ނައިބު ރައީސް އާއެކު ވަޒީރުންނާއި، މެމްބަރުން "ސްޓޭ އެޓް ހޯމް ޗެލެންޖު" ގައި ބައިވެރިވެއްޖެ
28 މާރިޗު 2020 | ހޮނިހިރު 19:36ނައިބު ރައީސް މި ޗެލެންޖުގައި ބައިވެރިވެވަޑައިގަތުމަށް ޗެލެންޖު ކުރައްވައިފައިވަނީ ޚާރިޖީ ވަޒީރު އަބްދުﷲ ޝާހިދު
ސްޓޭ އެޓް ހޯމް ޗެލެންޖުގައި ނައިބު ރައީސާއެކު ވަޒީރުން ބައިވެރިވުން
ސޯޝަލް މީޑިއާގައި މިހާރު އެންމެ ފޯރިއާއއެކު އެންމެން ބައިވެރިވަމުން އަންނަ ޗެލެންޖަކީ ސްޓޭ އެޓް ހޯމް ޗެލެންޖެވެ. މި ޗެލެންޖުގައި ނައިބު ރައީސް އާއެކު ވަޒީރުންނާއި މަޖިލީސް މެމްބަރުންވެސް ވަނީ ބައިވެރިވެފައެވެ.
ނައިބު ރައީސް މި ޗެލެންޖުގައި ބައިވެރިވެވަޑައިގަތުމަށް ޗެލެންޖު ކުރައްވައިފައިވަނީ ޚާރިޖީ ވަޒީރު އަބްދުﷲ ޝާހިދެވެ. އަދި ޚާރިޖީ ވަޒީރު އަބްދުﷲ ޝާހިދު މި ޗެލެންޖުގައި ބައިވެރިވެވަޑައިގަތުމަށް ޗެލެންޖު ކުރައްވައިފައިވަނީ އެފްއޭއެމްގެ ކުރީގެ ރައީސް އަދި މަޖިލީސް މެމްބަރު އަލީ އާޒިމް އެވެ. ނައިބު ރައީސް ވަނީ މި ޗެލެންޖުގައި ބައިވެރިވެވަޑައިގަތުމަށް ރައްޔިތުންގެ މަޖިލީހުގެ ގަމު ދާއިރާގެ މެމްބަރު މުހައްމަދު ވިސާމަށް ޗެލެންޖު ކުރައްވާފައެވެ. ނައިބު ރައީސްގެ ޗެލެންޖު ގަބޫލުކުރައްވާ ވިސާމް ވެސް ވަނީ މި ޗެލެންޖުގައި ބައިވެރިވެވަޑައިގަންނަވާފައެވެ.
ނައިބު ރައީސް އާއެކު ވަޒީރުން އަދި މަޖިލީސް މެމްބަރުން މި ޗެލެންޖުގައި ހޮނިހިރު ދުވަހު ބައިވެރިވެވަޑައިގަންނަވާފައިވާއިރު މި ޗެލެންޖުގައި ކުޅިވަރާ ބެހޭ ވަޒީރު އަހުމަދު މަހުލޫފާއިި ފަތުރުވެރިކަމާ ބެހޭ ވަޒީރު އަލީ ވަހީދު ވެސް ވަނީ މީގެ ކުރިން ބައިވެރިވެވަޑައިގަންނަވާފައެވެ. މީގެ އިތުރުން ރާއްޖޭގެ ގައުމީ ފުޓްބޯޅަ ޓީމުގެ ބައެއް ކުޅުންތެރިންނާއި އާންމުން އަންނަނީ މި ޗެލެންޖުގައި ބައިވެރިވަމުންނެވެ.
ސްޓޭ އެޓް ހޯމް ޗެލެންޖަކީ ހަލުވި ކަމާއިއެކު ކޮރޯނާވައޮރަސް (ކޮވިޑް-19) ދުނިޔޭގެ އެކި ކަންކޮޅުތަކުގައި ފެތުރެމުން އަންނާތީ ގޭގައި ގިނަވަގުތު ހޭދަކުރުމަށް ބާރު އަޅާ ފަށައިފައިވާ ޗެލެންޖެކެވެ.
ސްޓޭ އެޓް ހޯމް ޗެލެންޖުގައި ދުނިޔޭގެ މަޝްހޫރު ގިނަ ފަރާތްތަކަކުން އަންނަނީ ބައިވެރިވަމުންނެވެ. އޭގެ ތެރޭގައި މަޝްހޫރު ކުޅުންތެރިންނާއި، މިއުޒިކީ ފަންނާނުން އަދި ގައުމުތަކުގެ އިސްވެރިންވެސް އަންނަނީ ބައިވެރިވަމުންނެވެ. މި ޗެލެންޖުގައި ބައިވެރިވެފައިވާ މަޝްހޫރު ކުޅުންތެރިންގެ ތެރޭގައި ކްރިސްޓިއާނޯ ރޮނާލްޑޯ، ލިއޮނެލް މެސީ އަދި މާކަސް ރަޝްފޯޑް ވެސް ހިމެނެއެވެ.
