ގަސްކާނާއާއި ކެމިކަލް ސަޕްލައި ކުރާ ކުންފުންޏާއި ހަވާލުކުރި އިންނަމާދޫ، ރަސްމާދޫ, މަޑުއްވަރީ އަދި ކިނޮޅަހުގެ ކައުންސިލް އައު އިމާރާތުގެ ބިންގާ އަޅައިފިއެވެ.

ރައީސް ޑރ. މުހައްމަދު މުއިއްޒު ރ. އަތޮޅަށް ކުރެއްވަމުން ގެންދަވާ ދަތުރުފުޅުގެ ތެރެއިން 4 ރަށުގެ ކައުންސިލް އިދާރާގެ ބިންގާ އަޅުއްވައި ދެއްވީ ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ މިނިސްޓަރ އާދަމް ޝަރީފް އުމަރުއެވެ.

ކޮންޓްރެކްޓަރ ފައިނޭންސް އުޞޫލުން ޢިމާރާތްކުރާ 55 ކައުންސިލްގެ ތެރޭގައި ހިމެނޭ ހުރިހައި ރަށެއްގެ ކައުންސިލް އިދާރާގެ، އައު ޢިމާރާތުގެ މަސައްކަތް ކުރަނީ، މެލޭޝިއާގެ ކުންފުންޏެއް ކަމަށްވާ "ހެކްސްޓަރ ގްލޯބަލް" އިންނެވެ.

މީގެ ތެރެއިން މަޑުއްވަރީގައި އިމާރާތްކުރަނީ 2 ބުރީގެ އިމާރާތެކެވެ. ނަމަވެސް އެ ރަސްމިއްޔާތުގައި ކައުންސިލް އިދާރާގެ ކުރެހުމެއް، ނިންމާނެ ދުވަހެއް އަދި މަސައްކަތް ހަވާލުކުރި ހެކްސްޓަރގެ އެއްވެސް މީހަކު ރަސްމިއްޔާތުގައި ބައިވެރިވެފައި ނުވެއެވެ. އަދި އެހެން ރަށްރަށުގައި އިމާރާތްކުރާ އިމާރާތުގެ ވެސް އެއްވެސް މައުލޫމާތެއް ފެންނަން ނެތް އިރު މިނިސްޓްރީން ވެސް އެ މައުލޫމާތެއް ހާމަކޮށްފައިނުވެއެވެ.

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ނިންމެވި ނިންމެވުމާ ގުޅިގެން، ކޮންޓްރެކްޓަރ ފައިނޭންސް އުޞޫލުން 55 ރަށެއްގެ ކައުންސިލް އިދާރާ އަލުން ޢިމާރާތްކުރުމަށް މެލޭޝިއާގެ ކުންފުންޏެއް ކަމުގައިވާ "ހެކްސްޓަރ ގްލޯބަލް" އާއެކު އެއްބަސްވުމުގައި ވަނީ ސޮއިކޮށްފައެވެ.

މި މަޝްރޫޢުގެ ދަށުން ޢިމާރާތްކުރުމަށް ހަމަޖެހިފައިވާ 55 ކައުންސިލް އިދާރާގެ މަސައްކަތް ފެށި، އެ ޢިމާރާތްތަކުގެ ފަސޭހަކަން ކައުންސިލުތަކަށް ކުރިއަށް އޮތް އަހަރުތެރޭ ލިބިގެންދާނެ ކަމަށް އުންމީދު ކުރެވޭކަމަށް ސިޓީސް މިނިސްޓްރީން ބުނެއެވެ. ނަމަވެސް އެ ކުންފުންޏާއި މި މަސައްކަތް ހަވާލުކުރި އަގެއް އަދި ކުންފުނި ނެގި ގޮތެއްވެސް ހާމައެއް ނުކުރެއެވެ.

