ވަޒީރު ޝިޔާމް މަސައްކަތް ކުރީ 20 ރުފިޔާއަށް މަސް ކިލޯއެއް ގަނެ 48 ގަޑި އިރު ތެރޭގައި ޑޮލަރުން ފައިސާދޭކަމަށް ދައްކަން - މައުރޫފް
ވަޒީރު ޖަވާބު ދެއްވީ ކިލޯއަކަށް 20 ރުފިޔާދިނުމަށް ވިވައުދު ފުދިފައި އޮތްގޮތަށް ދެއްކުމަށް
ކެންދޫ ދާއިރާގެ މެންބަރު މައުރޫފް ޒާކިރު
މަސްވެރިކަމާއި ބެހޭ ވަޒީރު އަހުމަދު ޝިޔާމް މަޖިލީހަށް ވަޑައިގެން މަސައްކަތް ކުރެއްވީ ރައީސް ޑރ. މުހައްމަދު މުއިއްޒުގެ މަސްވެރިކަމުގެ ވައުދުގައި ހިމެނޭ 20 ރުފިޔާއަށް މަސް ކިލޯއެއް ގަނެ 48 ގާޑީއިރުގެ ތެރޭގައި ޑޮލަރުން ފައިސާދޭކަމަށް ދައްކަން ކަމަށް ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވީ ސަރުކާރަށް ދޮޅު އަހަރުވެގެންދާއިރުވެސް ވަޒީރަކު މަޖިލީހަށް ހާޒިރުކުރުމުން ކުރީ ސަރުކާރުގެ ވާހަކަ ދައްކަން ވަޒީރު ލަދުގަންނަން ޖެހޭނެ ކަމަށެވެ. މައުރޫފް ވިދާޅުވީ ފިޝަރީޒް މިނިސްޓަރު އަހުމަދު ޝިޔާމަކީ 19 ވަނަ މަޖިލީހުގައި އިންނަވައިގެން އެންމެ ގިނައިން މަސްވެރިންގެ ވާހަކަ ދެއްކެވި ބޭފުޅާ ކަމަށާއި، ރައީސްގެ މަސްވެރިންގެ ވައުދުފުޅުވެސް ދިވެހި ރައްޔިތުންނަށް އޮޅުވާލަން މަސައްކަތް ކުރައްވަމުން ގެންދަވާ ކަމަށެވެ.
މައުރޫފް ވިދާޅުވީ ރައީސް ވައުދުފުޅުވެފައިވަނީ 20 ރުފިޔާއަށް މަސްކިލޯއެއް ގަނެ، 48 ގަޑި އިރު ތެރޭގައި ޑޮލަރުން ފައިސާ ދިނުމަށް ކަމަށެވެ. އަދި އެ ވައުދާއި ގުޅިގެން މަރަދޫ ދާއިރާގެ މެންބަރު އަހުމަދު ދީދީ ކުރެއްވި ސުވާލުގެ ޖަވާބުގައި ވަޒީރު ޖަވާބު ދެއްވީ އެ ވައުދުވެސް ފުދިފައި އޮތްގޮތަށް ދެއްކުމަށް ކަމަށާއި، މަހުގެ އަގު ފުލޯޓްވެފައިވާ ކަމަށް ވިދާޅުވި އިރު ވަޒީރުގެ ޖަވާބުން ސާފުވެގެންދަނީ ރައީސްގެ ވައުދުފުޅު ފުއްދާފައިވާކަން ދެއްކުމުގެ ގޮތުން ވާހަކަދެއްކެވިތަން ކަމަށެވެ.
މައުރޫފް ވިދާޅުވީ ވަޒީރު މަޖިލީހުގައި ވާހަކަ ދެއްކެވި ގޮތުން، ނޭނގޭ މީހަކަށް ހީވާނީ މަސްވެރިކަމުގެ ސިނާއަތުގައި ހުރި ހުރިހާ މަައްސަލައެއް ހައްލުވެއްޖެކަން ކަމަށެވެ. ހަގީގަތަކީ އެއީއެއް ނޫން ކަމަށާއި، ކޮންމެ ގޮތަކަށްވެސް ވާހަކަ ދެއްކިދާނެ ކަމަށެވެ.
މައުރޫފް ވިދާޅުވީ މި ސަރުކާރުން ބައެއްކަހަލަ ކަންކަމަކީ ވަރަށް ބޮޑު ކަންކަންކަމުގައި ހަދައިގެން ރައްޔިތުންނަށް އޮޅުވާލައިގެން މަސައްކަތް ކުރަމުންދަނީ އެކަށީގެންވާ މަސައްކަތްތަކެއް ނުކުރެވޭތީ ކަމަށެވެ.
މައުރޫފް ވިދާޅުވީ ދޮޅު އަަހަރުވި އިރު ކުރެވުނީ ކޮންކަމެއްތޯ ސުވާލު އުފައްދަވާފައެވެ.
މިކަމާއި ގުޅޭގޮތުން ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވީ ސްޕޯޓްސް ފިޝިންއަކީ މި ސަރުކާރުން ފެށިކަމެއް ނޫން ކަމަށާއި، އެ މަސައްކަތަކީ މިދިޔަ ސަރުކާރުގައި ތަޖުރިބާކޮށް، ފިޝަރީޒް މިނިސްޓްރީން ކުރަމުން އައިކަމެއް ކަމަށެވެ. އަދި އެކަން ކުރަމުން އައީ އެ ރަށެއްގެ ކަނޑުއޮޅިން ފެށިގެން 6 މޭލާއި 10 މޭލާ ދެމެދު ކަނދުފަތި އަޅައިގެން ކަމަށާއި، މި މަސައްކަތަކީ މި ސަރުކާރުން ވެރިކަމަށް އައިސް ފެށި މަސައްކަތެއް ނޫން ކަމަށެވެ. އަދި ދޮޅު އަހަރުވެގެންދިޔަ އިރުވެސް މި ދާއިރާއިން ކުރި ބޮޑު ކަމެއް ފެންނަން ނެތްކަމަށާއި، މަސްވެރިކަމުގެ ދާއިރާން ކުރެވުނު އެއްވެސް ކަމެއް ނެތް ކަމަށެވެ.
