އަހަރު ނިމުނު އިރު ލިބުނު އެއްޗަކަށް ވުރެ އިތުރަށް 14 ބިލިއަން ސަރުކާރުން ޚަރަދު ކޮށްފި
ފިނޭންސް މިނިސްޓްރީން ހާމަ ކޮށްފައިވާ ތަފާސް ހިސާބަށް ބަލާއިރު، ސަރުކާރަށް މްދަނީގެ ގޮތުގައި އެންމެ ގިނަ ފައިސާ ލިބިފައިވަނީ ރައްޔިތުން ދައްކާ ޓެކްސް ފައިސާއެވެ. ޓެކްސްގެ ގޮތުގައި 26 ބިލިއަން ރުފިޔާ ހުސްވި އަހަރު ލިބުނު އިރު އެއީ ޖުމްލަ އާމްދަނީގެ 76 އިންސައްތައެވެ.
ފިނޭންސް މިނިސްޓަރ މޫސާ ޒަމީރު
2024 ވަނަ އަހަރު އާމްދަނީގެ ގޮތުގައި ސަރުކާރަށް ލިބުނީ 34 ބިލިއަން ރުފިޔާ ކަމަށާއި އެހެން ނަމަވެސް ލިބުނު އެއްޗަކަށް ވުރެ އިތުރަށް 14 ބިލިއަން ޚަރަދު ކޮށްފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ތަފާސް ހިސާބުތަކުން ހާމަ ވެއްޖެއެވެ.
އެމްއެމްއޭގެ ހިސާބުތަކުން އެނގޭ ގޮތުގައި ހުސްވި އަހަރު ސަރުކާރުން ވަނީ 48 ބިލިއަން ޚަރަދު ކޮށްފައެވެ.
ލިބުނު އާމްދަނީ އަށް ވުރެ ބޮޑުތަނުން ޚަރަދު އިތުރުވި އިރު ރަށްރަށުގައި ކުރީ ސަރުކާރުން ފަށާފައި ހުރި ގިނަ މަޝްރޫއުތައް ވަނީ ހުއްޓިފައެވެ. ރައީސް މުއިއްޒު ވެރިކަމަށް ވަޑައިގަތީ ކުރީ ސަރުކާރުން ފަށާފައިވާ އެއްވެސް މަޝްރޫއެއް ނުހުއްޓާ ކުރިއަށް ގެންދަވާނެ ކަމަށް ވައުދުވެވަޑައިގަތުމަށް ފަހުގައެވެ.
ސަރުކާރުން އެތައް ބިލިއަން ރުފިޔާ އެއް، ލިބުނު އާމްދަނީ އަށް ވުރެ އިތުރަށް ޚަރަދު ކުރި އިރު، ދިރިއުޅުގެ އާންމު ހާލަތު ދަށްވެ، ބޭސްފަރުވާ އަށް އާސަންދަ އާއި އެންސްޕާގެ އެހީ ލިބުމުގައިވެސް ބޮޑެތި ދަތިތަކެއް ރައްޔިތުންނަށް ކުރިމަތިވެފައިވާކަން ފާހަގަ ކުރެވެއެވެ.
ފިނޭންސް މިނިސްޓްރީން ހާމަ ކޮށްފައިވާ ތަފާސް ހިސާބަށް ބަލާއިރު، ސަރުކާރަށް މްދަނީގެ ގޮތުގައި އެންމެ ގިނަ ފައިސާ ލިބިފައިވަނީ ރައްޔިތުން ދައްކާ ޓެކްސް ފައިސާއެވެ. ޓެކްސްގެ ގޮތުގައި 26 ބިލިއަން ރުފިޔާ ހުސްވި އަހަރު ލިބުނު އިރު އެއީ ޖުމްލަ އާމްދަނީގެ 76 އިންސައްތައެވެ. އަނެއްކޮޅުން ހިލޭ އެހީ ސަރުކާރާށް ލިބިފައިވަނީ ކުރިން އަންދާޒާ ކުރިވަރަށް ވުރެ ވަރަށް ބޮޑުތަން ކުޑަކޮށްނެވެ. 1.5 ބިލިއަން ރުފިޔާ ހިލޭ އެހީގެ ގޮތުގައި ލިބޭނެ ކަމަށް އަންދާޒާ ކުރި ނަމަވެސް އަހަރު ނިމުނު އިރު ލިބިފައިވަނީ 658 މިލިއަން ރުފިޔާއެވެ. އެއީ އަންދާޒާ ކުރިވަރަށް ވުރެ 44 އިންސައްތަ ދަށް މިންވަރެކެވެ.
ސަރުކާރުގެ ހިންގުމުގެ ޚަރަދުތައް ބޮޑުވެ، ތަރައްގީއަށް ކުރާ ހޭދަ ކުޑަކަން ފާހަގަ ކޮށް ސަރުކާރަށް ފާޑުކިޔުން އިތުރުވެފައިވާއިރު، މުސާރައަށާއި ސަރުކާރު ހިންގަން ކުރާ ޚަރަދުތަކަށް އެންމެ ބޮޑު އެއްޗެއް ހޭދަކޮށްފައިވާކަން ފިނޭންސް މިނިސްޓްރީގެ ތަފާސް ހިސާބުތަކުން ހާމަވެއެވެ.
މުޅި ޚަރަދުގެ 70 އިންސައްތަ ހޭދަ ކޮށްފައިވަނީ މުސާރަ އަށާއި ހިންގުމުގެ ޚަރަދުގެ ގޮތުގައެވެ. ޖުމްލަ 34 ބިލިއަން ރުފިޔާ މިކަމަށް ހޭދަކޮށްފައިވެއެވެ.
އަނެއްކޮޅުން ތަރައްގީގެ މަޝްރޫއުތަކަށް ހޭދަކޮށްފައިވާ ކަމަށް ފިނޭންސް މިނިސްޓްރީން ބުނީ 11 ބިލިއަން ރުފިޔާއެވެ. ލޯނުތައް އަނބުރާ ދެއްކުމަށް ހޭދަކޮށްފައިވަނީ 2.3 ބިލިއަން ރުފިޔާ އެވެ.
އެމްއެމްއޭއިން ބުނާ ގޮތުގައި 2024 ވަނަ އަހަރު ނިމުނު އިރު ސަރުކާރުގެ ދަރަނި ހުރީ ރާއްޖޭގެ އުފެއްދުންތެރިކަމުގެ ނިސްބަތުން 13 އިންސައްތައިގައެވެ.
