ދާންދޫ ދާއިރާގެ ޕީއެންސީ މެންބަރު ފަޒީލު ހައިދަރަށް ރުހުން ނުދިން

ދާންދޫ ދާއިރާގެ ޕީއެންސީ މެންބަރު މުހައްމަދު ފަޒީލް މިނިސްޓަރު ހައިދަރަށް ރުހުން ނުދިނެވެ.

ކެބިނެޓަށް ގެނައި ބަދަލާއެކު ހޯމަ ދުވަހު ބޭއްވި ރައްޔިތުންގެ މަޖިލީހުގެ ދައުރުން ބޭރު ޖަލްސާގައި ވަނީ 4 ވަޒީރަކަށް ރުހުންދޭން ވޯޓަށް އަހާފައެވެ.

ދައުރުން ބޭރުން ހޯމަ ދުވަހު ބޭއްވި ދެވަނަ ޖަލްސާގެ ބައްދަލުވުމުގައި ރުހުން ދޭން ފާސްކުރީ ފިނޭންސް މިނިސްޓަރު، މޫސާ ޒަމީރު އާއި ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު އާއި އެގްރިކަލްޗާ އެންޑް ވެލްފެއާ މިނިސްޓަރު، ޑރ. މަރިޔަމް މާރިޔާގެ އިތުރުން ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ މިނިސްޓަރު، ޑރ. އަބްދުﷲ މުއްތަލިބު އަށެވެ.

އެގޮތުން، ޕްލޭނިން އެންޑް ފިނޭންސް މިނިސްޓަރު ކަމަށް ޒަމީރު އައްޔަން ކުރުމަށް 67 މެންބަރުންގެ އަޣުލަބިއްޔަތުން ވަނީ ފާސްކޮށްފައެވެ.

ކޮންސްޓްރަކްޝަން، ހައުސިން އެންޑް އިންފްރާސްޓަކްޗާ މިނިސްޓަރު ކަމަށް މުއްތަލިބު އައްޔަން ކުރަން ފާސްކުރީ 69 މެންބަރުންގެ ވޯޓުންނެވެ. އަދި އެގްރިކަލްޗާ އެންޑް އެނިމަލް ވެލްފެއާ މިނިސްޓަރަކަށް މާރިޔާ އައްޔަންކުރަން ފާސްކުރީ 70 މެންބަރުންގެ ވޯޓުންނެވެ.

ހަޔާ އެޑިއުކޭޝަން ލޭބާ އެންޑް ސްކިލްސް މިނިސްޓަރު ކަމަށް ޑރ. ހައިދަރު އައްޔަން ކުރަން 64 މެންބަރުން ތާއިދުކުރިއިރު، ހަ މެންބަރަކު ވަނީ ދެކޮޅަށް ވޯޓު ދެއްވާފައެވެ. 

އެ 6 މެންބަރުންގެ ތެރޭގައި ޕީއެންސީއަށް ނިސްބަތްވާ ދާންދޫ ދާއިރާގެ މެމްބަރު މުޙައްމަދު ފަޒީލް ހިމެނެއެވެ.

މިއީ ހައިދަރަށް ރުހުން ހޯދަން މަޖިލީހަށް ހުށަހެޅި 3 ވަނަ ފަހަރެވެ.