ކޮރަޕްޝަންގެ ގިނަ މައްސަލަތައް ދަނީ ފެންމަތިވަމުން، މިފަދަ މައްސަލަތައް ހުއްޓުވަން މަސައްކަތެއް ނުކުރޭ: މެންބަރު އަހުމަދު ދީދީ
13 ފެބުރުއަރީ 2025 | ބުރާސްފަތި 07:11މިހާތަނަށް ރައްޔިތުން ބޭނުންވާ އެއްވެސް މައުލޫމާތެއް ހާމަކޮށްފައިނުވޭ
ފަލަސުރުހީ ޕްރޮގްރާމްގައި ރައްޔިތުން މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުގައި ކޮރަޕްޝަންގެ ބޮޑެތި ކޭސްތައް ފެންމަތިވަމުންދާއިރު، މިފަދަ މައްސަލަތައް ހުއްޓުވުމަށް މަސައްކަތް ކުރާ މަންޒަރު ވެސް ނުފެންނަ ކަމަށް ރައްޔިތުން މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވިދާޅުވެއްޖެއެވެ.
ބުދަ ދުވަހުގެ ރޭ ބޭއްވި ފަލަސުރުހީ ޕްރޮގްރާމްގައި މެންބަރު އަހުމަދު ދީދީ ވިދާޅުވީ ރައީސް މުއިއްޒު ވެރިކަމަށް ވަޑައިގެންނެވީ ކޮރަޕްޝަން ނައްތާލާނެކަމުގެ ވައުދުފުޅާއެކު ކަމަށެވެ. އެމަނިކުފާނުގެ ވައުދުފުޅަށް ގިނަ ރައްޔިތުން އިތުބާރުކުރި ނަމަވެސް މިއަދު ގައުމުން ފެންނަނީ އެހެން މަންޒަރެއް ކަމަށް އޭނާ ވިދާޅުވިއެވެ. އަދި ކޮރަޕްޝަންގައި ގެއްލުނު ފައިސާ ހޯދައިދޭނެ ކަމަށް ރައީސް މުއިއްޒު ވިދާޅުވި ނަމަވެސް އެއްވެސް އުންމީދެއް ނެތް ކަމަށާއި، މިއަދާ ހަމައަށް އެކަމުގެ އެއްވެސް މަސައްކަތެއް ފަށާފައިނުވާ ކަމަށް މެންބަރު އަހުމަދު ދީދީ ވިދާޅުވިއެވެ.
މިސަރުކާރުގައި ކޮރަޕްޝަންގެ ގިނަ މައްސަލަތައް ފެންމަތިވެފައިވާކަން ފާހަގަކުރައްވައި މެންބަރު އަހުމަދު ދީދީ ވިދާޅުވީ އެޗްޑީސީން ހިންގި ގޯތީގެ ހިޔާނާތާ ގުޅިގެން ތުހުމަތު ކުރެވޭ ގިނަ މުވައްޒަފުންތަކެއް ސަސްޕެންޑް ކުރި ނަމަވެސް މިހާރު އެމީހުން އަނބުރާ ވަޒީފާއަށް ނެރިފައިވާ ކަމަށާއި، އަނެއް ބައި މުވައްޒަފުން އަމިއްލައަށް ސިޓީ ލައިގެން ވަޒީފާއިން ވަކިވެފައިވާ ކަމަށެވެ. އަދި ސިޔާސީ މަގާމުތަކުގައި ތިއްބެވި ބޭފުޅުންނަށް އެހެން ދިމަދިމާލަށް ވަޒީފާ ބަދަލުކޮށްފައިވާކަމުގެ މައުލޫމާތު ލިބިފައިވާ ކަމަށް މެންބަރު އަހުމަދު ދީދީ ވިދާޅުވިއެވެ.
މި ސަރުކާރުގެ ހާމަކުރުމުގެ ސިޔާސަތަށް އިޝާރާތް ކުރައްވައި މެންބަރު އަހުމަދު ދީދީ ވިދާޅުވީ މިހާތަނަށް ރައްޔިތުން ބޭނުންވާ އެއްވެސް މައުލޫމާތެއް ހާމަކޮށްފައިނުވާ ކަމަށާއި، ރައްޔިތުންނަށް ދޮގު ހެދިފައިވާތީ، ސިޔާސީ މަގާމުތަކުގެ ޖުމްލަ އަދަދު ވެސް ހާމަ ކުރުމަށް ޖެހެލުންވެފައިވާ ކަމަށެވެ.
މީގެ އިތުރުން މެންބަރު އަހުމަދު ދީދީ ވިދާޅުވީ ރައީސް މުއިއްޒާއި، ކެބިނެޓްގެ ވަޒީރުން ވަރަށް ގިނަ ގައުމުތަކަށް ދަތުރުކުރައްވާފައިވާ ކަމަށެވެ. ބައެއް ގައުމުތަކާއެކު އެއްބަސްވުންތައް ހަދައި، އެއްބަސްވުންތަކުގައި ސޮއިކޮށްފައިވާ ކަމަށާއި، ނަމަވެސް ރާއްޖެއަށް އެކަމުން ލިބުނު އެއްވެސް ފައިދާއެއް ފެންނަން ނެތް ކަމަށް މެންބަރު އަހުމަދު ދީދީ ވިދާޅުވިއެވެ.
