ފެނިގެން ދަނީ އޮޅުވާލާ ރައްޔިތުން ގުނބޯ ހައްދަވައިގެން ރައީސް މުއިއްޒު މަޤާމްތައް ހޯއްދަވާ މަންޒަރު ކަމަށް ރައްޔިތުންގެ މަޖިލީހުގެ ހުޅުމާލެ ދާއިރާގެ ކުރީގެ މެމްބަރު އަލީ ނިޔާޒް ވިދާޅުވެއްޖެއެވެ.
އެނާ އެފަދައިން ވިދާޅުވީ "ފުދިއްޖެ، ފުނޑިއްޖެ" ކަވަރޭޖްގައި ވާހަކަދައްކަވަމުންނެވެ.
އޭނާ ވިދާޅުވީ ރައީސް މުއިއްޒު އަށް އާއްމުންގެ އިތުބާރު ގެއްލިފައިވާ ކަމަށެވެ. ސަބަބަކީ މަޤާމުތަކަށް ވަޑައިގެން ޢަމަލުކުރައްވާ ގޮތް ކަމަށް އޭނާ ވިދާޅުވިއެވެ. މާލޭގައި ހުރި މައްސަލަތަކަށް ހައްލު ނުލިބި ހުރިކަން ފާހަގަކުރައްވާ ނިޔާޒް ވިދާޅުވީ މާލޭގެ ކަންކަން ހައްލުކުރުމަށް ނިމިދިޔަ 7 އަހަރު އެންމެ އިސްކޮށް ހުންނެވި ބޭފުޅަކީ ރައީސް ޑރ.މުހައްމަދު މުއިއްޒު ކަމަށް ނިޔާޒް ވިދާޅުވިއެވެ. އެގޮތުން ހައުސިން މިނިސްޓަރކަމުގައި ހުންނެވި އިރު ރައްޔިތުންނާއި ގުޅުން ހުރި ކަންކަން ނިންމުމުގެ ބާރު، ކައުންސިލްގެ އިހްތިޞާސްގެ ދަށުން ނަގާ އެ ކަންކަމުގެ ބާރު ވުޒާރާގެ ދަށަށް މުއިއްޒު ބަދަލުކުރައްވާފައިވާ ކަމަށް ނިޔާޒް ވިދާޅުވިއެވެ. އަދި ހައުސިންގ މިނިސްޓަރަކަށް ހުންނަވައިގެން މުއިއްޒު މާލޭގެ މަގުތައް ހެދުމުގެ މަސައްކަތް މުއިއްޒު ކުރައްވާފައިވާ ކަމަށާއި އެކަން ވެސް ރަނގަޅަށް ކުރައްވާފައި ނުވާ ކަމަށް ނިޔާޒް ވިދާޅުވިއެވެ. އަދި އާއްމުން އިތުބާރުކޮށް މާލޭގެ މޭޔަރކަން ހަވާލުކުރުމުން މާލޭގެ ކުރިއެރުމަށް މުއިއްޒު މަސައްކަތްކުރައްވާފައިވާ ނުވާކަމަށް އޭނާ ވިދާޅުވިއެވެ. މާލޭގައި ހުރި މައްސަލަތައް ހައްލުކުރަން ހަވާލުކުރުމުން ރައީސް މުއިއްޒު ވަނީ މީގެ ކުރިން ވެސް އާއްމުންނަށް އޮޅުވާލާފައި ކަމަށް އޭނާ ވަނީ ވިދާޅުވެފައެވެ.
އެ ކަވަރޭޖްގައި ވާހަކަދައްކަވަމުން ރައްޔިތުންގެ މަޖިލީހުގެ އިހަވަންދޫ ދާއިރާގެ ކުރީގެ މެމްބަރު އަހުމަދު އަބްދުﷲ ވެސް ވަނީ ރައީސް މުއިއްޒުގެ ބަހާއި އަމަލާއި ދިމާނުވާކަމަށް ފާހަގަކުރައްވާ ކަމަށެވެ. އެގޮތުން ވަޒީފާއިން މީހުން ވަކި ނުކުރާނެ ކަމަށް ވިދާޅުވި ވާހަކަ އާއި ގޯއްޗާއި ފްލެޓް ދިން ތަނަކުން ދިން ގޮތަކަށް ދެއްވާނެ ކަމަށް ވިދާޅުވެ ވީ ވައުދު ނުފުއްދާ ކަމަށް އޭނާ ވިދާޅުވިއެވެ. މިއަދު ރައްޔިތުންގެ ޖީބުތައް ހުސްވެފައިވާ ކަމަށާއި ރައްޔިތުންނަކީ ރައީސް މުއިއްޒުގެ ކުރިމަތީގައި އެއްވެސް ބަޔަކަށް ނުވާ ކަމަށް ވެސް އޭނާ ވަނީ ވިދާޅުވެފައެވެ. ރައްޔިތުންނަށްޓަކާ ވެވަޑައިގެންނެވި އެއްވެސް ވައުދެއް ރައީސް މުއިއްޒު ނުފުއްދަވާކަމަށް އޭނާ ވަނީ ވިދާޅުވެފައެވެ. މީގެ އިތުރުން 2024 ވަނަ އަހަރުގެ ބަޖެޓާއި ސަޕްލިމެންޓްރީ ބަޖެޓް ހުސްކޮށްލި އިރު އެއްވެސް މަޝްރޫޢު އެއް ނުހިންގޭ ކަމަށް ފާހަގަކުރައްވާ އެއީ ވަރަށް ބޮޑު ކަންބޮޑުވުމެއް ކަމަށް އޭނާ ވަނީ ވިދާޅުވެފައެވެ.
އެ ދެ ބޭފުޅުން ވަނީ އާއްމުންގެ އަޑު ސަރުކާރަށް އިއްވަންވީ ވަގުތު އައިސް ޖެހިފައިވާ ކަމަށް ފާހަގަކުރައްވާފައެވެ. އެހެންކަމުން މި މަހު 31ގައި ބާއްވާ އެއްވުމަށް ވީހާވެސް ގިނަ ބަޔަކު އައުމަށް އެ ފަރާތްތަކުން ވަނީ ގޮވާލާފައެވެ. ގާނޫނު އަސާސީގެ ދިފާއުގައި އެމްޑީޕީން މަގުމައްޗަށް ނުކުންނަން އެ ޕާޓީގެ ގައުމީ މަޖިލީހުން ފާސްކުރީ 9 ޖެނުއަރީ 2025ގައެވެ. އިދިކޮޅު މައި ސިޔާސީ ޕާޓީ، އެމްޑީޕީން މަގުމައްޗަށް ނުކުންނަން ފާސްކުރީ އެ ޕާޓީން ބޭއްވި ގައުމީ މަޖިލީހަށް ހުށަހަޅައި ފާސްކޮށްގެންނެވެ. މި ބައްދަލުވުމުގައި ރިޔާސަތުން ހުށަހެޅީ 31 ޖެނުއަރީގައި "ގާނޫނުއަސާސީގެ ދިފާއުގައި" މަގުމައްޗަށް ނުކުތުމަށެވެ.
