ހއ.އިހަވަންދޫ ނަލަ އައްސޭރި ގޭގައި އަލިފާނުގެ ހާދިސާއެއް ހިނގާ، ބޮޑެތި ގެއްލުންތަކެއް ލިބި އެގެ ބޭނުންނުކުރެވޭ ވަރަށް އަނދާފައިވާ ކަމަށް އެރަށު ކައުންސިލުން ހާމަކޮށްފިއެވެ.

އިހަވަންދޫ ކައުންސިލްގެ ރައީސް އަހުމަދު ޞަބާހު ވިދާޅުވީ މިއަދު މެނދުރު 11.45 ހާއިރު ހިނގި އަލިފާނުގެ މިހާދިސާ ހިނގާފައިވަނީ އެގޭގައި ހަދާފައިވާ ތިން ކޮޓަރީގެ ތެރެއިން އެގެ މީހުން ގުދަނެއްގެ ގޮތުގައި ބޭނުން ކުރަމުން އަންނަ ކޮޓަރީގައި ކަމަށެވެ. މިކޮޓަރީގައި ހުރީ ލަނކުޑިފަދަ ތަކެތި ކަމަށްވެސް އޭނާ ވިދާޅުވިއެވެ. އަދި އެތަނުގައި ރޯވި އަލިފާން ކޮންޓްރޯލް ކުރެވިފައި ވަނީ މެންދުރުފަހު އެކެއްޖަހާ އެހާކަން ހާއިރުކަމަށް އޭނާ ވިދާޅުވިއެވެ.

މިގޭގައި ތިން ކޮޓަރި ހުންނައިރު މީގެ ތެރެއިން މީހުން ދިރިއުޅެނީ އެއްކޮޓަރީގައި ކަމަށާއި މިހާދިސާ ހިނގިއިރު އެކޮޓަރީގައި މީހުން ތިބި ނަމަވެސް އެއްވެސް މީހަކަށް ގެއްލުމެއް ލިބިފައި ނުވާ ކަމަށް ކައުންސިލްގެ ރައީސް ވިދާޅުވިއެވެ.

އޭނާ ވިދާޅުވީ މިހާރު ކައުންސިލުން ވަނީީ ގެއްލުން ލިބުނު ގޭގެ ޢާއިލާއަށް އެހީތެރިކަން ފޯރުކޮށްދިނުމުގެ މަސައްކަތް ފަށާފައެވެ. މިގޮތުން ފުލުހުންނާއި ގުޅިގެން ނޭޝަނަލް ޑިސާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އަށް، މި ތަނަށް ލިބުނު ގެއްލުމުގެ މައުލޫމާތު ފޮނުއްވުމުގެ މަސައްކަތް ފައްޓަވާފައިވާ ކަމަށް ވިދާޅުވިއެވެ.