ތައިލެންޑުން ރާއްޖެ އައި ދެ ދިވެހިންގެ އަތުން 5.5 މިލިއަން ރުފިޔާގެ މަސްތުވާތަކެތި އަތުލައިގަނެފި
29 ޑިސެމްބަރު 2024 | އާދީއްތަ 06:27އެއީ 41 އަހަރުގެ ދިވެހި ފިރިހެނަކާއި 21 އަހަރުގެ ދިވެހި ފިރިހެނެއް
ހަށިގަނޑުގައި ރައްކާކޮށްގެން އެތެރެކުރަނިކޮށް އަތުލައިގަތް މަސްތުވާތަކެތި
ތައިލެންޑުން ރާއްޖެ އައި ދެ ދިވެހިންގެ އަތުން 5.5 މިލިއަން ރުފިޔާގެ މަސްތުވާތަކެތި އަތުލައިގަނެފިއެވެ.
ކަސްޓަމްސްއިން ބުނީ 26 ޑިސެންބަރު 2024 ބުރާސްފަތި ދުވަހު ތައިލެންޑުން ރާއްޖެ އައި ދެމީހެއްގެ ހަށިގަނޑުގައި މަސްތުވާތަކެތި ރައްކާކޮށްގެން ރާއްޖެ އެތެރެކުރަން އުޅެނިކޮށް ހިފަހައްޓާފައިވާ ކަމަށެވެ. އެއީ 41 އަހަރުގެ ދިވެހި ފިރިހެނަކާއި 21 އަހަރުގެ ދިވެހި ފިރިހެނެއް ކަމަށް ކަސްޓަމްސްއިން ބުނެއެވެ.
ކަސްޓަމްސްއިން ބުނީ އެ ދެމީހުންގެ އަމަލުތައް ހުރި ގޮތުން ޝައްކު ކުރެވިގެން އިތުރަށް ބަލައިފާސް ކުރުމުގެ ތެރެއިން، ދެ މީހުންގެ ހަށިގަނޑުގައި މަސްތުވާތަކެތި ރައްކާކޮށްފައި ހުއްޓައި ފެނިފައިވާ ކަމަށެވެ. އަދި ފުރަތަމަ މަރުހަލާގައި އެ ތަކެތި ތަހުލީލުކުރިއިރު، މަސްތުވާތަކެތީގެ ދެ ބާވަތެއް ކަމަށްވާ ހެރޮއިން އަދި މެފެޑްރޯންއަށް ޕޮޒިޓިވްވެފައިވާ ކަމަށް ކަސްޓަމްސްއިން ބުންޏެވެ. އެއީ 0.32 ކިލޯގެ ހެރޮއިންއާ 2.1 ކިލޯގެ މެފެޑްރޯނެވެ.
ކަސްޓަމްސްއިން ބުނީ ޕެކިންގއާއި އެކު އެ ތަކެތީގެ ބަރުދަނުގައި 2.4 ކިލޯ ހުރި ކަމަށެވެ. އަދި އެ ތަކެތީގެ މަގުމަތީ އަގު 5.5 މިލިއަން ރުފިޔާއަށް އަރާނެ ކަމަށް ލަފާކޮށްފައިވެއެވެ.
މި މައްސަލަ އިތުރަށް ތަހުގީގު ކުރުމަށް މައްސަލައިގައި އަތުލައިގަނެވުނު މަސްތުވާތަކެއްޗާއި އެ ދެމީހުން ދިވެހި ފުލުހުންގެ ޚިދުމަތާއި ހަވާލުކުރެވިފައިވާ ކަމަށް ކަސްޓަމްސްއިން ބުނެއެވެ.
ކަސްޓަމްސް އިން ދޭތެރެ ދޭތެރެއިން ވައިގެ މަގުން ރާއްޖެއަށް އެތެރެކުރުމަށް މަސައްކަތް ކުރާ ގިނަ އަދަދެއްގެ މަސްތުވާތަކެތި އަތުލައިގަނެއެވެ. އެގޮތުން 13 ޑިސެންބަރު 2024 ވަނަ ދުވަހު، އިންޑިއާ އިން ރާއްޖެއައި އިންޑިއާގެ 31 އަހަރުގެ ފިރިހެން ފަސިންޖަރެއްގެ ލަގެޖުން 235 ގްރާމް ކެނަބިސް އަތުލައިގެންފައިވެއެވެ. މިތަކެތީގެ މަގުމަތީ އަގު އެއް ލައްކަ ދިވެހި ރުފިޔާއަށް އަރައެވެ. މީގެ އިތުރުން މީގެ ތިން މަސްކުރިން ވެސް ވައިގެ މަގުން ރާއްޖެއެތެރެކުރަން އުޅުނު 3.48 ކިލޯގްރާމްގެ މަސްތުވާތަކެތި އަދި 9 ކިލޯ އަށްވުރެ ގިނަ މަސްތުވާތަކެތި އަތުލައިގަނެފައިވެއެވެ.
