ފުލުހުން ކޮރަޕްޝަނުގެ ވަކި މައްސަލަތަކެއް ބަލާތީ މިނިވަން މުއައްސަސާތަކަށް އޮންނަ އިތުބާރު ދަނީ ގެއްލެމުން: އެމްޑީޕީ

ފުލުހުން ވެސް ބަލަނީ ކޮރަޕްޝަނުގެ ވަކި މައްސަލަތަކެއް ކަމަށާއި އޭގެ ސަބަބުން މިނިވަން މުއައްސަސާތަކަށް އޮންނަ އިތުބާރު ދަނީ ގެއްލެމުން ކަމަށް އިދިކޮޅު އެމްޑީޕީން ބުނެފިއެވެ.

އިދިކޮޅު މައި ޕާޓީ. އެމްޑީޕީން މިފަދައިން ބުނީ، އެ ޕާޓީގެ ގައުމީ މަޖިލީހުގެ މެންބަރު އަދި ރޯޑް ޑިވެލޮޕްމަންޓް ކޯޕަރޭޝަން ލިމިޓެޑް (އާރުޑީސީ)ގެ ކުރީގެ މެނޭޖިން ޑިރެކްޓަރު މޫސާ އަލި މަނިކު (މޫކޭ)ގެ ގެ ފުލުހުން ބަލައި ފާސްކުރުމާ ގުޅިގެން ނެރުނު ބަޔާނެއްގައެވެ.

Advertisement

އެ ބަޔާނުގައި އެމްޑީޕީން ބުނީ ފުލުހުން ވެސް ބަލަނީ ކޮރަޕްޝަނުގެ ވަކި މައްސަލަތަކެއް ކަމަށެވެ، އަދި އޭގެ ސަބަބުން މިނިވަން މުއައްސަސާތަކަށް އޮންނަ އިތުބާރު ދަނީ ގެއްލެމުން ކަމަށާއި އެގޮތުން ބައެއް މައްސަލަތައް ބަލަމުން ދަނީ މި ސަރުކާރާ ދެކޮޅަށް ކުރާ ކޮރަޕްޝަނުގެ ތުހުމަތުތައް ފޮރުވުމަށް ކަމަށް އެމްޑީޕީން ވަނީ ތުހުމަތުކޮށްފައެވެ.

މި ސަރުކާރުން އިދިކޮޅުގެ އަޑު ކަނޑުވާލައި މިނިވަންކަން ނަގައިލުމަށް ދައުލަތުގެ މުއައްސަސާތައް ބޭނުންކުރަމުން އަންނަ ކަމަށް ތުހުމަތުކޮށް، އެމްޑީޕީން ނެރުނު މި ބަޔާނުގައި ބުނީ އެ ޕާޓީގެ ގައުމީ މަޖިލީހުގެ މެންބަރު އަދި އާރުޑީސީގެ ކުރީގެ އެމްޑީ، މޫކޭގެ ގެ ބަލައި ފާސްކޮށްފައިވަނީ މެންދަމު 2:00ހާއިރު، އޭނާއާއި އާއިލާ ނިދާފައި ވަނިކޮށް ކަމަށާއި އެއީ މި ސަރުކާރުގައި އިދިކޮޅު ފަރާތްތަކަށް ބިރު ދެއްކުމާއި ފުރައްސާރަކުރުމުގެ މިސާލެއް ކަމަށެވެ. އަދި އޭގެ ސަބަބުން ޑިމޮކްރަސީގެ އަސާސްތައް ނެތި، އަސާސީ ހައްގުތަކަށް އަރައިގަންނަ ކަމުގެ ކަންބޮޑުވުން އުފެދޭ ކަމަށް އެމްޑީޕީން ބުންޏެވެ.

