ރަޝިޔާ އިން 51،000 ށް ވުރެ ގިނަ ގައިޑެޑް ބޮން ޔޫކްރެއިނަށް އަޅައިފި ކަމަށް އެ ގައުމުން ބުނެފި
ޔުކްރެއިންގެ އޮފިޝަލުން ބުނާ ގޮތުގައި ފްރަންޓް ލައިނަށާއި، ރަޝިޔާ އާ އިންވެގެން އޮންނަ ސަރަޙައްދުތަކަށް އެންމެ ގިނައިން ހަމަލާ ދެނީ މި ހަތިޔާރު ބޭނުން ކޮށްގެންނެވެ.
2024 މާރޗް 8 - ރަޝިޔާގެ އެސްޔޫ-34 ބޮން އަޅާ ބޯޓަކުން ހައި ޕްރެސިޝަން ގައިޑެންސް އާއި އެކު އެފްއޭބީ-500 ބޮން ޔޫކްރޭންގެ އަސްކަރީ މަރުކަޒުތަކަށް އަމާޒު ކުރަނީ
ރަޝިޔާ އިން ޔުކްރެއިނަށް ފުޅާ ދާއިރާއެއްގައި ހަމަލާދޭން ފެށިތާ ގާތްގަނޑަކަށް ތިން އަހަރު ވެފައިވާއިރު، މިހާތަނަށް 51،000 އަށް ވުރެ ގިނަ ގައިޑެޑް ބޮން ޔޫކްރެއިންނަށް އަޅާފައިވާ ކަމަށް ބުރާސްފަތި ދުވަހު އެ ގައުމުގެ އެއަރ ފޯސްއިން ބުނެފިއެވެ.
ގައިޑެޑް ނުވަތަ ގްލައިޑް ބޮމަކީ ވަރަށް ބޮޑަށް ގެއްލުންދޭ އަދި ހުއްޓުވަން ވަރަށް އުނދަގޫ ބޮމެއް ކަމަށް ޔޫކްރެއިން އިން ބުނެފައިވެއެވެ. ވައިގެ މަގުން ދޫކުރާ މި ނުރައްކާތެރި ހަތިޔާރަކީ އާންމު ގޮތެއްގައި ސޯވިއެޓް ޒަމާނުގެ ހަތިޔާރެއް ކަމަށާއި، އޭގެ ފިޔަގަނޑާއި ސަޓެލައިޓް އެހީގައި ދަތުރުކުރެވޭ ގޮތަށް ފަރުމާކޮށްފައިވާ ބޮމުގެ ބާވަތެއް ކަމަށް ބުނެފައިވެއެވެ. މި ސިފަތަކުގެ ސަބަބުން ދަތުރުކުރެވޭ ދުރުމިން އިތުރުވެ، ޓާގެޓް ކުރުމަށް ފަސޭހަ ވެގެންދާ ކަމަށް ވެސް ބުނެފައިވެއެވެ.
މި ބޮމަކީ ރަޝިޔާ އިން ޔޫކްރެއިނަށް އާންމުގޮތެއްގައި އަޅަމުންދާ ބެލިސްޓިކް އަދި ކްރޫޒް މިސައިލްތަކަށްވުރެ އަގުހެޔޮ އަދި އަދަދުން ގިނަ އެއްޗެއް ކަމަށް ވެސް ޔޫކްރެއިނުން ބުނެއެވެ.
މި ބޮމަށް ލިބިފައިވާ ހަލާކުކުރުމުގެ ބާރުގެ ސަބަބުން، ވަރަށް ބޮޑަށް ހިމާޔަތް ކުރެވިފައިވާ ޔޫކްރެއިންގެ ދިފާޢީ މަރުކަޒުތައްވެސް ހަލާކުކޮށްލާ ކަމަށް ވެއެވެ. އޭގެ ނަތީޖާ އެއްގެ ގޮތުން އިރުމަތީ ސަރަޙައްދުތަކުގައި ހުރި ޔޫކްރެއިންގެ މިފަދަ މަރުކަޒުތައް ފާއިތުވި މަސްތަކުގައި މަޑުމަޑުން ވީރާނާވަމުން ގޮސްފައިވެއެވެ.
2024 ވަނަ އަހަރު ރަޝިޔާއިން ޔުކްރެއިނަށް 40،000 އެއްހާ ގައިޑެޑް ބޮން އަޅާފައިވާ ކަމަށް އެއަރ ފޯސްއިން ޓެލެގްރާމް މެސެޖިންގ އެޕްގައި ޝާއިޢުކުރި ބަޔާނެއްގައި ބުނެފައިވެއެވެ.
ޔުކްރެއިންގެ އޮފިޝަލުން ބުނާ ގޮތުގައި ފްރަންޓް ލައިނަށާއި، ރަޝިޔާ އާ އިންވެގެން އޮންނަ ސަރަޙައްދުތަކަށް އެންމެ ގިނައިން ހަމަލާ ދެނީ މި ހަތިޔާރު ބޭނުން ކޮށްގެންނެވެ.
ބުދަ ދުވަހު ރަޝިޔާއިން މިފަދަ ދެ ބޮމެއް އިރުމަތީ ދެކުނު ސަރަޙައްދުގެ ޒަޕޮރީޒިއާ ސިޓީގެ ސަރަޙައްދަކަށް އަޅާފައިވެއެވެ. މިއީ މިއަހަރު މިހާތަނަށް ހިނގި އެންމެ ގިނަ މީހުން މަރުވި ހަމަލާ ކަމަށް ރެކޯޑް ކުރެވިފައިވާއިރު، މި ހަމަލާގައި މަދުވެގެން 13 މީހުން މަރުވެ، 113 މީހުން ޒަޚަމްވެފައިވާ ކަމަށް ޔޫކްރެއިންގެ އޮފިޝަލުން ބުނެފައިވެއެވެ.
ބުރާސްފަތި ދުވަހު ދެކުނުގެ ޚާރްސާން ސިޓީގެ ސަރަޙައްދުތަކަކަށް ގައިޑެޑް ބޮމުގެ ހަމަލާއެއް ދިނުމުގެ ސަބަބުން މަދުވެގެން 6 މީހުން ޒަޚަމްވިއެވެ.
ޔޫކްރެއިންގެ އޮތޯރިޓީތަކުން ބުނާ ގޮތުގައި ގައިޑެޑް ބޮމުގެ ހަމަލާތައް ހުއްޓުވުމަށް އެންމެ އެކަށީގެންވާ ގޮތަކީ އެ ބޮންތައް އުފުލާ ހަނގުރާމަމަތީ މަތިންދާބޯޓުތަކާއި އެ ބޯޓުތައް ގްރައުންޑް ކޮށްފައި ހުންނަ އެއަރފީލްޑް ތަކަށް ހަމަލާ ދިނުމެވެ.
