ރަމްޟާން މަހަށް މާލެ ސާފުކުރުމުގެ މަސައްކަތް ކުރަން ކައުންސިލާއި ވެމްކޯއިން ނިންމައިފި
މަގުތަކަށް އުކާފައިހުންނަ ކުނިތައް ނަގައި މަގުތައް ސާފުކުރުމަށްވަނީ ނިންމާފައި
ރޯދައަށް މާލެ ސިޓީ ސާފުކުރުމުގެ މަސައްކަތާއި ގުޅޭގޮތުން މަޝްވަރާކުރަނީ
ކުރިއަށް އޮތް ރަމަޟާން މަހަށް ތައްޔާރުވުމުގެ ގޮތުން މާލެ ސިޓީގެ މަގުތައް ސާފުކުރުމުގެ މަސައްކަތް، މާލެ ސިޓީ ކައުންސިލާއި ވޭސްޓް މެނޭޖްމަންޓް ކޯޕަރޭޝަން (ވެމްކޯ) ގުޅިގެން ކުރުމަށް ނިންމައިފިއެވެ.
މި ގޮތަށް ނިންމާފައި ވަނީ، ވެމްކޯއިން ކައުންސިލާއެކު ބޭއްވި ބައްދަލުވުމަށް ފަހުއެވެ. އެ ގޮތުން މަގުތަކަށް އުކާފައިހުންނަ ކުނިތައް ނަގައި މަގުތައް ސާފުކުރުމަށްވަނީ ނިންމާފައެވެ. މި މަސައްކަތް ފެށުމަށް ހަމަޖެހިފައި ވަނީ 2025 ފެބުރުއަރީ މަހުގެ 15 ވަނަ ދުވަހުއެވެ.
މި ބައްދަލުވުމުގައި ވާހަކަ ދައްކަވަމުން މާލެ ސިޓީގެ މޭޔަރ އާދަމް އާޒިމް ވިދާޅުވީ، ބަރަކާތްތެރި ރަމަޟާން މަހަކީ، ހުރިހާ ރައްޔިތުން އަޅުކަމާގެން މަސްއޫލުވެގެންއުޅޭ މަހެއް ކަމަށާއި އެހެން ކަމުން، މާލޭގެ މަގުތަކާއި ގޯޅިތަކާއި ހުސްބިންތަކާއި ޕާކުތައް ސާފުތާހިރުކޮށް ބޭއްވުމަކީ ވަރަށް މުހިންމު ކަމެއް ކަމަށެވެ. އަދި މަގުތައް ރީތިކޮށް ބޭއްވުމަށް، ކައުންސިލުން މަސައްކަތް ކުރަމުން ގެންދާނެ ކަމަށް މޭޔަރ ޢާޒިމް ވިދާޅުވިއެވެ.
"މި މަސައްކަތުގައި ވެމްކޯއާއި ގުޅިގެން މަސައްކަތް ކުރުމަށް ނިންމީ، މާލޭގެ ރައްޔިތުންނަށް އިތުރު ފަސޭހަތަކެއް ހޯދައިދިނުމުގެ ގޮތުން." މޭޔަރ ޢާޒިމް ވިދާޅުވިއެވެ.
މި މަސައްކަތުގެ ތެރޭގައި މަގުތަކަށް އުކައިފައި ހުންނަ ކުންޏާއި ބާ ވެހިކަލްތައް ނެގުމާއި، އަދި މަގުތަކުގެ ކާނުތައް ސާފުކުރުން ހިމެނެއެވެ. މާލެ ސިޓީ ސާފުތާހިރުކޮށް ބޭއްވުމަށް މާލެ ސިޓީ ކައުންސިލްގެ ކޮމިއުނިޓީ ޔުނިޓުން ވަނީ ޚާއްޞަ ޓާސްކްފޯހެއް އެކުލަވައިލައިފައެވެ.
ރަމްޟާންމަހަކީ ޢާއްމު މަސްމަހަށް ވުރެ ކުނިބުނިތައް އިތުރުވާނެ މަހަކަށްވާތީ، މަގުތަކަށް ކުނި ނެއެޅުމަށާއި މާލެ ސާފުކޮށް ބޭއްވުމަށް، މާލެ ސިޓީ ކައުންސިލުން ކުރަމުންދާ މަސައްކަތަށް އެއްބާރުލުން ދެއްވުމަށް މާލެ ސިޓީކައުންސިލުން އިލްތިމާސް ކުރައްވައެވެ.
