ދެ ވަނަ މެޗުގައި ސިޓީ އަތުން ސިފައިން ބަލިވެއްޖެ

މިހާރު ކުރިއަށްދާ ޤައުމީ ވޮލީ ބޯޅަ މުބާރާތުގައި ދިވެހި ސިފައިންގެ ކުލަބުން ކުޅުނު ދެ ވަނަ މެޗުގައި، ސްޕޯޓްސް ކުލަބު ސިޓީ އަތުން ބަލިވެއްޖެ އެވެ.

ހޯމަ ދުވަހުގެ ރޭ ޒުވާނުންގެ މަރުކަޒުގެ އެތެރޭ ކޯޓުގައި ސިޓީއާ ދެކޮޅަށް ކުޅުނު މެޗުން ސިފައިންގެ ކުލަބު ބަލިވީ ސީދާ ތިން ސެޓުންނެވެ. މެޗުގެ ސެޓުތައް ސިޓީން ކާމިޔާބު ކުރީ 25-19، 25-19 އަދި 25-19 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ސިޓީގެ ބިދޭސީ ކުޅުންތެރިޔާ ދްރުވިލް ނަޔަންބާއީ ޕަޓޭލް އެވެ.

ޤައުމީ މުބާރާތުގައި ސިފައިން ކުޅުނު ފުރަތަމަ މެޗުގައި ވަނީ ބްލޫސް ފޯ ވޮލީބޯލްގެ މައްޗަށް ކުރި ހޯދައިފަ އެވެ. ސިޓީގެ ފުރަތަމަ މެޗުގައި އެ ޓީމު ވަނީ އެޗްޑީސީ ކުލަބު އަތުން ބަލިވެފަ އެވެ. މުބާރާތުގައި ސިފައިންގެ ފަހު މެޗުގައި އަންގާރަ ދުވަހުގެ ރޭ ނިކުންނާނީ އެޗްޑީސީއާ ދެކޮޅަށެވެ. ސިޓީގެ ފަހު މެޗުގައި އަންގާރަ ދުވަހުގެ ހަވީރު ނިކުންނާނީ ބްލޫސްއާ ދެކޮޅަށެވެ.

މިހާތަނަށް ކޮންމެ ޓީމަކުން ވެސް ދެ މެޗު ކުޅެފައިވާއިރު، އެއް ވަނައިގައި އޮތީ އެޗްޑީސީ އެވެ. ދެ ވަނައިގައި ސިޓީ އޮތްއިރު، ސިފައިންގެ ކުލަބު އޮތީ ތިން ވަނައިގަ އެވެ. ދެ މެޗުން ވެސް ބަލިވެފައިވާ ބްލޫސް އޮތީ ފުލުގަ އެވެ.