އިހަވަންދޫގައި ހޮސްޕިޓަލެއް އަޅަން ދިވެހި ސަރުކާރުން ކުރިން ހަވާލު ކުރި ކުންފުންޏާއެކު ހަދާފައިވާ އެއްބަސްވުން ބާތިލު ނުކޮށް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އާ އެ މަސައްކަތް ހަވާލު ކުރި މައްސަލައިގައި ކޯޓަށް ދިއުމަށް ނިންމައިފިއެވެ.

އިހަވަންދޫގައި 30 އެނދުގެ ހޮސްޕިޓަލެއް އަޅަން 17 ޖެނުއަރީ 2023 ގައި ދިވެހި ސަރުކާރުން ވަނީ ޑްޕްލެކްސް ޕަރައިވެޓް ލިމިޓެޑާއެކު އެއްބަސްވުމެއްގައި ސޮއިކޮށްފައެވެ.

މި އެއްބަސްވުން ދެމި އޮއްވާ، ރައީސް މުހައްމަދު މުއިއްޒު އިހަވަންދޫ އަށް ބުދަ ދުވަހު ވަޑައިގެން އައު އެއްބަސްމުގައި ސަރުކާރުން ސޮއިކުރީ އިހަވަންދޫގެ ރައްޔިތުންނާ މުއިއްޒު ބައްދަލުކުރެއްވުމަށް ބޭއްވި ޖަލްސާގައެވެ.

އިހަވަންދޫ ގައި ހޮސްޕިޓަލެއް އެޅުމަށް ސަރުކާރުގެ ފަރާތުން ސޮއިކުރެއްވީ ހެލްތް މިނިސްޓަރ ޢަބްދުﷲ ނާޒިމް އިބްރާޙިމްއެވެ. އަދި ރޯޑް ޑިވެލޮޕްމަންޓް ކޯޕަރޭޝަންގެ ފަރާތުން ސޮއިކުރެއްވީ އެކުންފުނީގެ މެނޭޖިންގ ޑިރެކްޓަރ ބްރިގޭޑިއާ ޖެނެރަލް ރިޓަޔަރޑް އަލީ ޒުހައިރުއެވެ.

ޑްޕްލެކްސް ކުންފުނީގެ އިސް ވެރިއަކު މިނޫހަށް މައުލޫމާތު ދެއްވަމުން ވިދާޅުވީ، އާރުޑީސީއާ އެކު އެއްބަސްވުމެއްގައި ސޮއި ކުރިކަން އެނގުނީ މީޑިއާ އިން ކަމަށާއި، އެ ކުންފުންޏަށް ހަވާލު ކުރި މަސައްކަތް މަޑު ޖެހިފައި އޮތީ މި ސަރުކާރުން މަސައްކަތް މަޑުޖައްސާލަން އެންގުމުން ކަމުގައެވެ.

ޑްޕްލެކްސް ގެ މެނޭޖިންގ ޑިރެކްޓަރ ވިދާޅުވީ، އެ ކުންފުނިން ހޮސްޕިޓަލުގެ މަސައްކަތް ކުރުމަށް ބިން ސާފުކޮށް، އެ ބިމުގައި ހުރި ރުއްތައް އެހެން ސަރަހައްދަކަށް ބަދަލު ކޮށް، ފައުންޑޭޝަން އަޅަން ކާނު ކޮނެ އަދި ފައުންޑޭޝަން އަށް ބޭނުންވާ ސާމާނުވެސް ވާނީ އިހަވަންދޫ އަށް ގެންގޮސްފައިވާ ކަމަށެވެ.  

"އަޅުގަނޑުމެންނަށް އަންގާފައެއް ނެތް އެއްބަސްވުން ބާތިލު ކުރި ކަމެއް، ދެން މައްސަލަ ހައްލު ކުރަން ކޯޓަށް ދާން ކުންފުނިން ނިންމާ، ލިޔެކިޔުން ތައްޔާރު ކުރުމުގެ މަސައްކަތް ކުރިއަށް މިހާރު ދަނީ؛" ޑްޕްލެކްސް ގެ މެނޭޖިންގ ޑިރެކްޓަރ އަހްމަދު ސައީދު ވިދާޅުވިއެވެ.

ބުދަ ދުވަހު އިހަވަންދޫ ރައްޔިތުންނާ ބައްދަލު ކުރައްވާ ރައީސް މުހައްމަދު މުއިއްޒު ދެއްކެވި ވާހަކަފުޅުގައި ހޮސްޕިޓަލް މަޝްރޫއަކީ ސިއްޙީ ދާއިރާ އިން އެމަނިކުފާނު ކުރިއަށްގެންދަން ވަޢުދުވީ އެންމެ މުހިންމު މަޝްރޫޢު ކަމަށާއި، އާރުޑީސީ އާއެކީ ސޮއިކުރެވިގެން މިދިޔަ މަޝްރޫޢު، ބާރު ސްޕީޑުގައި ކުރިއަށް ގެންގޮސް، ނިންމައިދޭނެ ކަމުގެ ފުރިހަމަ ޔަޤީންކަން އިހަވަންދޫ ރައްޔިތުންނަށް އަރުވާ ކަމަށެވެ.