ކީރިތި ޤުރުއާނަކީ އަޅުގަނޑުމެންގެ އާންމު ދިރިއުޅުމަށް އިރުޝާދާއި އަލިކަން ގެނެސްދޭ ވަސީލަތެއްކަމަށް މާލޭ ސީޓީ ކައުންސިލުގެ މޭޔަރު އާދަމް އާޒިމް ވިދާޅުވެއްޖެއެވެ.

އާޒިމް މިފަދައިން ވިދާޅުވީ މާލެ ސިޓީ ކައުންސިލްގެ ހަތަރު ވަނަ ޤުރުއާން އަދި މަދަހަ މުބާރާތް 1446 ހުޅުވުމުގެ ރަސްމިއްޔާތުގައި ވާހަކަދައްކަވަމުންނެވެ.

މި ރަސްމިއްޔާތު ފެށުމުގެ ގޮތުން ޤުރުއާން މުބާރާތެއް ބޭއްވުމުގެ މުހިންމު ކަމާއި އެ މުބާރާތުގެ މަޤުސަދުގެ މައްޗަށް އަލި އަޅުއްވާލައްވާ އާޒިމް ވިދާޅުވީ މިއަދު ފެށިގެން މި ދިޔައީ ވަރަށް މަތިވެރި، އަދި ބަރަކާތުގެ ފެށުމެއް ކަމަށާއި އެގޮތުން މި ފެށިގެން ދިޔައީ ކީރިތި ޤުރުއާނުގެ މައްސަރަުކަމުގައިވާ ބަރަކާތްތެރި ރަމަޟާން މައްސަރު ހެޔޮގޮތުގައި ދިރުވައި އިހުޔާކުރުމަށް މާލެ ސިޓީ ކައުންސިލުން ކުރަމުން އަންނަ އެންމެ މުހިންމު މަސައްކަތް ކަމަށެވެ.

އާޒިމް ވިދާޅުވީ ކީރިތި ޤުރުއާނަކީ ކޮންމެހެންވެސް ކިޔަވަންޖެހޭ، އަދި އެ ކިޔެވުމުން ގިނަގުނަ ސަވާބާއި ދަރުމައިގެ އިތުރުން ދުނިޔެވީ އަދި އުޚުރަވީ ބޮޑެތި ފައިދާތަކެއް ވެސް ލިބިދޭ ކަމެއް ކަމަށެވެ. އަދި އެ ޤުރުއާނާއި އަޅުގަނޑުމެންނޤާއި ދެމެދު ރަނގަޅު ގުޅުމެއް އުފެދިގެން ދާނީ ހަމަ ކޮންމެ ދުވަހަކުވެސް އެ ޤުރުއާނުން ކޮންމެވެސް މިންވަރެއް ކިޔަވާލެވިގެން ކަމަށް ވެސް އާޒިމް ވިދާޅުވިއެވެ.

އާޒިމް ވިދާޅުވީ ކީރިތި ޤުރުއާނަކީ އަޅުގަނޑުމެންގެ އާންމު ދިރިއުޅުމަށް އަގުހުރި ބޭނުންތެރި އިރުޝާދާއި އަލިކަން ގެނެސްދޭ އެއްޗެއް ކަމަށާއި އަދި ޤުރުއާނަކީ ދިރިއުޅުމުގައި ކުރިމަތިވާ އެންމެހާ ކާރިސާތަކުން ސަލާމަތްކޮށްދޭނެވެސް މަތިވެރި އެއްޗެއް ކަމަށެވެ.

ކުޑަކުދިންނާއި ޒުވާނުންނަށް ވެސް ޤުރުއާން ކިޔެވުމުގެ މުހިންމުކަން ފާހަގަކުރައްވާ އާޒިން ވިދާޅުވީ ޤުރުއާނަކީ މަތިވެރި ޝިފާއެއް ކަމަށާއި އެގޮތުން ބަލިތަކަށް ޝިފާ ލިބުން ވެސް އަދި ދުލަހެޔޮ ކަމަށް ވެސް ކީރިތި ޤުރުއާން ކިޔެވުމަކީ ކުރަން ޖެހޭކަމެއް ކަމަށެވެ.

