ޑެމްބެލޭގެ ދެ ލަނޑުން މޮޅުވެ، ޕީއެސްޖީން ލީޑު ފުޅާ ކޮށްފި

ފްރާންސް ލީގުގައި ސެއިންޓް އެޓިއެންއާ ދެކޮޅަށް ކުޅުނު މެޗުން މޮޅުވެ، ޕެރިސް ސެއިންޓް ޖާމަން (ޕީއެސްޖީ) އިން އެއް ވަނައިގައި ލީޑު ފުޅާ ކޮށްފި އެވެ.

ޕީއެސްޖީގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗު ޕީއެސްޖީން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފުގައި ޕީއެސްޖީން ވަނީ ދެ ލަނޑު ޖަހައި ކުރި ހޯދައިފަ އެވެ. މެޗުގައި ސެއިންޓް އެޓިއެން އިން ލަނޑު ޖެހީ ދެ ވަނަ ހާފުގަ އެވެ.

މެޗު ފަށައިގެން 13 ވަނަ މިނެޓުގައި ޕީއެސްޖީ އަށް ލީޑު ނަގައިދިނީ ފްރާންސްގެ އޮސްމާން ޑެމްބެލޭ އެވެ. އޭނާ އެ ލަނޑު ޖެހީ ލީ ކަން އިން ތަނަވަސްކޮށްދިން ފުރުސަތެއްގަ އެވެ. އޭގެ ފަހުން މެޗުގެ 23 ވަނަ މިނެޓުގައި ޕީއެސްޖީގެ ދެ ވަނަ ލަނޑު ޖެހީ ވެސް ޑެމްބެލޭ އެވެ. އެއީ އެ ޓީމަށް ލިބުނު ޕެނަލްޓީ ކާމިޔާބުކޮށްގެން ޑެމްބެލޭ ޖެހި ލަނޑެކެވެ.

މެޗުގެ ފުރަތަމަ ހާފުގައި ޕީއެސްޖީގެ ތިން ވަނަ ލަނޑެއް ބާޑްލޭ ބާކޮލާ ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަލައި ނުގަންނަން ނިންމައިފަ އެވެ. މެޗުގައި ޕީއެސްޖީން އިތުރު ލަނޑު ޖަހާނެ ފުރުސަތުތަކެއް ވެސް ތަނަވަސްކުރި އެވެ. މެޗުގައި ސެއިންޓް އެޓިއެންގެ ލަނޑު 64 ވަނަ މިނެޓުގައި ޖެހީ ޒުރިކޯ ޑަވިޓާޝްވިލީ އެވެ.

މޮޅާއެކު ޕީއެސްޖީން ވަނީ އެއް ވަނައިގައި ހަތް ޕޮއިންޓުގެ ލީޑެއް ނަގައިފަ އެވެ. މިހާތަނަށް ލީގުގައި ކުޅެފައިވާ 17 މެޗުން ޕީއެސްޖީ އަށް ލިބެނީ 43 ޕޮއިންޓެވެ. ހަމަ އެ އަދަދަށް މެޗު ކުޅެގެން ދެ ވަނައިގައި މާސޭ އަށް ލިބެނީ 36 ޕޮއިންޓެވެ.