ހެކްސްޓަރ ގްލޯބަލްއަކީ މެލޭޝިއާގެ ކުންފުންޏެކެވެ. ހެކްސްޓާ ގްލޯބަލް ބެރްހާޑަކީ އެގްރޯކެމިކަލް އަދި ގަސްކާނާގެ އުފެއްދުންތައް އިމްޕޯޓްކޮށް ޑިސްޓްރިބިއުޓް ކުރުމަށް ޚާއްސަ ވިޔަފާރި ކުންފުންޏެކެވެ.

އެ ކުންފުނީގެ ޕްރޮފައިލްގައިވާގޮތުން އެ ކުންފުނިން މައިގަނޑު ގޮތެއްގައި ކުރަނީ 4 ބާވަތެއްގެ ވިޔަފާރިއެކެވެ. އެއީ ކެމިކަލް، ހަކަތަ އިންޑަސްޓްރިއަލް އަދި ކޮންސިއުމަރގެ ހިދުމަތެވެ.

ކެމިކަލްގެ ތެރޭގައި ހިމެނެނީ ދަނޑުވެރިކަމާއި ގުޅުންހުރި ކެމިކަލް، ޕަބްލިކް ހެލްތް، ހާއްސަ ބާވަތްތަކުގެ ކެމިކަލް، ރިސަރޗް އެންޑް ޑިވަލަޕްމަންޓް، ތެޔޮނަގާ މަސައްކަތަށް ހާއްސަ ކެމިކަލް، ސާފުކުރުން، ޕޮލީމަރ އަދި ލުބރިކަންޓްއެވެ.

މީގެ އިތުރުން ހަކަތައިގެ ތެރޭގައި ހިމެނެނީ ބައޯގޭސް ސިސްޓަމް އުފެއްދުމެވެ. އަދި އިންޑަސްޓްރިއަލްގެ ތެރޭގައި ހިމެނެނީ އިންސާނުންނާއި ނުލާ މެޝިން ބޭނުންކޮށްގެން މަސައްކަތް ކުރެވޭނެ ގޮތަށް ކަންކަން ފަރުމާކުރުމެވެ. އަދި ކޮންސިއުމަރ ބައިގައި ހިމެނެނީ ތާޒާ އަދި ގަނޑުކުރި ޑޫރިއަން މޭވާ ވިއްކުމެވެ.

ކުންފުނީގެ ޕްރޮފައިލްގައި ބުނެފައިވަނީ ހެލެކްސް ހޯލްޑިންގްސް ސީޑީއެން ބީޑީ އަކީ މެލޭޝިއާގައި 13 އޮކްޓޯބަރ 1990 ގައި ޕްރައިވެޓް ލިމިޓެޑް ކުންފުންޏެއްގެ ގޮތުގައި އުފެދިފައިވާ ކުންފުންޏެކެވެ. އޭގެ ފަހުން 11 ޖެނުއަރީ 2007 ގައި ޕަބްލިކް ލިމިޓެޑް ކުންފުންޏަކަށް ބަދަލުވެ، 16 ސެޕްޓެމްބަރ 2009 ގައި ބުރްސާ މެލޭޝިއާ ސެކިއުރިޓީޒް ބީއެޗްޑީގެ މައި މާކެޓުގައި ލިސްޓް ކުރުމަށް މަގުފަހިކޮށްދީފައިވާ ކަމަށެވެ. އަދި އެކުންފުންޏަކީ ޕްރިންސިޕަލްކޮށް އިންވެސްޓްމަންޓް ހޯލްޑިންގ ކުންފުންޏެކެވެ.

ހެކްސްޓާ ގްލޯބަލް ގްރޫޕްގެ ކުންފުނިތަކުން 1980 ވަނަ އަހަރު ފެށި ހެލެކްސް (އެމް) ސީޑީއެން ބީއެޗްޑީ އަކީ އެގްރޯކެމިކަލް އަދި ގަސްކާނާގެ އުފެއްދުންތައް އިމްޕޯޓްކޮށް ޑިސްޓްރިބިއުޓް ކުރުމަށް ޚާއްސަ ވިޔަފާރި ކުންފުންޏެކެވެ.