މި ސަރުކާރުގައި ކޮރަޕްޝަން އިންތިހާއަށް ބޮޑު، މަޖިލިސް މެންބަރެއް މެދުވެރިކޮށް މެނުވީ އައިޖީއެމްއެޗުން ރަނގަޅު ޚިދުމަތެއް ވެސް ނުލިބޭ: މެންބަރު މީކާއިލް

މި ސަރުކާރުގައި ކޮރަޕްޝަނާއި ފަސާދަ އިންތިހާއަށް ބޮޑު ކަމަށާއި، ރައްޔިތުން މަޖިލިސް މެންބަރެއް މެދުވެރިކޮށް މެނުވީ އައިޖީއެމްއެޗުން ރަނގަޅު ޚިދުމަތެއް ވެސް ނުލިބޭ ކަމަށް ގަލޮޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި މެންބަރު މީކާއިލް ވިދާޅުވީ މިސަރުކާރުން ރަސްމީކޮށް ދަރުމަވަންތަ ހޮސްޕިޓަލް ހުޅުވައި، ޚިދުމަތް ފުޅާކޮށްފައިވާކަން އިއުލާން ކޮށްފައިވާ ކަމަށެވެ.

ނަމަވެސް މިހާރު ދަރުމަވަންތަ ހޮސްޕިޓަލް ހިމެނޭ ގޮތަށް އައިޖީއެމްއެޗުން ވެސް ރަނގަޅު ޚިދުމަތެއް ނުލިބޭ ކަމަށާއި، ކޮޓަރިއެއް ވެސް ނުލިބޭ ކަމަށެވެ. އަދި ރަނގަޅު ޚިދުމަތެއް ލިބެނީ އެމަސައްކަތް ކުރުމަށް ރައްޔިތުން މަޖިލިސް މެމްބަރެއް މެދުވެރިވެގެން ކަމަށް އޭނާ ވިދާޅުވިއެވެ.

ދަރުމަވަންތަ ހޮސްޕިޓަލް އެބޭފުޅުން ރަސްމީކޮށް ހުޅުއްވައިދެއްވިފަހުން އަޅުގަނޑު ހަމަ ހިތަށް އަރާ މިހާރު އައިޖީއެމްއެޗަށް ޚިދުމަތް ހޯދުމަށްދާ ކޮން ދިވެހި ރައްޔިތަކަށް ބާއޭ އިތުރު ލުޔެއް ލިބުނީ. އިތުރު ފަސޭހަކަމާއެކު މިސާލަކަށް ކޮޓަރިއެއް ހަމަޖެހިގެން ދަނީ ކާކަށްތޯއޭ. ރައްޔިތުން މަޖިލީހުގެ މެމްބަރަކަށް ނުގުޅާ މިހާރު އައިޖީއެމްއެޗްގެ ކޮޓަރިއެއް ހޯދުން ލާހިކެއް ނޫން އެނގޭތޯ. މީގެ ކުރިން ކަންކަން ބައްޓަން ކޮށްފައި އޮންނަ ގޮތަކީ ކިއު ސިސްޓަމެއް އޮވޭ. އަޅުގަނޑުމެންނަށް ވަރަށް ސާފުކޮށް ކިޔުގެ ކޮން ހިސާބެއްގައި އެމީހާ ހުރީ އެނގޭ.އެހެންނަމަވެސް މިހުރިހާ ކަމެއް ވަންހަނާ ކުރި ކުރީނުން ގޮސް ރައްޔިތުން މަޖިލީހުގެ މެމްބަރެއް މެދުވެރިކޮށް މެނުވީ އައިޖީއެމްއެޗްގެ ކޮޓަރިއެއް ވެސް ހޯދޭ ކަމަކަށް ނުވޭ އަދި ޚިދުމަތެއް ވެސް ފަސޭހައިން ލިބޭ ކަމަކަށް ނުވޭ.

ގަލޮޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް

މިސަރުކާރުގެ ކޮރަޕްޝަނާއި ފަސާދައަށް އިޝާރާތް ކުރައްވައި މެންބަރު މީކާއިލް ވިދާޅުވީ އައިޖީއެމްއެޗުގައި އެޑްމިޓް ކޮށްގެން ފަރުވާ ހޯދާ ޕޭޝަންޓުންނަށް ދޭ ބޭސް މިފަހުން ހުސްވި ކަމަށާއި، އެ މައުލޫމާތުތައް ހާމަ ކުރުމަށް ސިއްހީ ޚިދުމަތްތެރިންނަށް ސަރުކާރުން މަނާ ކުރި ކަމަށެވެ. އަދި ދިމާވާ ދަތިތަކާއި އުދަނގޫތަކުގެ ވާހަކަތައް ވެސް ދެއްކުން މަނާ ކޮށްފައިވާ ކަމަށް މެންބަރު މީކާއިލް ވިދާޅުވިއެވެ.

މީގެ އިތުރުން މެމްބަރު މީކާއިލް ވިދާޅުވީ ސިއްހީ ދާއިރާއަކީ ހުރިހާ ދާއިރާތަކާ އަޅާބަލާއިރު، ތަފާތު ދާއިރާއެއް ކަމަށާއި، އެންމެ ރަނގަޅު ޚިދުމަތެއް ފޯރުކޮށްދީ، އެންމެ ރަނގަޅަށް ކަންކަން އިންތިޒާމުތައް ހަމަޖައްސަންޖެހޭ ދާއިރާ ކަމަށެވެ. ނަމަވެސް މިސަރުކާރުން މިދާއިރާ ހަލާކު ކުރަމުންދާ ކަމަށް މެމްބަރު މީކާއިލް ވިދާޅުވިއެވެ.