އެޗްޑީސީން ޤައުމީ ވޮލީ ލީގު ކާމިޔާބު ކޮށްފި

އެޗްޑީސީ ކުލަބުން ޤައުމީ ވޮލީބޯޅަ ލީގު ކާމިޔާބު ކޮށްފި އެވެ.

ޤައުމީ ވޮލީ ލީގު އެޗްޑީސީން ކާމިޔާބު ކުރީ ލީގުގެ ފަހު މެޗުގައި އެންމެ ފަހުގެ ޗެމްޕިއަން ދިވެހި ސިފައިންގެ ކުލަބުގެ މައްޗަށް ކުރި ހޯދައިގެންނެވެ. އެ މެޗާ ކުރިމަތިލީއިރު ލީގުގައި ދެ ޓީމު ވެސް ވަނީ ކުރިން ކުޅުނު ހުރިހާ މެޗަކުން މޮޅުވެފަ އެވެ. ޕޮއިންޓުގެ ގޮތުން ދެ ޓީމު އެއްވަރެއްގައި އޮތްއިރު، ލީގު ޗެމްޕިއަންކަން ލިބެން އޮތީ އެ މެޗުން މޮޅުވާ ޓީމަކަށެވެ.

އެ މެޗުގައި އެޗްޑީސީން ވަނީ ތިން ސެޓު އެއް ސެޓުން ސިފައިންގެ ކުލަބުގެ މައްޗަށް ކުރި ހޯދައިފަ އެވެ. އެއީ މެޗުގެ ފުރަތަމަ ސެޓު ސިފައިންގެ ކުލަބުން ކާމިޔާބު ކޮށްފައި ވަނިކޮށް، ފަހަތުން އަރައި ތިން ސެޓު ހޯދައިގެންނެވެ. މެޗުގެ ފުރަތަމަ ސެޓު ސިފައިންގެ ކުލަބުން ކާމިޔާބު ކުރީ 25-21 އިންނެވެ. ނަމަވެސް ޖެހިގެން ދެން ކުޅުނު ތިން ސެޓު ވެސް ކާމިޔާބު ކުރީ އެޗްޑީސީންނެވެ. އެއީ 19-25، 21-25 އަދި 14-25 އިންނެވެ.

މިއަހަރުގެ ލީގުގައި ފަސް ޓީމަކުން ވަނީ ވާދަކޮށްފަ އެވެ. ހަތަރު މެޗުން ވެސް މޮޅުވެ އެޗްޑީސީ އަށް އެއް ވަނަ ލިބެނީ 12 ޕޮއިންޓުންނެވެ. ދެ ވަނަ އަށް ސިފައިންގެ ކުލަބު ދިޔައީ ހަތަރު މެޗުން ނުވަ ޕޮއިންޓާ އެކު އެވެ. ތިން ވަނައިގައި ސްޕޯޓްސް ކުލަބު ސިޓީ އަށް ލިބެނީ ފަސް ޕޮއިންޓެވެ. ހަތަރު ވަނައިގައި ބްލޫސް ފޯ ވޮލީބޯލް އަށް ދެ ޕޮއިންޓު ލިބޭއިރު، ފަސް ވަނައިގައި ޕޮލިސް ކުލަބަށް ލިބެނީ ވެސް ދެ ޕޮއިންޓެވެ.