އެމްޑީޕީގެ ބަޔާނުގައި ބުނެފައިވަނީ، ގާނޫނު އަސާސީގައިވާ ގޮތުގެ މަތީން މިނިވަން މުއައްސަސާތަކުން ކޮރަޕްޝަނުގެ މައްސަލަތައް ބަލަން އެ ޕާޓީން ތާއީދު ކުރާ ކަމަށާއި ނަމަވެސް އޭސީސީގެ ރައީސާއި ނައިބު ރައީސް އައްޔަންކުރުމުގެ ބާރު ރައީސުލްޖުމްހޫރިއްޔާއަށް ލިބޭ ގޮތަށް ގާނޫނަށް ގެނައި އިސްލާހާއެކު، އެ ކޮމިޝަންގެ މިނިވަންކަމަށް ހުރަސްއެޅިފައިވާ ކަމަށެވެ.

ވެރިކަން ކުރާ ޕީއެންސީގެ ސުޕަމެޖޯރިޓީ އޮންނަ ރައްޔިތުންގެ މަޖިލީހުން މިދިޔަ މަހުގެ 25ގައި ފާސްކޮށް، ޖެހިގެން އައި ދުވަހު ރައީސް މުއިއްޒު ތަސްދީގު ކުރެއްވި އެ ބިލާއެކު ސަރުކާރަށް އޭސީސީގެ މައްޗަށް ބާރު ފޯރުވަން ފުރުސަތު ލިބި، ސިޔާސީ ގޮތުން ބަދަލުހިފުމަށް އޭސީސީ ބޭނުންކުރަން ޖާގަ ލިބޭ ކަމަށް ވެސް އެމްޑީޕީން ބުންޏެވެ.

މިހާރު އެންމެ އިސްކަމެއް ދީގެން ބަލަން ޖެހޭނީ އެންސްޕާ އަދި އެޗްޑީސީގެ މައްސަލަތައް ކަމަށާއި ނަމަވެސް ފެނިގެން ދަނީ ފުލުހުންނާއި އޭސީސީއިން ވެސް މި ސަރުކާރުގެ ކޮރަޕްޝަނުގެ މައްސަލަތައް އޮއްބާލުމަށް އެއްބާރުލުން ދެމުންދާތަން ކަމަށް ވެސް އެމްޑީޕީން ބުނެފައިވެ އެވެ.

އެމްޑީޕީން ވަނީ އެ މައްސަލަތައް އޭސީސީއަށް ހުށަހަޅައި، ފުލުހުން ވެސް އެ މައްސަލަ ތަހުގީގު ކުރުމަށް އެދިފައި ކަމަށާއި ނަމަވެސް މިހާތަނަށް އެފަދަ ތަހުގީގެއް ފަށައިފައިނުވާ ކަމަށް ބުނެފައެވެ.

އެމްޑީޕީން ވަނީ، ސިޔާސީ މަގުސަދެއްގައި އިދިކޮޅު ފަރާތްތަކަށް ފިޔަވަޅު އެޅުން ހުއްޓާލައި، ޑިމޮކްރަސީގެ ހަމަތަކަށް އިޚުތިރާމު ކުރުމަށް ސަރުކާރަށް ގޮވާލައިފައެވެ.

މީގެ އިތުރުން ޑިމޮކްރެޓިކް މިނިވަންކަން ރައްކާތެރިކުރުމަށް ދިވެހިން ކުރާ މަސައްކަތުގައި ބައިނަލްއަގުވާމީ މުޖުތަމައުން އެހީވެ، ރާއްޖޭގައި ވަމުންދާ ކަންތައްތައް ގާތުން ބަލަމުންދިޔުމަށް ވެސް އެ ޕާޓީން ވަނީ ގޮވާލާފައެވެ.

އެމްޑީޕީއަށް ނިސްބަތްވާ މެންބަރުންގެ ގެތައް ބަލައިފާސްކޮށް، އަދި ބައެއް މައްސަލަތައް އަވަސްކުރަން މަސައްކަތް ފެށީ އެޗްޑީސީ އާއި އެންސްޕާގެ މައްސަލަ ފެންމަތިވެ، ރައީސް ޑރ. މުހައްމަދު މުއިއްޒު އަށް އަދި ސަރުކާރަށް ވަރަށް ބޮޑަށް ފާޑުކިޔުން އަމާޒުވާން ފެށުމުންނެވެ.

