އިނގިރޭސި ޕްރިމިއާ ލީގުގެ ޗެމްޕިއަނުންގެ ވާހަަކަ ދައްކަން އަވަސް ކަމަށް، ލިވަޕޫލްގެ ކޯޗު އާން ސްލޮޓް ބުނެފި އެވެ.

އޭނާ މިހެން ބުނީ ލީގުގައި ލިވަޕޫލް އިން ލެސްޓަރ ސިޓީއާ ދެކޮޅަށް ކުޅުނު މެޗަށްފަހު އެވެ. ލިވަޕޫލްގެ އަމިއްލަ ދަނޑުގައި ކުޅުނު އެ މެޗުން މޮޅުވެ، އެ ޓީމުން ވަނީ އެއް ވަަނައިގައި ލީޑު ފުޅާ ކޮށްފަ އެވެ.

އެކަމާ ގުޅޭ ގޮތުން ވާހަކަ ދައްކަމުން ސްލޮޓް ބުނީ އަނިޔާގެ މައްސަލައާ އެކު، ނަސީބު ދެރަ ވަގުތަކާ ކޮންމެ ޓީމަކުން ވެސް ކުރިތިލާން ޖެހޭނެ ކަމަށެވެ. އޭނާ ބުނީ އުފާ ފާޅު ކުރަން އަދި މާބޮޑަށް އަވަސް ކަމަށާއި، ނަމަވެސް މިވަގުތު ލިވަޕޫލް އޮތީ އޭނާ އާއި ކުޅުންތެރިން އަދި މުޅި ޓީމު ވެސް ބޭނުންވާ ހިސާބެއްގައި ކަމަށެވެ.

މީގެ އިތުރުން ސްލޮޓް ބުނީ އޭނާ އަށް ޤަބޫލު ކުރެވޭ ގޮތުގައި އެއްވެސް މެޗަކީ ފަސޭހަ މެޗަކަށް ނުވާނެ ކަމަށެވެ. އަދި މެޗަކުން މޮޅުވުމަކީ ވެސް ފަސޭހަ ކަމެއް ނޫން ކަމަށް ސްލޮޓް ބުންޏެވެ. ޓޮޓެންހަމާ ދެކޮޅަށް ކުޅުނު މެޗަކީ ފަސޭހަ މެޗެކޭ ބުނެވުނު ނަމަވެސް، ބައި ކޮޅަށް ލަނޑުތަކެއް ވަތް ކަމަށް އޭނާ ބުންޏެވެ. އެކަމުން ވެސް ބުނެދެނީ ހުރިހާ ކުޅުންތެރިންނާ އެކު ވެސް، މޮޅުވުން އުނދަގޫވާނެކަން ކަމަށް ސްލޮޓް ވަނީ ބުނެފަ އެވެ.

އެ ސަބަބާ ހުރެ، އަބަދު ވެސް މެޗަކަށްފަހު މެޗަކަށް ފޯކަސް ކުރުން މުހިންމު ކަމަށް ސްލޮޓް ވަނީ ބުނެފަ އެވެ. ޚާއްސަކޮށް ލީގުގެ ތާވަލާ މެދު ސަމާލުވެގެން ތިބެން ޖެހޭނެ ކަމަށާއި، ލިވަޕޫލް އޮތީ އެކަމަށް ސަމާލުވެ ކަމަށް އޭނާ ބުންޏެވެ. ނަމަވެސް، ކުރިއަށް އޮތް މެޗުތަކާއި، މެޗުތަކުގެ އަދަދާ މެދު ވެސް ވިސްނަމުން ކުރިއަށްދާ ކަމަށް ސްލޮޓް ބުންޏެވެ.

މި ސީޒަނާ ދިމާކޮށް ލިވަޕޫލްގެ ކޯޗުކަމާ ހަވާލުވި ސްލޮޓްގެ އިރުޝާދުގެ ދަށުން އެ ޓީމުން އަންނަނީ ރަނގަޅު ނަތީޖާތަކެއް ނެރެމުންނެވެ. މިހާތަނަށް ލީގުގައި ކުޅުނު 17 މެޗުން 42 ޕޮއިންޓާ އެކު ލިވަޕޫލް އޮތީ އެއް ވަަނައިގަ އެވެ. ދެ ވަނައިގައި އޮތް އާސެނަލް އާއި ތިން ވަނައިގައި އޮތް ޗެލްސީ އަށް ވުރެ ލިވަޕޫލް އޮތީ އެއް މެޗު މަދުން ކުޅެފަ އެވެ.