ބްރައިޓަން އަތުން ޗެލްސީ އަށް ލަދުވެތި ބައްޔެއް

އިނގިރޭސި ޕްރިމިއާ ލީގުގައި ބްރައިޓަންއާ ދެކޮޅަށް ކުޅުނު މެޗުން ޗެލްސީ އަށް ލަދުވެތި ބައްޔަކާ ކުރިމަތިލާން ޖެހިއްޖެ އެވެ.

ބްރައިޓަންގެ އަމިއްލަ ދަނޑުގައި ހުކުރު ދުވަހުގެ ރޭ ކުޅުނު މެޗުގައި އެ ޓީމުން ވަނީ 3-0 އިން ޗެލްސީ ބަލިކޮށްފަ އެވެ. މެޗުގެ ފުރަތަމަ ހާފުގައި ބްރައިޓަން އިން ދެ ލަނޑު ޖެހިއިރު، ދެ ވަނަ ހާފުގައި ވަނީ ތިން ވަނަ ލަނޑު ވެސް ޖަހައިފަ އެވެ.

މެޗުގެ ފުރަތަމަ ހާފުގެ 27 ވަނަ މިނެޓުގައި ބްރައިޓަން އަށް ލީޑު ނަގައިދިނީ ކޯރޯ މިޓޮމާ އެވެ. އޭގެ ފަހުން ފުރަތަމަ ހާފުގެ 38 ވަނަ މިނެޓުގައި ބްރައިޓަންގެ ދެ ވަނަ ލަނޑު ޖަަހައި، ލީޑު ފުޅާ ކޮށްދިނީ ޔަންކުބާ މިންޓޭ އެވެ. އެއީ ޑެނީ ވެލްބެކް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުގައި ލަނޑު ޖެހުމަށް ޗެލްސީން މަސައްކަތް ކުރަމުން ދަނިކޮށް، ދެ ވަނަ ހާފުގައި ބްރައިޓަން އިން ވަނީ ތިން ވަނަ ލަނޑެއް ވެސް ޖަހައިފަ އެވެ. މެޗުގެ 63 ވަނަ މިނެޓުގައި ވެކްބެކް ތަނަވަސްކޮށްދިން ފުރުސަތެއްގައި އެ ލަނޑު ވެސް ޖެހީ މިންޓޭ އެވެ.

މިއީ ޖެހިޖެހިގެން ބްރައިޓަން އަތުން ޗެލްސީ ބަލިވި ދެ ވަނަ މެޗެވެ. އޭގެ ކުރިން އިނގިރޭސި އެފްއޭ ކަޕްގެ ހަތަރު ވަނަ ބުރުގައި ބްރައިޓަންއާ ދެކޮޅަށް ކުޅުނު މެޗުން ވެސް ޗެލްސީ ވަނީ ބަލިވެފަ އެވެ.

ބްރައިޓަން އަތުން ލީގުގައި ވީ ބައްޔަކީ، މި ސީޒަންގެ ލީގުގައި ޗެލްސީގެ ހަ ވަނަ ބައްޔެވެ. މިހާތަނަށް ކުޅެފައިވާ 25 މެޗުން 43 ޕޮއިންޓާ އެކު ޗެލްސީ އޮތީ ހަތަރު ވަނައިގަ އެވެ.