ރައީސް މުއިއްޒު ޕްރޮމޯޓުކުރަން އުފައްދާފައިވާ އެމްއެމްޓީވީ ހިންގާ ކުންފުނިން އެންސްޕާއަށް ބޮޑު އަގެއްގައި އޮފީސް އިމާރާތެއް ކުއްޔަށް ދިނުމުން ފާޑުކިޔުން އަމާޒުވިއިރު، ރައީސް ވިދާޅުވީ އެ މައްސަލަ އެ މަނިކުފާނާ ހަމައަށް އައިސްފައި ނެތް ކަމަށެވެ.

އެޗްޑީސީގެ ތެރޭގައި ގޯހުން ގޯހަށް ހިނގަމުން ދިޔަ ކަންކަން ސޯޝަލް މީޑިއާއަށް ބަނޑުންވެ، ފުލުހުން ތަހުގީގު ފެށުމުގެ ފަސް މަސް ކުރިން، ޖުލައި 1 ގައި، އެޗްޑީސީގެ ކުރީގެ ޗެއާމަން އަހުމަދު ޒުހޫރު ވަނީ ގިނަ މައްސަލަތަކެއް ފާހަގަކޮށް ރައީސް އަށް ސިޓީއެއް ވެސް ފޮނުވައިފަ އެވެ.

ސީދާ ރައީސް މުއިއްޒަށް އެޑްރެސްކޮށް ޒުހޫރު ފޮނުވި ސިޓީ، އެ މަނިކުފާނަށް ލިބިވަޑައިގެންފައި ނެތް ވިދާޅުވެފައިވެ އެވެ. ނަމަވެސް އެ ސިޓީ ވަނީ ރައީސް އޮފީހުގެ ކައުންޓަރުން ބަލައިގެން ރަޖިސްޓްރީކޮށްފަ އެވެ.

އެޗްޑީސީގެ މައްސަލަތައް ފަޅައިގެން ދިޔައީ ބިންވެރިޔާ ސްކީމުގައި، އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ، މުހައްމަދު ފަޒީލް ރަޝިދަށް ހުޅުމާލޭން ގޯއްޗެއް ދީ، އެ ގޯތީގައި އިންފާރު ރާނަން ވެސް ހުއްދަ ދީފައި އޮތްކަން ފަޅައި އެރުމުންނެވެ.

ބިންވެރިޔާގެ ލިސްޓުގައި ނެތް ގިނަ ބަޔަކަށް ގޯތި ދީފައިވާކަމަސް ބުނާ މަސައްލައެއް ފެންމަތިވެފައިވާއިރު، އެ މައްސަލަ ތަހުގީހު ކުރާކަމަށް ފުލުހުންނާއި އޭސީސީން ބުނި ނަމަވެސް އެ މައްސަ އަދިވެސް ބަލަމުން ނުގެންދާ ކަމަށް މައުލޫމާތު ލިބެއެވެ.

އެޗްޑީސީގެ މައްސަލައިގައި އެ ކުންފުނީގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވަކިކޮށް، އޭނާ ހިމެނޭހެން ވިއްސަށް ވުރެ ގިނަ މީހުން ފުރުން މަނާކޮށްފައިވާއިރު، އޭގެ ތެރޭގައި ކުރީ ސަރުކާރުގެ ބައެއް ވެރިން ވެސް ހިމެނެ އެވެ.

ނަމަވެސް، މި މައްސަލާގައި ސަސްޕެންޑްކުރި އެޗްޑީސީ ބޯޑުގެ މެންބަރުންގެ ސަސްޕެންޝަން މިހާރު ވަނީ އުވާލައިފަ އެވެ.