މާޒިޔާގެ އައު ކޯޗަކަށް ސްޕެއިންގެ ލުއިސްމާ
ލުއިސްމާ ވަނީ މީގެ ކުރިން ސްޕެއިންގެ ގަދަ ދެ ބާރު ކަމަށްވާ ބާސެލޯނާގެ އަދި ރެއާލްގެ މެޑްރިޑުގެ ބައެއް ޕްރޮޖެކްޓުތަކުގަައި ވެސް މަސައްކަތް ކޮށްފަ އެވެ.
މާޒިޔާގެ ކޯޗަކަށް ހަމަޖެއްސި ލުއިސްމާ ހެނާންޑޭޒް
ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަންގެ ކޯޗަކަށް، ސްޕެއިންގެ ތަޖުރިބާކާރު ކޯޗު ލުއިސްމާ ހެނާންޑޭޒް ހަމަޖައްސައިފި އެވެ.
އަންގާރަ ދުވަހު މާޒިޔާ އިން ވަނީ، އުމުރުން 52 އަހަރުގެ ލުއިސްމާ އެ ކުލަބުގެ ކޯޗަކަށް ހަމަޖައްސައި، ރަސްމީކޮށް އެއްބަސްވުމުގައި ސޮއި ކޮށްފަ އެވެ. އެކަމަށްޓަަކއި ގަލޮޅު ރަސްމީ ދަނޑުގައި މާޒިޔާ އިން ވަނީ ޚާއްސަ ރަސްމިއްޔާތެއް ވެސް ބާއްވައިފަ އެވެ.
ލުއިސްމާ ވަނީ މީގެ ކުރިން ސްޕެއިންގެ ގަދަ ދެ ބާރު ކަމަށްވާ ބާސެލޯނާގެ އަދި ރެއާލްގެ މެޑްރިޑުގެ ބައެއް ޕްރޮޖެކްޓުތަކުގަައި ވެސް މަސައްކަތް ކޮށްފަ އެވެ. އެންމެ ފަހުން ލުއިސްމާ މަސައްކަތް ކޮށްފައި ވަނީ ލިތުއޭނިއާގެ ދެ ވަނަ ޑިވިޝަންގެ ކުލަބެއްގަ އެވެ. އޭގެ ކުރިން އޭނާ ވަނީ އުޒްބަކިސްތާން އަދި ކުވެއިތުގެ ކުލަބުތަކުގައި ވެސް މަސައްކަތް ކޮށްފަ އެވެ.
ލުއިސްމާގެ ކުރިން މާޒިޔާގެ ކޯޗުކަމުގެ މަގާމުގައި ހުރީ ސާބިއާގެ ޑްރަގަން ޑުކަނޯވިޗް އެވެ. މާޒިޔާގެ ކޯޗުކަމާ ޑުކަނޯވިޗް ހަވާލުވީ މިދިޔަ އަހަރުގެ އޯގަސްޓު މަހުގެ ތެރޭގަ އެވެ. އޭނާ އާއެކު މާޒިޔާ އިން ހެދި އެއްބަސްވުން ހަމަވުމުން، މާޒިޔާ އިން ވަނީ އެ ޓީމުގެ ކޯޗަކަށް ލުއިސްމާ ހަމަޖައްސައިފަ އެވެ. ލުއިސްމާގެ އިރުޝާދުގެ ދަށުން ކުރިއަށް އޮތް ދުވަސްތަކުގެ ތެރޭގައި މާޒިޔާގެ ފަރިތަކުރުންތައް ފަށާއިރު، އޭނާގެ އިރުޝާދުގެ ދަށުން މާޒިޔާ ކުޅޭ ފުރަތަމަ މުބާރާތަށް ވާނީ ފެބްރުވަރީ މަހު ފަށަން ތާވަލްކޮށްފައިވާ ޕްރެޒިޑެންޓްސް ކަޕް މުބާރާތެވެ.
