އަންޗެލޮޓީ ބުނީ އިތުރު ވަގުތުގައި ރެއާލުން ރިއެކްޓު ކުރީ ރަނގަޅަށް ކަމަށް

ކޮޕާ ޑެލް ރޭ ފުޓުބޯޅަ މުބާރާތުގެ ގަދަ 16 ވަނަ ބުރުގައި ސެލްޓަ ވީގޯއާ ދެކޮޅަށް ކުޅުނު މެޗުގެ އިތުރު ވަގުތުގައި، ރެއާލް މެޑްރިޑުގެ ކުޅުންތެރިން ރިއެކްޓު ކުރީ ރަނގަޅަށް ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފި އެވެ.

ރެއާލްގެ އަމިއްލަ ދަނޑުގައި ކުޅުނު އެ މެޗު އެ ޓީމުން ކާމިޔާބު ކުރީ 5-2 އިންނެވެ. މެޗުގައި ރެއާލުން ދެ ލަނޑު ޖަަހައި ކުރި ހޯދާފައި ވަނިކޮށް، ސެލްޓަ އިން ވަނީ ފަހަތުން އަރައި ދެ ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ. ފުރިހަމަ ވަގުތު ހަމަވީއިރު ދެ ޓީމު އެއްވަރުވެފައި އޮތުމުން، އިތުރު ވަގުތުގެ ގޮތުގައި ކުޅުނު ދެ ހާފުގައި ރެއާލުން ވަނީ ތިން ލަނޑު ޖަހައިގެން މެޗުން މޮޅުވެފަ އެވެ.

އެ މެޗަށް ފަހު ވާހަކަ ދައްކަމުން އަންޗެލޮޓީ ބުނީ މެޗުގެ 70 ވަނަ މިނެޓުގެ ފަހުން ރެއާލަށް ގޯސްތަކެއް ހެދުނު ކަމަށެވެ. އޭގެ ނަތީޖާ އަކަށްވީ، މެޗު ނިމެން ކުޑަތަން ވެފައި ވަނިކޮށް، ސެލްޓަ ވީގޯ އިން ދެ ލަނޑު ޖެހުން ކަަމަށް އަންޗެލޮޓީ ބުންޏެވެ. އެއާއެކު އިތުރު ވަގުތުގެ ދެ ހާފު ކުޅެން ޖެހުނުއިރު، އެ ހާފުގައި ރެއާލުން ރިއެކްޓު ކޮށްފައި ވަނީ ރަނގަޅަށް ކަމަށް ވެސް އަންޗެލޮޓީ ބުންޏެވެ.

އަންޗެލޮޓީ ބުނީ ސެލްޓަ ވީގޯ އިން ދެ ލަނޑު ޖެހުމުގައި ބޮޑަށް ފާހަގަވާން ހުރީ ރެއާލަށް ހެދުނު ގޯސްތަކެއް ކަމަށެވެ. އަދި އެއީ އެ ކަހަލަ މެޗުތަކެއްގައި ހަދަން ވާނެ ވަރުގެ ގޯސްތަކެއް ނޫން ކަމަށް ވެސް އޭނާ ބުންޏެވެ. ކުރިއަށް އޮތް ތަނުގައި ރެއާލުން އެކަމަށް ޚާއްސަ ސަމާލުކަމެއް ދީގެން ފަރިތަކުރާނެ ކަމަށާއި، އަބަދު ވެސް ބަލަން ވާނީ ގޯހެެއް ނުހަދައި މެޗު ނިންމާލުމަށް ކަމަށް އޭނާ ބުނެފައިވެ އެވެ.

ރެއާލުން ކޮޕާ ޑެލް ރޭގެ ކުއާޓާ ފައިނަލް އިން ފުރުސަތު ހޯދާފައިވާއިރު، އެ ޓީމުން ވަނީ މިހާތަނަށް 20 ފަހަރެއްގެ މަތިން އެ މުބާރާތް ކާމިޔާބު ކޮށްފަ އެވެ.