ބްލޫސް ބަލިކޮށް ސިފައިންނަށް ދެ ވަނަ މޮޅު

މިހާރު ކުރިއަށްދާ ޤައުމީ ވޮލީ ބޯޅަ ލީގުގަައި ބްލޫސް ފޯ ވޮލީބޯލްއާ ދެކޮޅަށް ކުޅުނު މެޗުން މޮޅުވެ، ދިވެހި ސިފައިންގެ ކުލަބުން ދެ ވަނަ މޮޅެއް ވެސް ހޯދައިފި އެވެ.

ޒުވާނުންގެ މަރުކަޒުގެ އެތެރޭ ކޯޓުގައި ހޯމަ ދުވަހުގެ ރޭ ކުޅުނު މެޗު ސިފައިންގެ ކުލަބުން ކާމިޔާބު ކުރީ ސީދާ ތިން ސެޓުންނެވެ. އެ މެޗާ ކުރިމަތިލީއިރު ސިފައިންގެ ކުލަބުން ވަނީ ލީގުގައި ކުޅުނު ފުރަތަމަ މެޗުން ވެސް މޮޅުވެފަ އެވެ. ބްލޫސް އިން ވަނީ ކުޅުނު ދެ މެޗުގެ ތެރެއިން އެއް މެޗުން ބަލިވެ އަނެއް މެޗުން މޮޅުވެފަ އެވެ. މިއީ ލީގުގައި ބްލޫސްގެ ތިން ވަނަ މެޗެވެ.

އެންމެ ފަހުން ޤައުމީ ލީގު ކާމިޔާބު ކޮށްފައިވާ ސިފައިންގެ ކުލަބުން މެޗުގެ ސެޓުތައް ކާމިޔާބު ކުރީ 25-22، 25-14 އަދި 25-22 އިންނެވެ. މި މެޗުގައި ވެސް ސިފައިންގެ ކުލަބުގެ ފަރާތުން ވަނީ މޮޅު ކުޅުމެއް ފެނިފަ އެވެ. މެޗުގެ މޮޅު ކުޅުންތެރިޔަކަށް ހޮވުނީ ސިފައިންގެ ކުލަބުގެ ސެޓަރު ޙުސެއިން ޝާހިދު (ސާޑު) އެވެ.

ލީގުގައި ދެން ސިފައިންގެ ކުލަބަށް އޮންނާނީ ބުދަ ދުވަހުގެ ހަވީރު ޕޮލިސް ކުލަބާ ދެކޮޅަށް ކުޅޭ މެޗެވެ. ލީގުގައި ބްލޫސްގެ ފަހު މެޗުގައި ބުދަ ދުވަހުގެ ރޭ ނިކުންނާނީ އެޗްޑީސީ ކުލަބާ ދެކޮޅަށެވެ.