މިހާތަނަށް ބެލި ބެލުމުން ތިނަދޫ ސިޓީ ކައުންސިލުން ވައްކަން ކުރި ކަމަށް ނުބެލެވޭ - ފުލުހުން
އޭސީސީން ވަނީ އެ ލިޔެކިޔުންތައް ގެންދިޔައީ އުސޫލުތަކާއި އެއްގޮތަށް ކަމަށް ފާހަގަކޮށް އެ ކޮމިޝަނާއި މެދު ނުރަނގަޅު މައުލޫމާތުތައް ނުފެތުރުމަށް އިލްތިމާސްކޮށްފަ
ތިނަދޫ ސިޓީ ކައުންސިލުން ވައްކަންކުރި ކަމަށް ތުހުމަތުކުރީ ހޯމަ ދުވަހު
މިހާތަނަށް ބެލި ބެލުމުން ތިނަދޫ ސިޓީ ކައުންސިލުން ވައްކަން ކުރި ކަމަށް ނުބެލެވޭ ކަމަށް ފުލުހުން ވަނީ ބުނެފައެވެ.
މީސްމީޑިއާގައި ހިއްސާކޮށްފައިވާ ޕޯސްޓެއްގައި ތިނަދޫ ކައުންސިލުން ބުނެފައި ވަނީ ތިނަދޫ ސިޓީ ކައުންސިލްގެ ގިނަ އަދަދެއްގެ ތަކެތި އެންޓިކޮރަޕްޝަން (އޭސީސީ)ގެ ނަމުގައި ކައުންސިލް އިދާރާ އަށް އައި ބަޔަކު ވަގަށް ނަގާފައިވާ ކަމަށެވެ.
އަދި މި މައްސަލަ މޯލްޑިވެސް ޕޮލިސް ސާރވިސްއަށް ހުށަހަޅާފައިވާ ކަމަށާއި މައްސަލަ ބަލަމުންދާތީ ކައުންސިލްގެ ބައެއް ޚިދުމަތްތައް މެދު ކެނޑިފައިވާކަމަށް ވެސް ކައުންސިލުން ވަނީ ބުނެފައެވެ.
އެކަމާއި ގުޅޭގޮތުން އިތުރު މައުލޫމާތު ހޯދުމަށް ތިނަދޫ ސިޓީ ކައުންސިލަށް ރާއްޖެއެމްވީން ގުޅުމުން ފޯނަށް ޖަވާބުނުދެއްވާތީ ކައުންސިލްގެ ބަހެއް ވަނީ ލިބޭ ގޮތް ނުވެފައެެވެ. އިތުބާރު ހުރި މަސްދަރަކުން މައުލޫމާތުލިބިފައިވާ ގޮތުގައި އޭސީސީން ވަނީ އާދިއްތަ ދުވަހު ކައުންސިލަށް ވަދެ ބައެއް ތަކެތި ގެންގޮސްފައެވެ.
އޭސީސީން ތިނަދޫ ކައުންސިލަށް ވަދެފައި ވަނީ ރައްޔިތުންގެ މަޖިލީހުގެ ތިނަދޫ އުތުރު ދާއިރާގެ މެމްބަރު ސައުދުﷲ ހިލްމީ ހުށަހަޅުއްވާފައިވާ މައްސަލަތަކަކާއި ގުޅިގެން ކަމަށް ރާއްޖެއެމްވީ އަށް ވަނީ މައުލޫމާތު ލިބިފައެވެެ.
އެ މައްސަލަ އާއި ގުޅިގެން އާދިއްތަ ދުވަހު އޭސީސީން ތިނަދޫ ސިޓީ ކައުންސިލަށް ދިއުމުން ސިޓީއަކުން، އެ މައްސަލަތަކާއި ގުޅޭ މައުލޫމާތު ހިއްސާކުރުން 28 ޖެނުއަރީ (އަންގާރަ) 14:30ގަ އޮންނާނެ ކަމަށް ވަނީ އަންގާފައެވެ. އެހެންނަމަވެސް އޭސީސީން ވަނީ އާދިއްތަ ދުވަހު ތިނަދޫ ސިޓީ ކައުންސިލް ބެލުމަށް ފަހު ބައެއް ލިޔެކިޔުންތައް އެ އިދާރާގެ ބެލުމުގެ ދަށަށް ގެންގޮސްފައެވެ. އޭސީސީން ވަނީ އެ ލިޔެކިޔުންތައް ގެންދިޔައީ އުސޫލުތަކާއި އެއްގޮތަށް ކަމަށް ފާހަގަކޮށް އެ ކޮމިޝަނާއި މެދު ނުރަނގަޅު މައުލޫމާތުތައް ނުފެތުރުމަށް އިލްތިމާސްކޮށްފައެވެ.
އޭސީސީން މިކަމާއި ގުޅޭގޮތުން ބުނީ "ތިނަދޫ ސިޓީ ކައުންސިލް" އާއި ގުޅޭގޮތުން އޭސީސީން ތަހުގީގުކުރަމުންދާ މައްސަލަތަކަކާއި ގުޅިގެން 26 ޖެނުއަރީ 2025ގައި އެ ކޮމިޝަންގެ ޓީމެއް ތިނަދޫ ސިޓީ ކައުންސިލްގައި ހަރަކާތްތެރިވެފައިވާ ކަމަށެވެ. އަދި އެކަންކޮށްފައި ވަނީ އޮންނަ އުސޫލުތަކުގެ ތެރެއިން ކަމަށް ވެސް އެ އިދާރާއިން ވަނީ ބުނެފައެވެ. ކޮމިޝަނުން ވަނީ އިޖުރާއަތުތައް ފުރިހަމަކޮށް ކޮމިޝަންގެ ތަހުގީގަށް ބޭނުންވާ ލިޔެކިޔުންތައް ހޯދާފައި ކަމަށް އެ އިދާރާއިން ވަނީ ބުނެފައެވެ.
ފުލުހުން ބުނީ ތިނަދޫ ސިޓީކައުންސިލުން ވައްކަންކުރިކަމަށް ތުހުމަތުކުރާ މައްސަލަ އެއް އެ އިދާރާ އަށް ހުށަހަޅާފއި ވަނީ ހޯމަ ދުވަހު ކަމަށެވެ. އަދި މިހާތަނަށް އެފަދަ ކަމެއް ފާހަގަ ނުކުރެވޭ ކަމަށާއި މައްސަލަ އާއި ގުޅިގެން ބަލަން ޖެހޭ ކަންކަން ބަލަމުންދާ ކަމަށް ފުލުހުން ވަނީ ބުނެފައެވެ.
