ކަންބޮޑުވުންތައް އިތުރުވެފައި ވަނިކޮށް، ވަޒީރު ރާފިޢު ފުޓުބޯޅަ ކުލަބުތަކާ ބައްދަލު ކުރައްވައިފި

ރާއްޖޭގެ ފުޓުބޯޅަ ސީޒަން ނުފެށި ދިގު ލައިގެން ދިޔުމުގެ ސަބަބުން ކަންބޮޑުވުންތައް އިތުރުވެފައި ވަނިކޮށް، ކުޅިވަރު ވަޒީރު ޢަބްދުﷲ ރާފިޢު ފުޓުބޯޅަ ކުލަބުތަކާ ބައްދަލުކުރައްވައިފި އެވެ.

ބުރާސްފަތި ދުވަހުގެ ރޭ ކުޅިވަރު ވުޒާރާގައި އޮތް ބައްދަލުވުމުގައި ކޮންމެ ކުލަބެއްގެ ފަރާތުން ވެސް އެކަކު ވަނީ ބައިވެރިވެފައެވެ.

އެ ބައްދަލުވުމުގައި ވަޒީރު ވަނީ މިއަހަރުގެ ފުޓުބޯޅަ ސީޒަން ކުރިއަށް ގެންދިޔުމާ ގުޅޭ ގޮތުން ކުލަބުތަކާ މަޝްވަރާ ކުރައްވައިފައެވެ. އަދި މިވަގުތު ކުލަބުތަކަށް ދިމާވަމުން އަންނަ ދަތިތަކާއި، އެ ދަތިތައް ޙައްލު ކުރުމަށް ކުރެވޭނެ ކަންކަމާ ގުޅޭ ގޮތުން ވެސް މަޝްވަރާ ކޮށްފައި ވެއެވެ.

ވަޒީރުގެ އެ ބައްދަލުވުމުގައި ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ނޯމަލައިޒިންގ ކޮމެޓީގެ ޗެއާރމަން އަޙުމަދު މުޢިއްޒު އާއި އެ ކޮމެޓީގެ މެމްބަރުންގެ އިތުރުން، އެފްއޭއެމްގެ ކޮމްޕެޓިޝަން ޑިޕާޓްމަންޓުގެ ބޭފުޅުން ވެސް ވަނީ ބައިވެރިވެފައެވެ.

ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ރާއްޖެ ނޯމަލައިޒް ކޮށްފައިވާއިރު، ނޯމަލައިޒިންގ ކޮމެޓީން އަންނަނީ ހުއްޓިފައިވާ ފުޓުބޯޅަ ސީޒަން އަލުން ފެށުމުގެ ގޮތުން ގިނަ މަސައްކަތްތަކެއް ކުރަމުންނެވެ. އެގޮތުން ކުލަބުތަކަށް މާލީ ގޮތުން އެހީތެރިކަން ދިނުމާއި، ދެން ވެސް ކުރި ކަންކަމާ ގުޅޭ ގޮތުން މަސައްކަތް ދަނީ ކުރަމުންނެވެ.

ގިނަ ކުލަބުތަކުގެ މިވަގުތު އޮތް އެންމެ ބޮޑު ގޮންޖެހުމަކީ މާލީ ގޮތުން ހުރި ދަތިތައް ކަމަށްވާއިރު، ސަރުކާރުން ވަނީ ކުލަބުތަކަށް މާލީ އެހީތެރިކަން ދޭން ނިންމައި، އެ ފައިސާގެ ބައެއް ދީފަ އެވެ.

އެގޮތުން ކޮންމެ ކުލަބަކަށް 1.5 މިލިއަން ރުފިޔާ ދިނުމަށް ސަރުކާރުން ވަނީ ނިންމައިފަ އެވެ. އަދި އޭގެ ތެރެެެއިން ފުރަތަމަ ޕޭމަންޓުގެ ގޮތުގައި 500،000 (ފަސް ލައްކަ) ރުދިޔާ މިދިޔަ ހަފުތާގެ ތެރޭގައި ވަނީ ޖަމާކޮށްދީފަ އެވެ.

ފުޓުބޯޅަ ސީޒަން އަލުން ފަށައި ގަތުމަށް ކުރަމުން އަންނަ މަސައްކަތުގަައި ކުލަބުތަކަށް ސަރުކާރުގެ އިތުރުން، ފީފާ އިން ވެސް މާލީ އެހީތެރިކަން ދިނުމަށް ނިންމާފައިވާ ކަމަށް މީގެ ކުރިން ނޯމަލައިިޒިންގ ކޮމެޓީން ވަނީ ބުނެފަ އެވެ.

އެގޮތުން ކޮންމެ ކުލަބަކަށް ފީފާ މެދުވެރިކޮށް އެއް މިލިއަން ރުފިޔާގެ މާލީ އެހީތެރިކަން ހަމަޖެއްސުމަށް މަސައްކަތް ކުރަމުން އަންނަ ކަމަށް އޭރު ނޯމަލައިިޒިންގ ކޮމެޓީން ވަނީ ބުނެފަ އެވެ.