ޕްރެޒިޑެންޓްސް ފުޓްސަލް ކަޕް ރެކްރިއޭޝަނަލްގައި ބައިވެރިވުމުގެ ފުރުސަތު ހުޅުވާލައިފި

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމް ކޮށްގެން ބާއްވާ ޕްރެޒިޑެންޓްސް ފުޓްސަލް ކަޕް ރެކްރިއޭޝަނަލްގައި ބައިވެރިވުމުގެ ފުރުސަތު ހުޅުވާލައިފިއެވެ.

އަންނަ އޮކްޓޯބަރު މަހުގެ އެއްވަނަ ދުވަހު ފަށާ މި މުބާރާތަކީ ސަރުކާރު އޮފީސް އަދި ކުންފުނިތަކަށް ހާއްސަކޮށްގެން ކުރިއަށްގެންދާ މުބާރާތެއް ކަމަށް އެފްއޭއެމް އިން ބުނެއެވެ.

އެފްއޭއެމުން ނެރުނު ބަޔާނެއްގައި ބުނީ، މުބާރާތުގައި ބައިވެރިވާން އެދޭ ސަރުކާރު އޮފީސް އަދި ކުންފުނިތަކުން އަންނަ މަހުގެ 14 ވަނަ ދުވަހުގެ މެންދުރު ފަހު 2:30 ގެ ނިޔަލަށް ފޯމް ހުށަހެޅުމަށް އެދޭ ކަމަށެވެ.

އަންހެން އަދި ފިރިހެން ޑިވިޝަން ހިމެނޭގޮތަށް ބާއްވާ މި މުބާރާތުގައި ބައިވެރިވުމަށް އެދޭ ފޯމާއި ކުޅުންތެރިންނާއި އޮފިޝަލުން ރަޖިސްޓަރީ ކުރާ ފޯމް އަދި މުބާރާތުގެ ގަވާއިދު އެފްއޭއެމްގެ އިދާރާއިން ރަސްމީ ދުވަސް ދުވަހުގެ ރަސްމީ ގަޑީގައި (ހެނދުނު 9:00އިން ހަވީރު 4:00އަށް) ލިބެން ހުންނާނެ ކަމަށް އެފްއޭއެމް އިން ބުނެއެވެ.