ބްލޫސް ބަލިކޮށް، އެޗްޑީސީ އަށް ދެ ވަނަ މޮޅު

މިހާރު ކުރިއަށްދާ ޤައުމީ ވޮލީ ބޯޅަ މުބާރާތުގައި ބްލޫސް ފޯ ވޮލީބޯލްއާ ދެކޮޅަށް ކުޅުނު މެޗުން ވެސް މޮޅުވެ، އެޗްޑީސީ ކުލަބުން މުބާރާތުގައި ދެ ވަނަ މޮޅެއް ވެސް ހޯދައިފި އެވެ.

ޒުވާނުންގެ މަރުކަޒުގެ އެތެރޭ ކޯޓުގައި ހޯމަ ދުވަހުގެ ހަވީރު ކުޅުނު މެޗު އެޗްޑީސީ ކުލަބުން ކާމިޔާބު ކުރީ ސީދާ ތިން ސެޓުންނެވެ. މެޗުގެ ސެޓުތައް އެޗްޑީސީ ކުލަބުން ކާމިޔާބު ކުރީ 25-21، 25-17 އދި 21-21 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ އެޗްޑީސީ ކުލަބުގެ އަލީ ނިމާލް އެވެ.

މުބާރާތުގެ ފުރަތަމަ މެޗުގައި އެޗްޑީސީ ކުލަބުން ވަނީ ސްޕޯޓްސް ކުލަބު ސިޓީގެ މައްޗަށް ވެސް ކުރި ހޯދައިފަ އެވެ. މިވަގުތު ކުޅުނު ދެ މެޗުން ވެސް މޮޅުވެ، އެޗްޑީސީ އެއް ވަނައިގައި އޮތީ ހަ ޕޮއިންޓާ އެކު އެވެ. މުބާރާތުގައި ދެން އެޗްޑީސީ އަށް އޮންނާނީ އަންގާރަ ދުވަހުގެ ރޭ ދިވެހި ސިފައިންގެ ކުލަބާ ދެކޮޅަށް ކުޅޭ މެޗެވެ. އެ މެޗުން މޮޅުވެ، ސީދާ ފައިނަލްގެ ޖާގަ ހޯދުމުގެ ފުރުސަތު އެޗްޑީސީ އަށް އޮންނާނެ އެވެ.

އެޗްޑީސީން ވަނީ މިދިޔަ އަހަރުގެ ވޮލީބޯޅަ އެސޯސިއޭޝަން ކަޕް ކާމިޔާބު ކޮށްފަ އެވެ. އޭގެ ފަހުން އެޗްޑީސީން ވަނީ ދާދި ފަހުން ނިމުނު ޤައުމީ ވޮލީ ބޯޅަ ލީގު ވެސް ކާމިޔާބު ކޮށްފަ އެވެ. އެ ދެ މުބާރާތް ވެސް އެޗްޑީސީން ކާމިޔާބު ކުރީ ސިފައިންގެ ކުލަބުގެ މައްޗަށް ކުރި ހޯދައިގެންނެވެ.