ބްލިންކަން އަކީ މުޖުރިމެއް ކަމަށް ގޮވުމުން ބާރުގެ ބޭނުން ކޮށްގެން ބިޑިއަޅުވައިގެން ނޫސްވެރިއަކު ނެރެފި

ޣައްޒާ ގައި އިސްރާއީލުން ހިންގަމުންދާ ނަސްލު ނައްތާލުމުގެ ޖަރީމާގައި އެމެރިކާ ބައިވެރިވާކަން ހާމަކޮށް ބްލިންކަން އަކީ މުޖުރިމެއް ކަމަށް ގޮވުމުން ޚާރިޖީ ވަޒީރުގެ ނޫސްވެރިންގެ ބައްދަލުވުމަކުން އެމެރިކާގެ ތަޖުރިބާކާރު ނޫސްވެރިއެއް ކަމުގައިވާ ސޭމް ހުސެއިނީ ފުލުހުން އަނިޔާވެރިކަމާއެކު ގަދަކަމުން ނެރެފިއެވެ.

ބުރާސްފަތި ދުވަހުގެ ރޭ، ވޮޝިންގްޓަންގެ ޚާރިޖީ ސިޔާސަތަށް ދިގު މުއްދަތަކަށް ފާޑުކިޔަމުން އައި މިނިވަން ނޫސްވެރިއެއް ކަމުގައިވާ ހުސެއިނީ، ބިޑި އަޅުވައިގެން ނެރުނީ ޚާރިޖީ ވަޒީރު ކަމުގަައި ބްލިންކަން ބޭއްވެވި އެންމެ ފަހު ނޫސްވެރިންގެ ބައްދަލުވުމުގައެވެ.  

"ކުށްވެރިޔާ! ކީއްވެގެންތޯ މަނިކުފާނު ހޭގްގައި ނުހުންނެވީ،" ހުސެއިނީ ހަރުއަޑުން ގޮވާފައިވެއެވެ. ހޭގް އަކީ ބައިނަލްއަޤްވާމީ ޖިނާއީ ކޯޓު ހުންނަ ތަން ކަމަށް ވެސް ބްލިންކަން އަށް އިޝާރާތްކޮށް ހުސެއިނީ ބުންޏެވެ.

"މަނިކުފާނު މިނިވަން ނޫސްވެރިކަމަކާ މެދު ވާހަކަދައްކަވަނީ!" ހުސެއިނީ ބްލިންކެނަށް އަމާޒުކޮށް ބުންޏެވެ.

ބްލިންކަންގެ ޚާރިޖީ ވަޒީރު ކަމުގެ މަގާމު ހޯމަ ދުވަހު ނިމުމަކަށް އަންނާނެއެވެ. އެއީ އެމެރިކާގެ ރައީސް ކަމަށް އިންތިޚާބުވެފައިވާ ޑޮނަލްޑް ޓްރަމްޕްގެ އައު ސަރުކާރު އެ ދުވަހު ފެށުމަށް ހަމަޖެހިފައިވުމާއެކުގައެވެ.

އެމެރިކާގެ އެންމެ އިސް ޑިޕްލޮމެޓް ބުދަ ދުވަހު ރައީސް ޖޯ ބައިޑެން އިޢުލާންކުރެއްވި ޣައްޒާގެ ހަނގުރާމަ ހުއްޓާލުމުގެ އެއްބަސްވުމަށް ތައުރީފް ކުރައްވާ ވާހަކަފުޅު ދައްކަވަމުން ގެންދެވި މި ނޫސް ކޮންފަރެންސް ގައި ހުސެއިނީ ބުނީ އޭނާ ބްލިންކަން އަށް ސުވާލު މި ކުރަނީ، އޭނާގެ ސުވާލުތަކަށް ބްލިންކަން ޖަވާބު ނުދެއްވާނެ ކަމަށް ސްޓޭޓް ޑިޕާޓްމަންޓުގެ ތަރުޖަމާނު ބުނެފައި އޮތުމުން ކަމުގައެވެ.

ބްލިންކެން ހުސެއިނީ އަށް ވިދާޅުވަމުން ގެންދެވީ "ޕްރޮސެސްއަށް އިޙްތިރާމްކުރުމަށް" އަދި އޭނާ އަށް ސުވާލުކުރުމުގެ ފުރުޞަތު ލިބޭނެ ކަމަށެވެ.

"އެމްނެސްޓީ އިންޓަރނޭޝަނަލް އިން ފެށިގެން އައިސީޖޭ [އިންޓަރނޭޝަނަލް ކޯޓް އޮފް ޖަސްޓިސް] އާ ހަމައަށް އެންމެން ބުނަމުންދަނީ ނަސްލު ނައްތާލުމާއި މުޅިން ނެތިކޮށްލުމުގެ ޢަމަލުތައް އިސްރާއީލުން ހިންގަމުންދާ ކަމަށް، އެކަމަކު މަނިކުފާނު އަޅުގަނޑަށް ތިޔަ އަންގަވަނީ ޕްރޮސެސް އަށް އިޙްތިރާމްކުރުމަށްތޯ؟" ހުސެއިނީ ޖަވާބުގައި ބުނަމުން ދިޔައެވެ.

