މިހާރު ހިންގަމުންދާ މާރާމާރީ ތަކުގައި ތުހުމަތުކުރެވޭ މީހަކު އެއަރޕޯޓުން ހައްޔަރުކޮށްފި

މިހާރު ހިންގަމުންދާ މާރާމާރީތަކުގެ ތުހުމަތުކުރެވޭ އަދި ނުރައްކާތެރި ކުށްތަކަށް އަރައިގަތުމުގައި ބައިވެރިވާ ކަމަށް ތުހުމަތުކުރެވޭ މީހަކު ވެލާނާ އިންޓަނޭޝަނަލް އެއަރޕޯޓުން ހައްޔަރުކޮށްފިއެވެ.

ބުރާސްފަތި ދުވަހު ފުލުހުން ބުނީ މިހާރު ހިންގަމުންދާ މާރާމާރީތަކުގެ ތުހުމަތުކުރެވޭ އަދި ނުރައްކާތެރި ކުށްތަކަށް އަރައިގަތުމުގައި ބައިވެރިވާ ކަމަށް ތުހުމަތުކުރެވޭ މީހަކު އެއަރޕޯޓުން ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ.

މިމައްސަލައާ ގުޅިގެން ފުލުހުންގެ ބެލުމުގެ ދަށަށް ގެނެސްފައިވަނީ ޏ.ފުވައްމުލައް، ދިގުވާނޑު، ބަނަފްސާގެ، 31 އަހަރުގެ ހުސެއިން އަރީޝް އެވެ.

މީގެ އިތުރުން ފުލުހުން ބުނީ އޭނާ ފުލުހުންގެ ބެލުމުގެ ދަށަށް ގެނެސްފައިވަނީ ހައްޔަރު ކުރުމަށް ކޯޓު އަމުރެއް ނަގާފައިވަނިކޮށް މެލޭޝިޔާއަށް ފުރައިގެން ދިއުމުން މެލޭޝިޔާއަށް ވަނުން ހުއްޓުވައި އެހެން ފްލައިޓެއްގައި ރާއްޖެ ގެނައުމަށްފަހު ކަމަށެވެ.

އޭނާއަކީ ކުށުގެ ރިކޯޑު އޮންނަ މީހެކެވެ. އެގޮތުން މަސްތުވާތަކެތީގެ މައްސަލައާއި، ތޫނު ހަތިޔާރު ގެންގުޅެ، މީހުންނަށް ހަމާލީ މާރާމާރީ ހިންގާކަމުގެ ކުށުގެ ރިކޯޑު އޮވެއެވެ.

މިމައްސަލަ ފުލުހުން އިތުރަށް ތަހުގީގު ކުރަމުން ގެންދާއިރު، ގޭންގުތަކުގެ މާރާމާރީގެ މައްސަލަތައް މާލެސިޓީގައި ވަނީ އިތުވެގެން ގޮސްފައެވެ. މި މާރާމާރީތަކުގައި 18 އަހަރުނުވާ ކުޑަ ކުދިން ވެސް ބައިވެރިވަމުންދާކަން ފާހަގަކުރެވެއެވެ.