ގދ. ތިނަދޫ ސިނާއީ ސަރަހައްދުގެ ބިން ހިއްކުމުގެ ސަބަބުން އެރަށުގައި ތޮއްޖެހިފައިހުރި މަސައްކަތްތަކަށް ހައްލު ލިބިގެންދާނެކަމަށް ތިނަދޫ ކައުންސިލުން ބުނެފިއެވެ.
ތިނަދޫ ކައުންސިލްގެ ރައީސް ސައުދު އަލީ ރާއްޖެއެމްވީއަށް ވިދާޅުވީ، މިވަގުތު ގިނަ މަސައްކަތްތަކެއް އެރަށުގެ ތެރޭގައި ތޮއްޖެހިފައިވާ ކަމަށެވެ. ނަމަވެސް ސިނާއީ ސަރަހައްދު ހިއްކާ ނިމުމާއެކު އެސަރަހައްދަށް މި މަސައްކަތްތައް ބަދަލުކުރާނެކަމަށެވެ. އެހެންކަމުން ރަށުތެރޭގައި މަސައްކަތްތައް ތޮއްޖެހިފައި އޮތުމުގެ މައްސަލައަށް މި ބިމުގެ ސަބަބުން ހައްލު ލިބިގެންދާނެ ކަމަށެވެ.
ތިނަދޫގައި ހިއްކާ ސިނާއީ ސަރަހައްދުގައި ކުރާނޭ މަސައްކަތްތަކެއް މިހާތަނަށް ނިންމާފައި ނުވާކަން ފާހަގަކުރައްވައި ސައުދު ވިދާޅުވީ، އެތަނުގައި ކުރާނެ މަސައްކަތްތަކުގެ ޕްލޭންތަކެއް މިހާރު ހަދަމުން އަންނަ ކަމަށެވެ. އަދި އެ ކަންތައްތައް ދިރާސާ ކުރުމަށްފަހު އެތަނުގައި ކުރާނެ މަސައްކަތްތައް ވަރަށް އަވަހަށް ނިންމާނެ ކަމަށެވެ.
ގދ. ތިނަދޫ ސިނާއީ ސަރަހައްދުގެ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއު މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރއިން އާދީއްތަ ދުވަހު ވަނީ އެމްޓިސީސީއާ ހަވާލުކޮށްފައެވެ. މި މަޝްރޫއުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކާ ގުޅޭގޮތުން މިނިސްޓްރީން ބުނީ، 219,595 އަކަމީޓަރުގެ ބިން ހިއްކުމާއި، 1336 މީޓަރުގެ ރިވެޓްމެންޓް ޖެހުމާއި، ހުޅަނގު ދެކުނު ފަރާތުގައި 468 މީޓަރ ރިވެޓްމެންޓް ޖެހުމާއި، 284 މީޓަރ އެއްގަމު ތޮށި ޖެހުމުގެ އިތުރުން، 1 ކޮންކްރީޓް ބްރިޖް އެޅުން ހިމެނޭ ކަމަށެވެ.
މި ބިން ހިއްކާ ނިމުމާއެކު، ހަދަމުންދާ ޕޯޓް އެތަނަށް ބަދަލުކުރެވި، ސީދާ ބޯޓުތައް އެސަރަހައްދަށް ގާތްކުރެވޭނެކަމަށް ސައުދު ވިދާޅުވިއެވެ. އަދި އެސަރަހައްދުގައި ގުދަންތަކެއް ގާއިމުކޮށް ރަށަށް ގެންދާ މުދާތައް އެސަރަހައްދުގައި ރައްކާކުރެވޭނެ ނިޒާމެއްވެސް ގާއިމުކުރާނެކަމަށް ސައުދު ވިދާޅުވިއެވެ. ތިނަދޫގެ ސިނާއީ ސަރަހައްދު ހިއްކާ ނިމުމާއެކު ހުރިހާ އިންޑަސްޓްރިއަލް މަސައްކަތެއް އެސަރަހައްދަށް ބަދަލުކުރުމަށް ވަނީ ނިންމާފައެވެ.
މީގެ އިތުރުން ސައުދު ވިދާޅުވީ ތިނަދޫއަށް ގޯތި ބޭނުންވާ މިންވަރަށް ރަށުގައި ބިން ނެތްކަމަށެވެ. މީގެ ކުރިން 50 ހެކްޓަރުގެ ބިން ހިއްކި ނަމަވެސް އެސަރަހައްދުން ގޯތި ބޭނުންވާ ހުރިހާ ފަރާތްތަކަށް ގޯތި ނުދެވޭނެކަން ފާހަގަކުރައްވައި ސައުދު ވިދާޅުވީ އިތުރު 170 ހެކްޓަރު ބިން އަދި ހިއްކަން ޖެހޭކަމަށެވެ.
