މި ސަރުކާރުގެ ސިޔާސަތާއެކު ރާއްޖޭގައި ދަތިނުވާ އެއްވެސް ބަޔަކު ނެތް: ފައިސަލް

މިސަރުކާރުގެ ސިޔާސަތާއެކު ރާއްޖޭގައި ދަތިނުވާ އެއްވެސް ބަޔަކު ނެތް ކަމަށާއި، ހުރިހާ ދާއިރާއަކަށް އުނދަގޫ ވެފައިވާ ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެއެވެ.

ބުދަ ދުވަހުގެ ރޭ ކުރިއަށް ގެންދިޔަ ''ފުދިއްޖެ-ފުނޑިއްޖެ'' އެމްޑީޕީ ކަންމަތީ ޖަލްސާގައި ފައިސަލް ވިދާޅުވީ ރާއްޖޭގެ ހުރިހާ ދިމާލަކުން ފެންނަމުންދަނީ ދަތިކަން ކަމަށާއި، ދަތިނުވާ އެއްވެސް ބައެއް ނެތް ކަމަށެވެ.

އެގޮތުން މަސްވެރިކަން، ފަތުރުވެރިކަން، ކުދި ވިޔަފާރިތަކާއި، މެދުފަންތީގެ ވިޔަފާރިތައް އަދި އާއްމުކޮށް މަސައްކަތްކުރާ ފަރާތްތަކަށް މިއިން ޒަމާނެއްގައި ނުވާމިންވަރަށް ދަތިވެ، އުދަނގޫވެފައިވާ ކަމަށް ފައިސަލް ވިދާޅުވިއެވެ. އަދި ވިދާޅުވީ ރައްޔިތުންނަށް މިދަތިތަކާއި، އުދަނގުލާ ކުރިމަތިލާންޖެހިފައިވަނީ މިސަރުކާރުގެ ހަރުދަނާކަމެއް ނެތް ސިޔާސަތުތަކުގެ ސަބަބުން ކަމަށެވެ.

މީގެ އިތުރުން ފައިސަލް ވަނީ ރައްޔިތުން މަޖިލީހުގެ މަސައްކަތްތަކަށް އަލިއަޅުއްވާލައްވައި ވާހަކަދައްކަވާފައެވެ.

ފައިސަލް ވިދާޅުވީ ރައްޔިތުންގެ މަޖިލީހަށް މެންބަރު އިންތިޚާބު ކުރަނީ ރައްޔިތުންގެ ހައްގުގައި ރައްޔިތުންގެ ފަރާތުން ވަކާލާތު ކުރުމަށް ކަމަށާއި، ނަމަވެސް މިސަރުކާރުން އެ މިނިވަންކަން ވެސް ނިގުޅައިގަނެފައިވާ ކަމަށެވެ.

މިސަރުކާރުގެ ބޭފުޅުން ކުރިން ދެއްކެވި ވާހަކަތަކާއި، އަމަލުތަކާ ދިމާނުވާކަން ފާހަގަކުރައްވައި ފައިސަލް ވިދާޅުވީ މިހާރު ރައްޔިތުން ރަނގަޅަށް ހޭއަރައި، ރަނގަޅަށް ވިސްނަންވެއްޖެ ކަމަށާއި، މިސަރުކާރުގެ އެއްއަހަރުގެ ތެރޭގައި ލައްކަ ގިނަ ތަޖުރިބާ ކުރެވިފައިވާ ކަމަށެވެ.

ފައިސަލް ވިދާޅުވީ މި ތަޖުރިބާގެ އަލީގައި، ގައުމާއި، ރައްޔިތުންނާއި، ގާނޫނު އަސާސީގެ ހައްގުގައި އަދި ގާނޫނު އަސާސީ އިތުރަށް ފުޑާލުމަށް ކުރާނެ މަސައްކަތްތައް ހުއްޓުވުމަށް ރައްޔިތުން އެކުވެ ސަރުކާރަށް އަޑު އިއްވުމަށް ނުކުންނަންޖެހޭ ކަމަށެވެ. އަދި މިއަދު އެހާލަތަށް ކަންކަން ގޮސްފައިވާ ކަމަށް ފައިސަލް ވިދާޅުވިއެވެ.

އެހެންކަމުން 31 ޖެނުއަރީގައި އެމްޑީޕީން ބާއްވާ ބޮޑު އެއްވުމުގައި ހުރިހާ ރައްޔިތުން ވެސް ބައިވެރިވުމަށް ފައިސަލް އެދިވަޑައިގެންނެވިއެވެ.