މިސަރުކާރުގެ ބޭފުޅުންތަކެއް ޕީއެންއެފްއާ ގުޅޭކަމަށް އަޑުތައް ފެތުރިފައިވަނިކޮށް، ޕާޓީގެ ގައުމީ ޖަލްސާ އަންނަ މަހު 10ގައި ބާއްވަން ނިންމައިފި
ޖަލްސާ ބާއްވާނެ ތަން ފައިނަލެއް ނުވޭ، ސެންދުރާއިން ހޯލެއް ހޯދުމަށް މަސައްކަތް ކުރި
ޕީއެންއެފް އުފެއްދުމަށް ރާޅުގަނޑު ސަރަހައްދުގައި ބޭއްވި ޖަލްސާގެ ތެރެއިން
ޕީޕަލްސް ނެޝަނަލް ފްރޮންޓް (ޕީއެންއެފް) ގައުމީ ޖަލްސާ އަންނަ މަހު 10 ވަނަ ދުވަހު ބާއްވަން ނިންމައިފިއެވެ.
ރާއްޖެއެމްވީއަށް ޕީއެންއެފްގެ އިސްއޮފިޝަލެއް ވިދާޅުވީ 10 ޖެނުއަރީ 2025 ގައި ގައުމީ ޖަލްސާ ބާއްވަން ނިންމާފައިވާ ކަމަށާއި، އަދި ޖަލްސާ ބާއްވާނެ ތަން ފައިނަލް ނުވާ ކަމަށެވެ.
ޖަލްސާ ބޭއްވުމަށް ނިންމާފައިވަނީ ނަސުންދުރާ ހޯލެއްގައި ކަމަށް ދެކެވޭ ވާހަކަތަކާއި ގުޅިގެން އޮފިޝަލް ވިދާޅުވީ ނަސެންދުރާއިން ހޯލެއް ހޯދުމަށް މަސައްކަތް ކުރި ކަމަށާއި، ނަމަވެސް އެ ހޮޓެލް ނުހުޅުވާތީ ހޯލް ލިބޭ ގޮތް ނުވެފައިވާ ކަމަށެވެ.
ޕީއެންއެފް އުފެއްދުމަށް ބޭއްވި ޖަލްސާއަށް ފުލުހުން ހުރަސްއަޅައި، ހިންގި ހަމަނުޖެހުންތަކަށް އިޝާރާތް ކުރައްވައި އޮފިޝަލް ވިދާޅުވީ ގައުމީ ޖަލްސާ ބާއްވަން ބޭނުންވަނީ އެފަދަ ކަމެއް ދެވަނަ ފަހަރަށް ތަކުރާރުނުވާނެ ގޮތަކަށް ފެންވަރު ރަނގަޅު، ސެކިއުރިޓީ ވަރުގަދަ ތަނެއްގައި ކަމަށެވެ. އަދި ސްކޫލެއްގެ ހޯލެއްގައި ޖަލްސާ ކުރިއަށް ގެންދަން ނިންމައިފިނަމަ ދެވަނަ ފަހަރަށް ވެސް ސަރުކާރުން ޖަލްސާއަށް ހުރަސްއަޅަައި، ހަމަނުޖެހުން ހިންގުމަށް މަސައްކަތް ކޮށްފާނެކަމުގެ ބިރު އެބައޮތް ކަމަށް އޭނާ ވިދާޅުވިއެވެ.
މި ޖަލްސާގައި ސިޔާސީ ބައެއް ބޭފުޅުން އަދި މިސަރުކާރުގައި އިސްކޮށް އުޅުއްވާ ބައެއް ބޭފުޅުން ޕީއެންއެފްއަށް ސޮއިކުރައްވާ ކަމަށް ދެކެވޭ ވާހަކަތަކާއި ގުޅިގެން އޮފިޝަލް ވިދާޅުވީ އެޖެންޑާ ފައިނަލް ނުވާ ކަމަށެވެ. މިޖަލްސާ ބާއްވަނީ ސިޔާސީ ބޭފުޅުންތަކެއް ގުޅޭތީ ނޫން ކަމަށާއި، މިއީ ޕާޓީތަކުގެ ގަވާއިދު ބުނާގޮތުން އަހަރުވުމުގެ ކުރިން ބާއްވަންޖެހޭ ޖަލްސާއަކަށްވާތީ ބާއްވާ ޖަލްސާއެއްކަމަށް އޮފިޝަލް ވިދާޅުވިއެވެ.
އިތުބާރުހުރި ފަރާތަކުން މައުލޫމާތު ދިން ގޮތުގައި، މިޖަލްސާގައި އަލަށް ގުޅޭ ސިޔާސީ ބޭފުޅުން މިސަރުކާރުގެ ގިނަ ކަންކަން ހާމަކުރާ ގޮތަށް ވަނީ ހަމަޖެހިފައެވެ. އަދި ކުރީގެ ރައީސް އަބްދުﷲ ޔާމީންއަށް ތާއީދުކުރާ އާއްމު ރައްޔިތުންނަށް މި ޖަލްސާއަށް އާދެވޭނެ ކަމަށާއި، އަތޮޅުތެރޭގެ ރަށްރަށުން ވެސް މީހުން ގެނައުމަށް ނިންމާފައިވާ ކަމަށް މައުލޫމާތު ލިބެއެވެ. ނަމަވެސް މިކަން ޕީއެންއެފްގެ ފަރާތުން ރަސްމީކޮށް ކަށަވަރުކޮށްދީފައިނުވެއެވެ.
