ސުޕްރީމް ކޯޓުގެ ފަނޑިޔާރުންގެ އަދަދު ބަދަލު ކުރާތީ ހުށަހެޅި ކުއްލި މައްސަލަ އަށް ފުރުސަތެއް ނުދިން
24 ފެބުރުއަރީ 2025 | ހޯމަ 07:43އެކޯޓަށް އައްޔަނު ކުރެވިފައިވާ، ޖުމްލަ 5 ފަނޑިޔާރުންގެ މައްޗަށް ކަމަށް އެ އިސްލާހުގައި ވަނީ ބުނެފަ
މަޖިލީހުގެ ރައީސް އަބްދުއްރަހީމާ އަބްދުﷲ މަޖިލީހުގެ ރިޔާސަތު ބަލަހައްޓަވަނީ
ސުޕްރީމް ކޯޓުގެ ފަނޑިޔާރުންގެ އަދަދު ބަދަލު ކުރަން މަޖިލިހަށް ކުއްލި ގޮތަކަށް ހުށަހަޅާފައިވާ އިސްލާހާއި ގުޅިގެން މަޖިލީހަށް ގަލޮޅު ދެކުނު ދާއިރާގެ އެމްޑީޕީ މެންބަރު މީކާއިލް ނަސީމް ހުށަހެޅާފައިވާ ކުއްލި މައްސަލަ ތަޅުމާއި ހަމަ އަށް ގެނައުމުގެ ފުރުސަތު ނުދީ ބޭރުކޮށްލައިފިއެވެ.
ގާނޫނު ނަންބަރު 2010/22 (ދިވެހި ރާއްޖޭގެ ކޯޓުތަކުގެ ގާނޫނު) ގައި ސުޕުރީމް ކޯޓުގެ ފަނޑިޔާރުންގެ އަދަދުގެ ބަޔަށް ބަދަލު ގެނައުމަށް ހުށަހެޅުއްވީ ސަރުކާރު ހިންގާ މައި ޕާޓީ ޕީއެންސީގެ ފަރާތުންނެވެ. ރައްޔިތުންގެ މަޖިލީހުގެ ހޮޅުދޫ ދާއިރާގެ މެމްބަރު އަބްދުއްސައްތާރު މުހައްމަދު މިފަދަ އިސްލާހެއް ހުށަހަޅުއްވާފައި ވަނީ 23 ފެބްރުއަރީ 2025 ވީ އާދިއްތަ ދުވަހުއެވެ.ދިވެހި ރާއްޖޭގެ ކޯޓުތަކުގެ ގާނޫނަށް 8 ވަނަ އިސްލާހު ގެނައުމުގެ ގާނޫނު ގައި ބުނެފައިވަނީ، ދިވެހިރާއްޖޭގެ ސުޕްރީމު ކޯޓު އެކުލެވިގެން ވަނީ އުއްތަމަ ފަނޑިޔާރާ އެކު އެކޯޓަށް އައްޔަނު ކުރެވިފައިވާ، ޖުމްލަ 5 ފަނޑިޔާރުންގެ މައްޗަށް ކަމަށް އެ އިސްލާހުގައި ވަނީ ބުނެފައެވެ.
މި އިސްލާހާއި ގުޅިގެން ގަލޮޅު ދެކުނު ދާއިރާގެ އެމްޑީޕީ މެންބަރު މީކާއިލް ނަސީމް ހުށައެޅުއްވި އެ ކުއްލި މައްސަލައިގައި ބުނެފައި ވަނީ އެ އިސްލާހަކީ މި ދަނޑިވަޅާއި ދިމާކޮށް ސުޕްރީމް ކޯޓުގެ ފަނޑިޔާރުންނަށް ނުފޫޒު ފޯރުވުމުގެ ގޮތުން ހުށަހަޅާފައިވާ އިސްލާހެއް ކަމަށެވެ. އަދި ޕާޓީ ބަދަލު ކުރުމުން ނުވަތަ ޕާޓީ އިން ވަކި ކުރުމުން މެމްބަރުކަން ގެއްލޭ ގޮޮތައް ގާނޫނު އަސާސީ އަށް ގެނައި ބަދަލު ބާތިލު ކުުރުމަށް އެދި ސުޕްރީމް ކޯޓަށް ހުށަހެޅި މައްސަލައިގެ އަޑުއެހުންތައް ހިނގަމުންދަނިކޮށް މިފަދަ އިސްލާހެއް ހުށަހެޅުމުން އެކަމާއި މެދު ކަންބޮޑުވުން އޮތް ކަމުގައެވެ.
