ދެ ވަނަ މެޗުގައި ސިފައިންގެ އަތުން ސްޕޯޓްސް ކުލަބު ސިޓީ ބަލިވެއްޖެ

މިހާރު ކުރިއަށްދާ ޤައުމީ ވޮލީ ބޯޅަ ލީގުގައި ސްޕޯޓްސް ކުލަބު ސިޓީން ކުޅުނު ދެ ވަނަ މެޗުގައި، ދިވެހި ސިފައިންގެ ކުލަބާ ވާދަކޮށް ބަލިވެއްޖެ އެވެ.

ލީގުގެ ފުރަތަމަ މެޗުގައި ސްޕޯޓްސް ކުލަބު ސިޓީން ވަނީ ބްލޫސް ފޯ ވޮލީބޯލްއާ ވާދަކޮށް މޮޅުވެފަ އެވެ. ދެ ވަނަ މެޗުގައި އާދީއްތަ ދުވަހުގެ ހަވީރު ސިފައިންގެ ކުލަބު އަތުން ސްޕޯޓްސް ކުލަބު ސިޓީ ބަލިވެފައި ވަނީ ސީދާ ތިން ސެޓުންނެވެ. މިއީ ލީގުގައި ސިފައިންގެ ކުލަބުގެ ފުރަތަމަ މެޗެވެ.

މެޗުގެ ސެޓުތައް ސިފައިންގެ ކުލަބުން ކާމިޔާބު ކުރީ 25-18، 25-17 އަދި 25-18 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ސިފައިންގެ ކުލަބުގެ ޙުސެއިން ރަޒާން އެވެ.

ލީގުގައި ސިފައިންގެ ދެ ވަނަ މެޗުގައި ހޯމަ ދުވަހުގެ ރޭ ނިކުންނާނީ ބްލޫސް ފޯ ވޮލީބޯލްއާ ދެކޮޅަށެވެ. ލީގު ބުރުގައި ސްޕޯޓްސް ކުލަބު ސިޓީގެ ތިން ވަނަ މެޗުގައި ހޯމަ ދުވަހުގެ ހަވީރު ނިކުންނާނީ ކުލަބު އެޗްޑީސީއާ ދެކޮޅަށެވެ. އެޗްޑީސީން ވަނީ އެ ޓީމުން ކުޅުނު ފުރަތަމަ މެޗުން މޮޅުވެފަ އެވެ.