"ކުށްވެރިޔާ! ކީއްވެގެންތޯ މަނިކުފާނު ހޭގްގައި ނުހުންނެވީ! ކީއްވެގެންތޯ މަނިކުފާނު ހޭގްގައި ނުހުންނެވީ! ކީއްވެގެންތޯ މަނިކުފާނު ހޭގްގައި ނުހުންނެވީ!" އުރުދުން-ފަލަސްތީނު ދަރިކޮޅަށް ނިސްބަތްވާ ނޫސްވެރިޔާ ހަރުއަޑުން ގޮވަމުން ދިޔައެވެ.

ފުލުހުން ވަނީ އޭނާ މާލަމުން ނެރެފައެވެ.

މި ހާދިސާ އަށް ފަހު ހުސެއިނީ އެކްސްގައި ކޮށްފައިވާ ޕޯސްޓެއްގައި އޭނާ ބުނީ "ސުވާލުތަކެއް ކުރަން މަސައްކަތްކުރި" ކަމަށާއި އޭގެ ފަހުން "ބިޑި އަޅުވައިގެން ނެރުނީ" ކަމަށެވެ.

"ބާރުގެ ބޭނުން މާ ބޮޑަށް ކޮށްފައިވަނީ،" އޭނާ އިތުރަށް ބުނެފައިވެއެވެ.

ހުސެއިނީ ނެރުމުގެ ކުޑައިރުކޮޅެއް ކުރިން، ބްލޫމެންތާލް ކިޔާ ނޫސްވެރިއަކު ވެސް ބްލިންކަންގެ ވާހަކަފުޅުގެ މެދުތެރެއިން "މޭ މަހު އެއްބަސްވުމެއް ހޯދުނު އިރު ކީއްވެގެންތޯ މަނިކުފާނު ބޮންތައް ފޮނުވަމުން ގެންދެވީ؟" ބްލިންކަން އަށް ސުވާލު ކުރިއެވެ.

"ކީއްވެގެންތޯ މަނިކުފާނު އަޅުގަނޑުމެންގެ އަޚުންގެ ގެތައް ޣައްޒާގައި ފުނޑުފުނޑު ކުރަން ދޫކޮށްލެއްވީ؟" ގްރޭޒޯންގެ އެޑިޓަރު ކަމުގައިވާ ބްލޫމެންތާލް ބްލިންކަން އަށް ދެންނެވިއެވެ. ގްރޭޒޯން އަކީ އެމެރިކާގެ ބޭރުގެ ސިޔާސަތުގެ ގިނަ ކަންތައްތަކަށް ވަރަށް ބޮޑަށް ފާޑުކިޔާ ނޫހެކެވެ. އޭނާވެސް ނޫސް ކޮންފަރެންސުން ނެރުނެވެ.

އެމެރިކާއާއި އެ ގައުމުގެ ހުޅަނގުގެ އެކުވެރިންގެ އެހީތެރިކަމާއެކު، އިސްރާއީލުން ޣައްޒާ ގެ ހަނގުރާމަ އިޢުލާންކުރީ 7 އޮކްޓޯބަރު 2023 ގައެވެ.

އިސްރާއީލުގެ ލޭއޮހޮރުވާ ހަމަލާތަކުގެ ސަބަބުން މިހާތަނަށް މަދުވެގެން 46,788 ފަލަސްތީނު މީހުން ޝަހީދުވެފައިވެއެވެ. އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ. އަދި 110,450 މީހުން ޒަޚަމްވެފައިވެއެވެ. އަދި އެތައް ހާސް މީހުން ވަނީ ގެއްލިފައެވެ. އަދި އެމީހުން ވާނީ ސުންނާފަތި ކުރި ޢިމާރާތްތަކުގެ ތެރޭގައި މަރުވެފައި ކަމަށް ލަފާކުރެވެއެވެ.

ނޮވެމްބަރު 21 ވަނަ ދުވަހު، ބައިނަލްއަޤްވާމީ ޖިނާއީ ކޯޓުން (އައިސީސީ) އިން ވަނީ އިސްރާއީލުގެ ބޮޑުވަޒީރު ބެންޖަމިން ނެތަންޔާހޫ އާއި ކުރީގެ އަސްކަރީ ކަންކަމުގެ ވަޒީރު ޔޯވް ގަލަންޓްގެ މައްޗަށް ޣައްޒާ ގައި ހިންގި ހަނގުރާމައިގެ ކުށްތަކާއި އިންސާނިއްޔަތާ ދެކޮޅު ކުށްތަކަށް ހައްޔަރު ކުރުމުގެ އަމުރު ނެރެފައެވެ.