައްކަތް ދައްކައިގެން ޓީމު ބޭނުންވާ ހިސާބަށް ގެންދަން ކަމަށް ފްލިކް ފާހަގަކޮށްފައިވެ އެވެ.

ލީގުގައި މިދިޔަ ޑިސެމްބަރު މަހުގެ ތެރޭގައި އެތުލެޓިކޯއާ ދެކޮޅަށް ކުޅުނު މެޗުން ބާސެލޯނާ ބަލިވެފައިވާއިރު، އެކަމަަށް އިޝާރާތްކޮށް ފްލިކް ބުނީ އެ މެޗުން ވެސް ގިނަ ކަންތައްތަކެއް ދަސްވެފައިވާ ކަމަށެވެ. އެގޮތުން ބާސެލޯނާ އިން ރަނގަޅު ކުޅުމެއް ދެއްކި ނަމަވެސް، ފަހު ވަަގުތަށް ސަމާލުކަން ދޭން ޖެހޭ މިންވަރު ބޮޑު ކަމަށް އޭނާ ބުނެފައިވެ އެވެ.

ސެމީ ފައިނަލްގައި އެތުލެޓިކޯއާ ދެކޮޅަށް ނިކުންނައިރު، އެ މެޗުން މޮޅުވެ ދެ ވަނަ ލެގަށް އިތުބާރާ އެކު ނިކުމެވޭނެ ކަމުގެ ޔަގީންކަން އޮތް ކަމަށް ވެސް ފްލިކް ބުންޏެވެ. ޚާއްސަކޮށް ސެމީ ފައިނަލް މެޗަށް ބާސެލޯނާގެ ތައްޔާރީތަކާ މެދު ހިތްހަމަ ޖެހޭ ކަމަށާއި، ކުޅުންތެރިންގެ ޙާލަތާ މެދު ހިތްހަމަ ޖެހޭ ކަމަށް ވެސް ފްލިކް ބުންޏެވެ.

ކޮޕާ ޑެލް ރޭގެ ސެމީ ފައިނަލްގެ ފުރަތަމަ ލެގުގައި ބާސެލޯނާ އިން އެތުލެޓިކޯއާ ދެކޮޅަށް ނިކުންނާނީ އަންގާރަ ދުވަހުގެ ރޭ ދަންވަރު ރާއްޖެ ގަޑިން 01:30 ގައެވެ.