އޭޝިއަން ޝޫޓިން ކަޕް 2025 ގައި ވާދަކޮށް، ރިހި މެޑަލް ހޯދި ރާއްޖޭގެ ޤައުމީ ޝޫޓިން ޓީމުގައި ހިމެނޭ މަރިޔަމް އީޝަލް މިސްބާޙު އަދި ޓީމަށް ހޫނު މަރުޙަބާއެއް ކިޔައިފި އެވެ.

ތައިލެންޑުގެ ވެރި ރަށް ބެންކޮކުގައި ކުރިއަށް ދިޔަ މުބާރާތުގައި ވާދަކޮށް، އީޝަލް ރިހި މެޑަލް ހޯދީ އެއާ ފިސްޓަލް އަންހެން ޖޫނިއާ ކެޓަގަރީންނެވެ. އުމުރުން 15 އަހަރުގެ އީޝަލް ރިހި މެޑަލް ހޯދީ މުބާރާތުގައި ބައިވެރިވި 23 ޤައުމުގެ ތެރެއިން 21 ޤައުމާ ވާދަކޮށެވެ.

މި އިވެންޓުގެ އެއް ވަނަ ހޯދީ ޓައިވާންގެ ލިއާއޯ ކީ ރޮން އެވެ. އޭނާ އެއް ވަަނަ ހޯދާފައި ވަނީ 231.2 ގެ ސްކޯއަކުންނެވެ. ދެ ވަނަ ރާއްޖޭގެ އީޝަލް ހޯދީ 229.9 ގެ ސްކޯއަކުންނެވެ. އަދި ތިން ވަނަ އަށް ދިޔަ ނޯތު ކޮރެއާގެ ކިމް ހިއޯން ސުކް ވަނީ 211.8 ގެ ސްކޯއެއް ހޯދައިފަ އެވެ.

މުބާރާތަށްފަހު ހޯމަ ދުވަހު އީޝަލް އަދި ރާއްޖޭގެ ޓީމު ރާއްޖެ އައިސްފައިވާއިރު، ވެލާނާ އިންޓަރނޭޝަނަލް އެއާޕޯޓުން މަރުޙަބާ ކިޔާފައި ވަނީ ކޮމިޝަނަރ އޮފް ސްޕޯޓްސް މުޙައްމަދު ޠަލާލް އެވެ. މީގެ އިތުރުން ކުޅިވަރުގެ ވުޒާރާގެ ސްޓޭޓް މިނިސްޓަރާއި، މޯލްޑިވްސް އޮލިމްޕިކް ކޮމެޓީ (އެމްއޯސީ)ގެ އިސްވެރިން ވެސް ވަނީ ބައިވެރިވެފަ އެވެ.

ޓީމަށް މަރުޙަބާ ކިޔުމަށް ފަހު ކޮމިޝަނަަރު ޠަލާލް ވަނީ ޓީމާ ބައްދަލުކޮށް، އީޝަލް ހޯދީ ކާމިޔާބަށް މަރުޙަބާ ކިޔައި، ހިތްވަރު ދެއްވައިފަ އެވެ.

އޭޝިއަން ޝޫޓިން ކަޕްގައި ވާދަކޮށް ރާއްޖޭގެ އީޝަލް ހޯދި ރިހި މެޑަލް އަކީ ރާއްޖެ އަށް ތާރީޚީ ކާމިޔާބެކެވެ. އަދި މިއީ އޭޝިއާ ބައްރުގެ މުބާރާތެއްގައި ވާދަކޮށް ރާއްޖެ އަށް ލިބުނު ފުރަތަމަ މެޑަލް އެވެ.