ބްރައިޓަންއާ އެއްވަރުވެ، އާސެނަލް އިން ފުރުސަތު ނަގާލައިފި

އިނގިރޭސި ޕްރިމިއާ ލީގުގައި ބްރައިޓަންއާ ދެކޮޅަށް ކުޅުނު މެޗުން އެއްވަރުވެ، އާސެނަލް އިން ފުރުސަތު ނަގާލައިފި އެވެ.

ބްރައިޓަންގެ އަމިއްލަ ދަނޑުގައި ކުޅުނު މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. މެޗުގައި އާސެނަލް އިން ލަނޑު ޖަހައި ކުރި ހޯދާފައި ވަނިކޮށް، ބްރައިޓަން އިން ވަނީ ފަހަތުން އަރައި ލަނޑު ޖަހައިގެން މެޗުގެ ނަތީޖާ ހަމަހަމަ ކޮށްފަ އެވެ.

މެޗު ފަށައިގެން 16 ވަނަ މިނެޓުގައި އާސެނަލް އިން ލަނޑު ޖަހައި ލީޑު ނެގި އެވެ. އެ ލަނޑު އެ ޓީމަށް ޖަހައިދިނީ ޒުވާން ކުޅުންތެރިޔާ އީތަން އެންވަނޭރީ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ މިކޭލް މެރިނޯ އެވެ. ދެ ވަނަ ހާފުގައި ބްރައިޓަން އިން ނަތީޖާ ހަމަހަމަ ކުރީ އެ ޓީމަށް ލިބުނު ޕެނަލްޓީ ކާމިޔާބު ކޮށްގެންނެވެ. އެ ޕެނަލްޓީ ކާމިޔާބުކޮށް ބްރައިޓަން އަށް ނަތީޖާ ހަމަހަމަ ކޮށްދިނީ ޖޮއާއޯ ޕެޑްރޯ އެވެ.

މެޗުން މޮޅުވެ، އެއް ވަނައިގައި އޮތް ލިވަޕޫލާ ދެމެދު ފަރަގު ކުޑަ ކުރަން ލިބުނު ފުރުސަތު އާސެނަލް އިން ވަނީ ނަގާލައިފަ އެވެ. މިހާތަނަށް ލީގުގައި ކުޅެފައިވާ 20 މެޗުން އާސެނަލަށް ލިބެނީ 40 ޕޮއިންޓެވެ. އާސެނަލަށް ވުރެ ދެ މެޗު މަދުން ކުޅެފައިވާ ލިވަޕޫލަށް އެއް ވަނައިގައި ލިބެނީ 45 ޕޮއިންޓެވެ. އެހެންކަމުން، މެޗުގެ އަދަދު ހަމަކުރާއިރު، ލިވަޕޫލަށް ލީޑު ފުޅާ ކުރުމުގެ ފުރުސަތު އޮންނާނެ އެވެ.