އާޒިމް ވިދާޅުވީ ޤުރުއާނުން ޝިފާ ލިބޭނީ އެ ޤުރުއާން އިޚްލާޞްތެރިކަމާއި ހެޔޮހިތުން ކިޔެވުމުން ކަމަށެެވެ. އަދި އިސްލާމް ދީނަކީ މާތް ﷲ ލައްވާފައި އޮތް އެންމެ ހެޔޮ އުންމަތް ކަމަށާއި އެހެން ކަމުން ކީރިތި ޤުރުއާން ބާވައިލައްވާފައި ވަނީ އެންމެ މުހިންމު ދުސްތޫރައިގެ އޮތުގައާއި އަދި ހިދާޔަތުގެ ގޮތުގައި ކަމަށް ވެސް އޭނާ ވިދާޅުވިއެވެ.

އާޒިމް ވިދާޅުވީ ކީރިތި ޤުރުއާން އުގަންނަވައި ދެއްވުމަކީ ޒަމާނުއްސުރެ، ދިވެހި މި ގައުމުގައި ވަރަށް އިސްކަމެއް ދީގެން ކުރަމުން ގެންދާ ކަމެއް ކަމަށެވެ. އަދި ޒަމާނުއްސުރެ ދެނަމާދުގެ ދޭތެރޭގައި ކީރިތި ޤުރުއާން ކިޔެވުމަކީ ދިވެހިންގެ އާދަކާދައިގެ ތެރެއިން ކުރަމުން އައި، އަދި މިއަދު ފަނޑުވެފައިވާ އާދައެއް ކަމަށް ވެސް އާޒިމް ވިދާޅުވިއެވެ. ނަމަވެސް މި އާދައަލުން އަށަގަންނުވަން ޖެހޭ ކަމަށް ވެސް އޭނާ ވިދާޅުވިއެވެ. އާޒިމް ވަނީ ޒަމާނުއްސުރެ ދެނަމާދުގެ ދޭތެރޭގައި ދިވެހިން އާދަކާދައިގެ މަތިން ކިޔަވަމުން އައި ޤުރުއާން ކިޔެވުން އަލުން އަނބުރާ ގެނެސްދިނުމަށް ވެސް ގޮވާލައްވާފައެވެ.

އާޒިމް އިތުރަށް ވިދާޅުވީ ޒަމާންތައް ބަދަލުވަމުން އައި ނަމަވެސް ދިވެހިން ޤުރުއާނަށް ދެމުން އަންނަ އަހައްމިޔަތުކަން ދުވަހެއް ދުވަހަކަށް އަންނަނީ އިތުރުވަމުން ކަމަށާއި އެގޮތުން ނިމިގެން ދިޔަ އަހަރުގެ ޤުރުއާން މުބާރާތުގައި 600 އަށްވުރެ ގުނަ ކުދިން ބައިވެރިވެފައިވާއިރު، މަދަހަ މުބާރާތުގައި 350 އަށްވުރެ ގިނަ ދަރިވަރުން ބައިވެރިކަމަށެވެ. އެހެން ކަމުން މިކަމުން ވެސް ދައްކުވައިދެނީ ޤުރުއާނަށް ބެލެނިވެރިންނާއި ދަރިވަރުން ދެމުން އަންނަ އަހައްމިޔަތުކަން ކަމަށް އާޒިމް ވިދާޅުވިއެވެ.

ރަމަޟާން މަހާއި ދިމާކޮށް ކޮންމެ އަހަރަުވެސް ސިޓީ ކައުންސިލުން ސިލްސިލާކޮށް ބާއްވަމުން އަންނަ ޤުރުއާން މުބާރާތުގެ ތެރެއިން މިއަަހަރުގެ މުބާރާތުގައި ޖުމުލަ 670 ދަރިވަރުން ވަނީ ބައިވެރިވެފައެވެ. އަދި މި އަހަރުގެ މަދަހަ މުބާރާތުގައި 322 ދަރިވަރުން ވަނީ ބައިވެރިވެފައެވެ.