ސްޕެނިޝް ކޮޕާ ޑެލް ރޭގައި ބާބަސްޓްރޯއާ ދެކޮޅަށް ކުޅުނު މެޗުން މޮޅުވެ، ބާސެލޯނާ އިން މުބާރާތުގެ ގަދަ 16 ވަނަ ބުރުން ޖާގަ ހޯދައިފި އެވެ.
ހޮނިހިރު ދުވަހުގެ ރޭ ބާބަސްޓްރޯއާ ދެކޮޅަށް ކުޅުނު މެޗު ބާސެލޯނާ އިން ކާމިޔާބު ކުރީ 4-0 އިންނެވެ. މެޗުގެ ފުރަތަމަ ހާފުގައި ބާސެލޯނާ އިން ދެ ލަނޑު ޖެހިއިރު، ދެ ވަނަ ހާފުގައި ވަނީ އަނެއް ދެ ލަނޑު ޖަހައިފަ އެވެ.
މެޗުގެ ފުރަތަމަ ހާފުގެ 21 ވަނަ މިނެޓުގައި ބާސެލޯނާ އަށް ލީޑު ނަގައިދިނީ އެރިކް ގާސިއާ އެވެ. އޭނާ އެ ލަނޑު ޖެހީ ރޮނާލްޑް އަރައުހޯ ތަނަވަސްކޮށްދިން ފުރުސަތެއްގަ އެވެ. އޭގެ ފަހުން މެޗުގެ 31 ވަނަ މިނެޓުގައި ޕޮލެންޑުގެ ރޮބާޓް ލެވަންޑޯސްކީ ވަނީ ބާސެލޯނާގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ.
މެޗުގެ ދެ ވަނަ ހާފު ފަށައިގެން ދެ ވަނަ މިނެޓުގައި ބާސެލޯނާގެ ތިން ވަނަ ލަނޑު ޖެހީ ވެސް ލެވަންޑޯސްކީ އެވެ. އޭގެ ފަހުން މެޗުގެ 56 ވަނަ މިނެޓުގައި ބާސެލޯނާގެ ހަތަރު ވަނަ ލަނޑު ޖެހީ ޕަބްލޯ ޓޯރޭ އެވެ. މެޗުގައި ލެވަންޑޯސްކީ ޖެހި ދެ ލަނޑު ޖަހަން ފުރުސަތު ތަނަވަސްކޮށްދިނީ ވެސް ޓޯރޭ އެވެ.
ބާސެލޯނާ އަކީ ކޮޕާ ޑެލް ރޭ މުބާރާތް އެންމެ ގިނަ ފަހަރު ކާމިޔާބު ކޮށްފައިވާ ޓީމެވެ. އެ ޓީމުން ވަނީ މިހާތަނަށް 31 ފަހަރު އެ މުބާރާތް ކާމިޔާބު ކޮށްފަ އެވެ.