މި މައްސަލަ ހުށަހެޅުމަށް ފުރުސަތު ނުދެއްވާނެކަން ހާމަކުރައްވާ މަޖިލީހުގެ ރައީސް އަބްދުއްރަހީމް އަބްދުﷲ ވަނީ މައްސަލަ ބޭރުކޮށްލައްވާފައެވެ. އޭނާ ވިދާޅުވީ މި މައްސަލަ ހުށަހަޅަން ފުރުސަތު ނުދެނީ މެމްބަރު މީކާއިލް ހުށަހެޅުއްވި ކުއްލި މައްސަލައިގައި މަޖިލީހުގެ ގަވާއިދުގައި ބަޔާން ކޮށްފައިވާ ޝަރުތުތައް ހަމަނުވާތީ ކަމަށެވެ. އެހެންކަމުން އެ މައްސަލަ ޖަލްސާއަށް ހުށަނޭޅޭނެ ކަމަށް އަބްދުއްރަހީމް ވަނީ ވިދާޅުވެފައެވެ. މަޖިލީހަށް ހުށަހަޅުއްވާފައިވާ ބިލެއްގައި ހިނގާނެ ބަހުސަކާ ގުޅޭ މައުޟޫއަކަށް އޮތް މައްސަލައަކާއި މެދު ކުއްލި މައްސަލަ އެއް ހުށަހެޅުމަށް ފުރުސަތު ނުލިބޭނެ ކަމަށް ވެސް އޭނާ ވަނީ ވިދާޅުވެފައެވެ.
ދިވެހި ރާއްޖޭގެ ކޯޓުތަކުގެ ގާނޫނަށް އިސްލާހު ގެނައުމަށް ހުށަހަޅާފައިވާ ބިލުގައި ބުނެފައިވަނީ ސުޕްރީމް ކޯޓުގެ ފަނޑިޔާރު ކަމުގެ މަގާމަށް އައްޔަން ކޮށްފައިވާ ފަނޑިޔާރަކު އޭނާގެ މަގާމުން ވަކި ކުރެވޭނީ ފަނޑިޔާރު ކަމުގެ މަގާމަށް އެމީހަކު ގާބިލު ނޫން ކަމަށް ޖުޑީޝަލް ސާވިސް ކޮމިޝަން (ޖޭއެސްސީ) އަށް ގަބޫލު ކުރެވިގެން އެ ފަނޑިޔާރަކު މަގާމުން ވަކި ކުރުމަށް ރައްޔިތުންގެ މަޖިލީހަށް ހުށަހަޅާ މަޖިލީހުގެ ޖަލްސާ އަށް ހާޒިރުވެ ވޯޓުގައި ބައިވެރިވި މެމްބަރުންގެ ތިންބައިކުޅަ ދެބައިގެ އަޣުލަބިއްޔަތުން ފާސްވުމުން ކަމަށެވެ.
އެ ގޮތުން ސުޕްރީމް ކޯޓުގެ ފަނޑިޔާރު ކަމުގެ މަގާމުން ވަކި ކުރުމަށް ޖޭއެސްސީ އިން ރައްޔިތުންގެ މަޖިލީހަށް ހުށަހަޅާ ފަނޑިޔާރުންގެ ނަންތައް މި ގާނޫނަށް އަމަލު ކުރަން ފަށާތާ ގިނަ ވެގެން 5 ދުވަހުގެ ތެރޭގައި ޖޭއެސްސީ އިން ރައްޔިތުންގެ މަޖިލީހަށް ހުށަހަޅަންވާނެ ކަމަށް ވެސް ވަނީ ބުނެފައެވެ.
އަދި ރައްޔިތުންގެ މަޖިލީހަށް އެ ފަނޑިޔާރުންގެ ނަންތައް ހުށަހަޅާތާ މަދުވެގެން 7 ދުވަހުގެ ތެރޭގައި ރައްޔިތުންގެ މަޖިލީހުން އެ ފަނޑިޔާރުން މަގާމުން ވަކިކުރުމާ މެދު ގޮތެއް ނިންމަންވާނެ ކަމަށް ވެސް ވަނީ ބުނެފައެވެ.
