ސަސްޕެންޑު ކުރި ނިހާދަށް މާލީ ވުޒާރާގެ ސްޓޭޓް މިނިސްޓަރުކަން ދީފި

މިނިސްޓްރީ އޮފް ޓުއަރިޒަމްގެ ސްޓޭޓް މިނިސްޓަރުގެ މަގާމުގައި ހުންނަވަނިކޮށް ސަސްޕެންޑު ކުރި މުޙައްމަދު ނިހާދަށް، މިނިސްޓްރީ އޮފް ފިނޭންސް އެންޑް ޕްލޭނިންގެ ސްޓޭޓް މިނިސްޓަރުގެ މަޤާމު ސަރުކާރުން ދީފި އެވެ.

ޓުއަރިޒަމް މިނިސްޓްރީގެ ސްޓޭޓް މިނިސްޓަރުގެ މަގާމުގައި ހުންނަވަނިކޮށް ނިހާދު ސަސްޕެންޑު ކޮށްފައި ވަނީ މިދިޔަ އަހަރުގެ ޑިސެމްބަރު މަހުގެ 24 ވަނަ ދުވަހު އެވެ. އެއީ ޑިސެމްބަރު މަހުގެ 23 ވަނަ ދުވަހުގެ ރޭ، ސަރުކާރު ހިންގާ މައި ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ރަސްމީ ހަރުގޭގައި އޮތް ޖަލްސާއެއްގައި ނިހާދު ދެއްކެވި ވާހަކައަކާ ގުޅިގެންނެވެ.

އެގޮތުން އެ ޖަލްސާގައި ވާހަކަ ދައްކަވަމުން ނިހާދު ވިދާޅުވެފައި ވަނީ ރާއްޖެ އަށް ދެ މިލިއަން ވަނަ ފަތުރުވެރިޔާ އަންނަ ދުވަހާ ދިމާކޮށް، އިދިކޮޅު މައި ޕާޓީ، ދިވެހި ރައްޔިތުންގެ ޑިިމޮކްރަޓިކް ޕާޓީ (އެމްޑީޕީ) އިން ޓެރަރިސްޓު ހަމަލާއެއް ދޭން އުޅޭ ކަމަށެވެ. ނިހާދުގެ އެ ވާހަކަތަކާ ގުޅިގެން އޭނާ އަށާއި، ސަރުކާރަށް ފާޑު ކިޔުން އަމާޒުވެފައި ވަނިކޮށް، ސަރުކާރުން ވަނީ އޭނާ ސަސްޕެންޑު ކުރަން ނިންމައިފަ އެވެ.

ނިހާދު، ސަސްޕެންޝަންގައި ހުންނަވާތާ އެއް މަހަށް ވުރެ ގިނަ ދުވަސްވެފައިވާއިރު، ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު މިހާރު އޭނާ ވަނީ ފިނޭންސް މިނިސްޓްރީގެ ސްޓޭޓް މިނިސްޓަރުގެ މަޤާމަށް އައްޔަން ކުރައްވައިފަ އެވެ. އެގޮތުން ފިނޭންސް މިނިސްޓްރީގެ މީޑިއާ އޮފިޝަލް "ރާއްޖެ އެމްވީ" އަށް ވިދާޅުވި ގޮތުގައި އެ މިނިސްޓްރީގެ ސްޓޭޓް މިނިސްޓަރުގެ މަޤާމަށް ނިހާދު އައްޔަން ކުރައްވާފައި ވަނީ މިދިޔަ ބުރާސްފަތި ދުވަހު އެވެ. އަދި އާދީއްތަ ދުވަހުން ފެށިގެން ނިހާދު އެ މިނިސްޓްރީ އަށް ވަޒީފާ އަށް ނިކުންނަވަން ފަައްޓަވާފައިވާ ކަމަށް ވެސް ވިދާޅުވި އެވެ.

ނިހާދު އަކީ ނިމުނު 19 ވަނަ ރައްޔިތުންގެ މަޖިލީހުގައި ފޭދޫ ދާއިރާގެ މެމްބަރުންކަން ވެސް ކުރައްވާފައިވާ ބޭފުޅެކެވެ. އޭރު ނިހާދު ހުންނެވީ އެމްޑީޕީގަ އެވެ. ނަމަވެސް، 2023 ވަނަ އަހަރު އޮތް ރިޔާސީ އިންތިޚާބުގައި އެމްޑީޕީ އަށް ނާކާމިޔާބުވީ ފަހުން، ނިހާދު ވަނީ ވެރިކަން ކުރާ ޕީއެންސީ އަަށް ސޮއި ކޮށްފަ އެވެ. އެއީ ރައްޔިތުންގެ މަޖިލީހުގެ އެމްޑީޕީ އަށް ނިސްބަތްވާ 13 މެމްބަރަކު ޕީއެންސީ އަށް ބަދަލުވީ ވަގުތުގަ އެވެ.