ޕޮލިސް ބަލިކޮށް ސިފައިންނަށް ތިން ވަނަ މޮޅު

މިހާރު ކުރިއަށްދާ ޤައުމީ ވޮލީ ބޯޅަ ލީގުގައި ޕޮލިސް ކުލަބާ ދެކޮޅަށް ކުޅުނު މެޗުން މޮޅުވެ، ދިވެހި ސިފައިންގެ ކުލަބުން ތިން ވަނަ މޮޅެއް ވެސް ހޯދައިފި އެވެ.

ބުދަ ދުވަހުގެ ހަވީރު ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު މެޗު ސިފައިންގެ ކުލަބުން ކާމިޔާބު ކުރީ ތިން ސެޓު އެއް ސެޓުންނެވެ. އެ މެޗާ ކުރިމަތިލީއިރު، ލީގުގައި ކުރިން ކުޅުނު ދެ މެޗުން ވެސް ސިފައިންގެ ކުލަބު ވަނީ މޮޅުވެފަ އެވެ. ޕޮލިސް ކުލަބު ވަނީ އެ ޓީމު ކުޅުނު ދެ މެޗުން ވެސް ބަލިވެފަ އެވެ.

މެޗުގެ ފުރަތަމަ ސެޓު ސިފައިންގެ ކުލަބުން ކާމިޔާބު ކުރީ 25-14 އިންނެވެ. ނަމަވެސް ޕޮލިސް ކުލަބުން ވަނީ ވާދަވެރި ކުޅުމަކަށްފަހު ދެ ވަނަ ސެޓު، 22-25 އިން ކާމިޔާބު ކޮށްފަ އެވެ. ޖެހިގެން ކުޅުނު ދެ ސެޓުގައި ވެސް ސިފައިންގެ ކުލަބުގެ ފަރާތުން މޮޅު ކުޅުމެއް ފެނުނުއިރު، ޕޮލިސް ކުލަބަށް އެންމެ އެކަށީގެންވާ ކުޅުމެއް ނުދެއްކެ އެވެ. ސިފައިންގެ ކުލަބުން ތިން ވަނަ ސެޓު 25-13 އިން ކާމިޔާބުކުރިއިރު، ހަތަރު ވަނަ ސެޓު ކާމިޔާބު ކުރީ 25-12 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ސިފައިންގެ ކުލަބުގެ ޙުސެއިން ރަޒާން އެވެ.

ލީގުގައި ސިފައިންގެ ކުލަބުގެ އެންމެ ފަހު މެޗުގައި ބުރާސްފަތި ދުވަހުގެ ރޭ ނިކުންނާނީ އެޗްޑީސީއާ ދެކޮޅަށެވެ. ޕޮލިސް ކުލަބުގެ ފަހު މެޗުގައި ބުރާސްފަތި ދުވަހުގެ ހަވީރު ނިކުންނާނީ ސްޕޯޓްސް ކުލަބު ސިޓީއާ ދެކޮޅަށެވެ.