މައިންޒް ބަލިކޮށް، ލެވަކޫސަން ދެ ވަނައިގައި

ޖަރުމަނު ލީގުގައި މައިންޒާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބަޔާ ލެވަކޫސަން އިން ލީގު ރޭހުގައި ވިއްދައިފި އެވެ.

ލެވަކޫސަންގެ އަމިއްލަ ދަނޑުގައި އަންގާރަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ. މެޗުގައި ލެވަކޫސަން އިން ލަނޑު ޖެހީ ދެ ވަނަ ހާފުގަ އެވެ. ޖުމުލަ ގޮތެއްގައި ލެވަކޫސަން އިން ރަނގަޅަށް ކުޅުނު މި މެޗުގައި އެ ޓީމުން ވަނީ ލަނޑު ޖަހާނެ ފުރުސަތުތަކެއް ވެސް ތަނަވަސްކޮށްފަ އެވެ.

މެޗު ފަށައިގެން ކުރީ ކޮޅު ލެވަކޫސަންގެ ޕެޓްރިކް ޝިކް މައިންޒުގެ ގޯލު ކުރި މައްޗަށް ހުރަސްކޮށްދިން ބޯޅަ އެ ޓީމުގެ ޑިފެންޑަރަކު ވަނީ ސަލާމަތްކޮށްފަ އެވެ. އޭގެ ފަހުން ލެވަކޫސަންގެ ފްލޯރިއަން ވާޓްޒް ފޮނުވާލި ބޯޅަ ދިޔައީ، ގޯލުގެ އަރިމަތީ ދަނޑި ކައިރިން ބޭރަށެވެ. މެޗުގެ ދެ ވަނަ ހާފު ފަށައިގެން ދެ ވަނަ މިނެޓުގައި ލެވަކޫސަނަށް ލީޑު ނަގައިދިނީ އެލެކްސް ގްރިމާލްޑޯ އެވެ. ލެވަކޫސަނަށް ލިބުނު ހިލޭ ޖެހުމެއްގައި އޭނާ ފޮނުވާލި ބޯޅަ އަމާޒުވީ ގޯލުގެ މަތީ ކަނަށެވެ.

މޮޅާއެކު ލެވަކޫސަން ދެ ވަނައިގައި އޮތީ މިހާތަނަށް އެ ޓީމު ކުޅެފައިވާ 17 މެޗުން 38 ޕޮއިންޓާާ އެކު އެވެ. އެއް ވަނައިގައި އޮތް ވާދަވެރި ބަޔާން މިއުނިކަށް 39 ޕޮއިންޓު ލިބެނީ ލެވަކޫސަނަށް ވުރެ އެއް މެޗު މަދުން ކުޅެގެންނެވެ. މެޗުގެ އަދަދު ހަމަކޮށް، ލީޑު ފުޅާ ކުރުމުގެ ފުރުސަތު ބަޔާނަށް އޮންނާނެ އެވެ.