ވެރޯނާ ބަލިކޮށް، ނަޕޯލީން އެއް ވަނައިގައި

އިޓާލިއަން ލީގުގައި ހެލާސް ވެރޯނާއާ ދެކޮޅަށް ކުޅުނު މެޗުން މޮޅުވެ، ނަޕޯލީން އެއް ވަނައިގައި ހަތަރު ޕޮއިންޓުގެ ލީޑެއް ނަގައިފަ އެވެ.

ނަޕޯލީގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި ނަޕޯލީން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗު ފަށައިގެން ފަސް ވަނަ މިނެޓުގައި ނަޕޯލީ އަށް ލީޑު ލިބުނީ ވެރޯނާގެ ގޯލު ކީޕަރު ލޮރެންޒޯ މޮންޓިޕޯ އަތުން ބައި ކޮޅަށް ވަތް ލަނޑުންނެވެ. އޭގެ ފަހުން ވެސް ފުރަތަމަ ހާފުގައި ނަޕޯލީން ވަނީ ލަނޑު ޖަހާނެ ފުރުސަތުތަކެއް ތަނަވަސްކޮށްފަ އެވެ. މެޗުގެ ދެ ވަނަ ހާފުގައި ނަޕޯލީގެ ދެ ވަނަ ލަނޑު ޖެހީ އަންދްރޭ ފްރޭންކް ޒަމްބޯ އަގިސާ އެވެ. އޭނާ އެ ލަނޑު ޖެހީ ރޮމެލޫ ލުކާކޯ ތަނަވަސްކޮށްދިން ފުރުސަތެއްގަ އެވެ.

މޮޅާއެކު ނަޕޯލީ އެއް ވަނައިގައި އޮތީ މިހާތަނަށް އެ ޓީމު ކުޅެފައިވާ 20 މެޗުން 47 ޕޮއިންޓާ އެކު އެވެ. ނަޕޯލީ އަށް ވުރެ ދެ މެޗު މަދުން ކުޅެގެން، ދެ ވަނައިގައި އިންޓަރ މިލާން އަށް ލިބެނީ 43 ޕޮއިންޓެވެ. ތިން ވަަނައިގައި އެޓަލަންޓާ އަށް 42 ޕޮއިންޓު ލިބެނީ 19 މެޗުންނެވެ.