ކުޅިވަރު ކުރިއެރުވުމަށް ރާއްޖެ އާއި ޗައިނާއާ ދެމެދު އެއްބަސްވުމެއްގައި ސޮއި ކޮށްފި

ދިވެހި ރާއްޖޭގެ ކުޅިވަރު ކުރިއެރުވުމުގެ ގޮތުން، ރާއްޖެ އާއި ޗައިނާއާ ދެމެދު އެއްބަސްވުމެއްގައި ސޮއި ކޮށްފި އެވެ.

ހުޅުލޭ އައިލެންޑު ހޮޓެލްގައި ބޭއްވި ޚާއްސަ ރަސްމިއްޔާތެއްގައި ދިވެހި ރާއްޖޭގެ ފަރާތުން އެ އެއްބަސްވުމުގައި ސޮއި ކުރެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އެވެ. މި އެއްބަސްވުމުގައި ޗައިނާގެ ފަރާތުން ސޮއި ކުރެއްވީ ފުޖިއާން ޕްރޮވިންސްގެ ކުޅިވަރު ބިއުރޯގެ ޑިރެކްޓަރ ޖެނެރަލް ޑޮން ޖިން ސޮން އެވެ.

ރާއްޖެ އާއި ޗައިނާއާ ދެމެދު ސޮއި ކުރެވުނު އެއްބަސްވުމުގެ ދަށުން ރާއްޖޭގެ ކުޅިވަރުގެ ދާއިރާ ކުރިއެރުވުމަށް ދެ ޤައުމު ގުޅިގެން މަސައްކަތްތަކެއް ކުރާނެ އެވެ. އެގޮތުން ރާއްޖޭގެ އެތުލީޓުންނަށް ބޭނުންވާ އެކި އެކި ތަމްރީނު ޕްރޮގްރާމްތައް ހިންގުމުގެ އިތުރުން، އެތުލީޓުން ކުރިއެރުވުމަށް މަސައްކަތް ކުރެވޭނެ އެވެ.

މީގެ އިތުރުން ރާއްޖޭގެ ކުޅިވަރު ކުލަބުތައް ކުރިއެރުވުމާއި، އެ ކުލަބުތަކަށް އެކި ކަހަލަ ފުރުސަތުތައް ހޯދައި ދެވިގެން ވެސް ދާނެ އެވެ. ހަމައެހެންމެ، ކުޅިވަރުގެ ދާއިރާ އިން ކޯޗުންނާއި ރެފްރީންގެ އިތުރުން، ޞިއްޙީ އޮފިޝަލުން ވެސް ބިނާ ކުރުމުގެ މަސައްކަތް މި އެއްބަސްވުމުގެ ދަށުން ކުރިއަށް ގެންދާނެ އެވެ.

އެއްބަސްވުމުގައި ސޮއި ކުރެއްވުމަށްފަހު ވާހަކަ ދައްކަވަމުން ވަޒީރު ރާފިޢު ވިދާޅުވެފައި ވަނީ، ޗައިނާ އާއެކު ސޮއި ކުރެވުނު އެއްބަސްވުމުގެ ދަށުން ކުޅިވަރު ކުރިއެރުވުމަށް ކުރަމުން އަންނަ މަސައްކަތަށް އިތުރު ދައުރެއް ލިބިގެން ދާނެ ކަމަށެވެ.

ޚާއްސަކޮށް ބައިނަލްއަޤުވާމީ ކުޅިވަރުގެ މައިދާނުގައި ރާއްޖެ އިން ޙާސިލު ކުރަން ބޭނުންވާ ލަނޑުދަނޑިތަކާއި، ވާސިލްވާން ބޭނުންވާ ހިސާބަށް ދިޔުމަށް މަގު ފަހިވެގެން ދާނެ ކަމަށް ވެސް ވަޒީރު ވަނީ ވިދާޅުވެފަ އެވެ.

ވަޒީރު ވިދާޅުވީ މިފަދަ އެއްބަސްވުމެއްގެ ދަށުން ރާއްޖޭގެ ކުޅިވަރު ތަރައްޤީކޮށް، އެތުލީޓުން ކުރިއެރުވުމުގެ މަޤުސަދަކީ 2040 ވަނަ އަހަރު އެތުލީޓުންނަށް އެންމެ މަތީ ވަނަތައް ހޯދޭނެ ފެންވަރަށް ގެންދިޔުން ކަމަށެވެ.