ފެނިގެން ދަނީ ޕީއެންސީގެ ކޮންމެ ވެރިކަމެއްގައި އެމްއެންޑީއެފާއި ފުލުހުންނާއި މެދު އޮންނަ އިތުބާރު ނަގާލާ މަންޒަރު - މީކާއިލް
މި މަހުގެ 31ގައި އެމްޑީޕީން ބާއްވާ އެއްވުމަށް ވީހާވެސް ގިނަ ބަޔަކު ދިއުން މުހިންމުކަމަށް މީކާއިލް ވަނީ ވިދާޅުވެފަ
މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް ފަލަސުރުހީ ޕްރޮގްރާމްގައި ވާހަކަދައްކަވަނީ
ފެނިގެން ދަނީ ޕީއެންސީގެ ކޮންމެ ވެރިކަމެއްގައި އެމްއެންޑީއެފާއި ފުލުހުންނާއި މެދު އޮންނަ އިތުބާރު ނަގާލާ މަންޒަރުކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ވިދާޅުވެއްޖެއެވެ.
އޭނާ އެފަދައިން ވިދާޅުވި ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.
މީކާއިލް ވިދާޅުވީ ފާއިތުވި 5 އަހަރުގެ ތެރޭގައި ފުލުހުންނާއި ސިފާއިންނަށް އޮތް އިތުބާރު އިތުރުކުރުމަށް ކުރި މަސައްކަތް މި ސަރުކާރުގެ ސަބަބުން ފަހަތަށް ޖެހޭ މަންޒަރު މިހާރު ފެންނަކަމަށެވެ. އެކަން އެގޮތަށް ވާ ސަބަބަކީ ފުލުހުންނާއި ސިފައިންގެ އިތުބާރު ގެއްލޭ ގޮތަށް ސަރުކާރުން އެ އިދާރާތައް މެދުވެރިކޮށް ކަންކަން ކުރުވަމުން ދިއުން ކަމަށް މީކާއިލް ވިދާޅުވިއެވެ. މީކާއިލް ވިދާޅުވި ގޮތުގައި ހޯމް މިނިސްޓަރ އަލީ އިހުސާންގެ އިތުބާރު ނެތްކަމަށް ވެސް ހުށަހަޅަން ޖެހުނު އެއް ސަބަބަކީ އެއީއެވެ.
އެގޮތުން ރާއްޖޭގެ ތާރީހުގައި ހިންގި އެންމެ ބޮޑު އައިޑެންޓިޓީ ވައްކަން މި ސަރުކާރުން ކުރި އިރު އެކަން ހިނގިތަނުގައި މިނިސްޓަރ އިހުސާން ހުންނެވުމުގެ އިތުރުން އެ މައްސަލަ ބެލުމުގައި ފަހަތަށް ބުރަވާ ގޮތަށް ޢަމަލުކުރަމުންދާ ކަމަށް މީކާއިލް ވަނީ ފާހަގަކުރައްވާފައެވެ. މީކާއިލް އެފަދައިން ވިދާޅުވީ ޑީއެންއާރުގައި ހުރި މައުލޫމާތު ބޭނުންކޮށްގެން ވަގަށް ޕީއެންސީ އަށް މެމްބަރުންތަކެއް ވައްދާފައިވާ މައްސަލައިގައެވެ. އަދި ވަކި ބަޔަކަށް ނާޖާއިޒް މަންފާ ލިބޭ ގޮތަށް ރާއްޖޭގެ އެކްސްޕެޓް ސިސްޓަމްގެ މަސައްކަތް ބަޔަކާ ހަވާލުކުރުމަކީ ވެސް އިހުސާންގެ އިތުބާރުގެއްލޭ ސަބަބެއް ކަަމަށް މީކާއިލް ވަނީ ވިދާޅުވެފައެވެ. ހަމައެހެންމެ ފުލުހުންގެ އިދާރާއިން ތަހުގީގުކުރަމުންދާ މައްސަލަތަކަށް ސަރުކާރުން އިންތިހާއަށް ނުފޫޒު ފޯރުވާކަމަށް އޭނާ ވަނީ ސިފަކުރައްވާފައެވެ.
އެގޮތުން ފުލުހުންގެ އެޗްޑީސީ އާއި މެދު ކުރެވޭ ޚިޔާނާތުގެ ތުހުމަތުތައް ބެލުމުގައި އެ އިދާރާއިން އަމަލުކުރީ ސުވާލު އުފެދޭ ގޮތަށް ކަމަށް މީކާއިލް ވަނީ ވިދާޅުވެފައެވެ. މީކާއިލް ވަނީ މިއީ ހަމައެކަނި މި ވެރިކަމުގައި ހިނގާ ކަމެއް ނޫން ކަަމަށާއި މިއީ ޕީއެންސީ އާއި ޕީޕީއެމްގެ ފިކުރާއި ގުޅިފައިވާކަމެއް ކަމަށް ވިދާޅުވެފައެވެ.
މީކާއިލް ވިދާޅުވީ މި ވެރިކަމުގައި ނުރަނގަޅުކޮށް ހިނގާފައިވާ ހުރިހާ ކަމެއް ސީދާ ރައީސްގެ ބެލުމުގެ ދަށުން ހިނގާފައިވާ ކަންކަންކަމަށް ޤަބޫލުކުރައްވާ ކަމަށެވެ. އެގޮތުން ދައުލަތުގެ ވަސީލަތްތައް ބޭނުންކޮށްގެން ނާޖާއިޒް މަންފާ ހޯދުމާއި ތަހުގީގަަށް ހުރަސް އެޅުން ފަދަ އެތައް ކަމެއް މި ސަރުކާރުން ފާޅުކަން ބޮޑު ގޮތެއްގައި ކުރަމުންދާ ކަަމަށް މީކާއިލް ވަނީ ވިދާޅުވެފައެވެ.
މީގެ އިތުރުން ޤާނޫނުއަސާސީގެ ދިފާއުގައި އެމްޑީޕީން ކުރަމުންދާ މަސައްކަތުގެ ތެރެއިން ހިންގާ ދޮރުން ދޮރަށް ހަރަކާތްތަކުން ސަރުކާރުގެ މިފަދަ ޢަމަލުތަކާއި މެދު އާއްމުން މާޔޫސްވެފައިވާ މިންވަރު ފެނިގެންދާ ކަމަށް މީކާއިލް ވަނީ ވިދާޅުވެފައެވެ. އެހެންކަމުން އެ އަޑުތައް ސަރުކާރަށް އިއްވުމަށް މި މަހުގެ 31ގައި އެމްޑީޕީން ބާއްވާ އެއްވުމަށް ވީހާވެސް ގިނަ ބަޔަކު ދިއުން މުހިންމުކަމަށް މީކާއިލް ވަނީ ވިދާޅުވެފައެވެ.
