ރާއްޖެ ކޮޅަށް 14 ލަނޑު ޖަހައިގެން އިންޑިއާ މޮޅުވެއްޖެ

ބައިނަލްއަޤުވާމީ ރަޙުމަތްތެރިކަމުގައި އިންޑިއާގެ ޤައުމީ އަންހެން ޓީމާ ދެކޮޅަށް ކުޅުނު މެޗުން، ރާއްޖޭގެ ޤައުމީ އަންހެން ޓީމު ތަފާތު ބޮޑު ނަތީޖާ އަކުން ބަލިވެއްޖެ އެވެ.

އިންޑިއާގެ ބެންގަލޫރުގައި ހޯމަ ދުވަހު ކުޅުނު މެޗުގައި އިންޑިއާގެ ޤައުމީ އަންހެން ޓީމުން ރާއްޖޭގެ ޤައުމީ އަންހެން ޓީމުގެ މައްޗަށް ކުރި ހޯދީ 14-0 އިންނެވެ. މި މެޗުގެ ފުރަތަމަ ހާފުގައި ވެސް އިންޑިއާ އިން ވަނީ ރާއްޖެ ކޮޅަށް އަށް ލަނޑު ޖަހައިގެން ބޮޑު ލީޑެއް ހޯދައިފަ އެވެ. މެޗުގައި އިންޑިއާގެ އަނެއް ހަ ލަނޑު އެ ޓީމުން ޖެހީ މެޗުގެ ދެ ވަނަ ހާފުގަ އެވެ.

އިންޑިއާއާ ދެކޮޅަށް ރާއްޖެ އިން މިފަހަރު ރަޙުމަތްތެރިކަމުގެ ދެ މެޗު ކުޅުމަށް ވަނީ ހަމަޖެހިފަ އެވެ. ދެ ވަނަ މެޗުގައި ރާއްޖެ އިން އިންޑިއާއާ ދެކޮޅަށް ނިކުންނާނީ ބުރާސްފަތި ދުވަހު އެވެ. ދުނިޔޭގެ ފުޓުބޯޅައިގެ މައި އިދާރާ (ފީފާ)، އިން އެންމެ ފަހުން އާންމުކޮށްފައިވާ އަންހެން ރޭންކިންގައި އިންޑިއާ އޮތީ 69 ވަނައިގަ އެވެ. އެ ރޭންކިންގައި ރާއްޖެ އޮތީ 163 ވަނައިގަ އެވެ.

މީގެ ކުރިން ވެސް ރާއްޖެ އިން ވަނީ އެކި ފަހަރު މަތިން އިންޑިއާއާ ބައްދަލުކޮށްފަ އެވެ. އޭގެ ތެރެއިން އެންމެ މެޗެއް އެއްވަރުވެފައިވާއިރު، އަނެއް މެޗުތަކުން މޮޅުވެފައި ވަނީ އިންޑިއާ އެވެ. މީގެ ކުރިން އިންޑިއާ އަތުން މިހާ ތަފާތު ބޮޑު ނަތީޖާ އަކުން ރާއްޖެ ބަލިވެފައި ވަނީ 2014 ވަނަ އަހަރު އެވެ.