އާޓެޓާ ބުނީ ގޮންޖެހުންތަކާ އެކު ވެސް އާސެނަލް ކުރިއަށްދާ ކަމަށް
މި ސީޒަންގެ މިހާތަނަށް އައިއިރު އާސެނަލަށް ކުރިމަތިވި ބައެއް ގޮންޖެހުންތައް އާޓެޓާ ވަނީ ފާހަގަ ކޮށްފަ އެވެ. އެގޮތުން 10 ކުޅުންތެރިންނާ އެކު ކުޅެން ޖެހުނު މެޗުތައް ގިނަވުމާއި، ޓީމަށް ދިމާވަމުން އަންނަ އަނިޔާގެ މައްސަލައިގެ ވާހަކަ އާޓެޓާ ވަނީ ފާހަގަ ކޮށްފަ އެވެ.
އާސެނަލްގެ ކޯޗު މިކޭލް އާޓެޓާ
އާސެނަލަށް އެކި ކަހަލަ ގޮންޖެހުންތަކާ ކުރިމަތިލާން ޖެހުނު ނަމަވެސް، އެ ޓީމު ހިތްވަރާ އެކު ކުރިއަށް ދާ ކަމަށް މިކޭލް އާޓެޓާ ބުނެފި އެވެ.
އާޓެޓާ މިހެން ބުނީ އިނގިރޭސި ޕްރިމިއާ ލީގުގައި ބުދަ ދުވަހުގެ ރޭ ބެރެންޓްފޯޑާ ދެކޮޅަށް ނިކުންނަ މެޗުގެ ކުރިން ވާހަކަ ދައްކަމުންނެވެ. މި ސީޒަންގައި އާސެނަލަށް ދިމާވަމުން އަންނަ އަނިޔާގެ މައްސަލަތަކުގެ ވާހަކަ އާޓެޓާ ވަނީ ދައްކައިފަ އެވެ.
ވާދަވެރި ރޫހެއްގައި އާސެނަލް ކުރިއަށް ދިޔުމާ ގުޅޭ ގޮތުން ވާހަކަ ދައްކަމުން އާޓެޓާ ބުނީ، އެ ޓީމުން އެކަން ސާބިތުކޮށްދޭން ބޭނުންވާ ކަމަށާއި، އެކަން ހާސިލު ކުރެވޭނެ ކަމަށެވެ. މި ސީޒަންގެ މިހާތަނަށް އައިއިރު އާސެނަލަށް ކުރިމަތިވި ބައެއް ގޮންޖެހުންތައް އާޓެޓާ ވަނީ ފާހަގަ ކޮށްފަ އެވެ. އެގޮތުން 10 ކުޅުންތެރިންނާ އެކު ކުޅެން ޖެހުނު މެޗުތައް ގިނަވުމާއި، ޓީމަށް ދިމާވަމުން އަންނަ އަނިޔާގެ މައްސަލައިގެ ވާހަކަ އާޓެޓާ ވަނީ ފާހަގަ ކޮށްފަ އެވެ.
އެ ހުރިހާ ކަމަކަށް ބަލާއިރު، ހުރިހާ މުބާރާތެއްގައި އާސެނަލް އޮތީ އެމީހުން އެންމެ ބޭނުންވި ހިސާބުގައި ނޫން ވިޔަސް، ޓީމާ މެދު ހިތްހަމަ ޖެހޭ ކަމަށް އާޓެޓާ ވަނީ ބުނެފަ އެވެ. ޚާއްސަކޮށް މިހާރު ވެސް އާސެނަލް އިން އިތުރު ފިޔަވަޅެއް ކުރިއަށް އަޅައިފި ކަމަށާއި، މިވަގުތު ޓީމު ކުޅެން ޖެހުނު ހާލަތަށް ކުޅުންތެރިން ފުރިހަމަ އަށް ފިޓުވަމުން އަންނަ ކަމަށް ވެސް އާޓެޓާ ވަނީ ބުނެފަ އެވެ.
އެއް ވަނައިގައި އޮތް ލިވަޕޫލާ ދެމެދު އޮތް ފަރަގާ ގުޅޭ ގޮތުން ސުވާލު ކުރުމުން އާޓެޓާ ބުނީ، އެކަން ބަރޯސާވަނީ އާސެނަލްގެ އަތް މައްޗަށް ނޫން ކަމަށެވެ. އެހެން ނަމަވެސް، ކޮންމެ މެޗަކާ ކުރިމަތިލައި، ކޮންމެ މެޗަކުން މޮޅުވުން މަސައްކަތް ކުރުމަކީ އާސެނަލް ކުރަން ޖެހޭ ކަމެއް ކަމަށް އާޓެޓާ ބުންޏެވެ. އަދި އައު އަހަރަށް އެންމެ ބޮޑު އަމާޒަކީ ކުޅުންތެރިންނަށް ކުރިމަތިވާ އަނިޔާ ކުޑަ ކުރެވޭނެ ގޮތަށް މަސައްކަތްކޮށް، ކުޅުންތެރިން ފިޓުކޮށް ބޭތިއްބުން ކަަމަށް ވެސް އާޓެޓާ ބުންޏެވެ.
ބްރެންޓްފޯޑުގެ އަމިއްލަ ދަނޑުގައި އެ ޓީމާ ދެކޮޅަށް ނިކުންނައިރު، އާސެނަލް އޮތީ ތިން ވަނައިގަ އެވެ. އެއީ މިހާތަނަށް ކުޅެފައިވާ 18 މެޗުން 36 ޕޮއިންޓާ އެކު އެވެ. ދެ ވަނައިގައި ނޮޓިންހަމް ފޮރެސްޓު އޮތީ އާސެނަލަށް ވުރެ އެއް މެޗު އިތުރަށް ކުޅެގެން 37 ޕޮއިންޓާ އެކު އެވެ. އެހެންކަމުން ބްރެންޓްފޯޑު އަތުން މޮޅުވެ އާސެނަލަށް ދެ ވަނަ އަށް ޖެހިލުމުގެ ފުރުސަތު އޮންނާނެ އެވެ.
