ގަލްފް އޮފް މެކްސިކޯގެ ނަމަކީ ގަލްފް އޮފް އެމެރިކާ ކަމަށް އެމެރިކާ އިން ކަނޑައަޅައިފި

ގަލްފް އޮފް މެކްސިކޯގެ ނަމަކީ ގަލްފް އޮފް އެމެރިކާ ކަމަށް އެމެރިކާ އިން ކަނޑައަޅާ އިއުލާނު ކޮށްފިއެވެ.

ހޯމަ ދުވަހު ރައީސްކަމާ ޙަވާލުވެ ވަޑައިގަތުމަށްފަހު ގަޑިއިރުތަކެއްގެ ތެރޭގައި ރައީސް ޑޮނަލްޑް ޓްރަމްޕް ނެރުއްވި ގިނަ އަދަދެއްގެ ވެރިކަމުގެ އަމުރުތަކުގެ ތެރެއިން ގަލްފް އޮފް މެކްސިކޯގެ ނަން ގަލްފް އޮފް އެމެރިކާ އަށް ބަދަލު ކުރުމުގެ އަމުރު ހިމެނެއެވެ.

ރިޔާސީ އިންތިޚާބުގެ ކެމްޕޭންގައި ގަލްފް އޮފް މެކްސިކޯގެ ނަން ބަދަލު ކުރައްވާނެ ކަމަށް ޓްރަމްޕް ވައުދުވެ ވަޑައިގަތެވެ.

"ރައީސްގެ އިރުޝާދާ އެއްގޮތަށް، މެކްސިކޯ ކަނޑުގެ ރަސްމީ ނަމަކަށް މިހާރު ވާނީ އެމެރިކާ ކަނޑެވެ." އިންޓީރިއަރ ޑިޕާޓްމަންޓުން ހުކުރު ދުވަހު ނެރުނު ބަޔާނެއްގައި ބުނެފައިވެއެވެ.

ގަލްފް އޮފް މެކްސިކޯގެ ނަން ބަދަލު ކުރަން ޓްރަމްޕް އަމުރު ނެރުއްވި ނަމަވެސް، މެކްސިކޯ ކަނޑުގެ ނަން ބަދަލުކުރުމުގެ ބާރެއް ޓްރަމްޕް އަށް ލިބިވަޑައިގެންފައި ނުވާ ކަމަށް ތަޖުރިބާކާރުން ބުނެއެވެ.

"އަޅުގަނޑުމެން ނަން ބަދަލުކުރާނަމެވެ. އެއީ އެތަނާ ގުޅޭ ގިނަ މަސައްކަތް ކުރަނީ އަޅުގަނޑުމެން ކަމަށްވާތީ އެވެ. އެއީ އަޅުގަނޑުމެންގެ ތަނަކަށް ވާތީއެވެ،" ޖަނަވަރީ މަހުގެ ކުރީކޮޅު ބޭއްވުނު ކޮންފަރެންސެއްގައި ޓްރަމްޕް ވިދާޅުވެފައިވެއެވެ.

މެކްސިކޯ ކަނޑަކީ ދުނިޔޭގެ އެންމެ ބޮޑެތި އަދި އެންމެ މުހިންމު ކަނޑުތަކުގެ ތެރެއިން އެއް ކަނޑެވެ. އަދި އެ ސަރަޙައްދުގެ އިޤްތިޞާދުގައި މުހިންމު ދައުރެއް އަދާކުރާ ކަނޑެކެވެ.

ތާރީޚުގެ ތެރެއިން އެ ކަނޑަށް ގިނަ ނަންތަކެއް ކިޔާފައިވެއެވެ.

"ގޯލްފޯ ޑީ މެކްސިކޯ" މި ނަން ފުރަތަމަ ޗާޓުތަކުން ފެނެފައިވަނީ 16 ވަނަ ޤަރުނުގެ މެދުތެރޭގައެވެ. އެއީ ސްޕެއިން އިން މިހާރުގެ ކިއުބާ އާއި، މެކްސިކޯ އާއި، އެމެރިކާގެ ސްޓޭޓުތައް ހިސޯރު ކޮށްގެން އުޅުނު ދުވަސްވަރެވެ.

މާހިރުން ބުނާ ގޮތުގައި، މިގޮތައް ނަން ބަދަލު ކުރިޔަސް ބައިނަލްއަޤްވާމީ ގޮތުން އެކަން ބަލައިގަތުމަކީ އެހާ ގާތް ކަމެއް ނޫނެވެ.

ބައިނަލް އަގްވާމީ ކަނޑުތަކުގެ ނަންތައް ސްޓޭންޑަޑައިޒް ކުރުމުގެ މަސައްކަތް ކުރަނީ އިންޓަރނޭޝަނަލް ހައިޑްރޮގްރެފިކް އޮގަނައިޒޭޝަން އިންނެވެ.