އަމިއްލަ ސިއްހީ ހުރިހާ މައުލޫމާތެއް ލިބޭ ޕޯޓަލް ތައާރަފް ކޮށްފި
26 ޑިސެމްބަރު 2024 | ބުރާސްފަތި 04:45މި ޕޯޓަލްގައި 01 ޖެނުއަރީ 2025 އިން ފެށިގެން އުފަންވާ ތުއްތު ކުދިންގެ ވެކްސިން ކާޑުގައި ހުންނަ މައުލޫމާތު ފެންނަން ހުންނާނެ
ހެލްތު މިނިސްޓަރު އަބްދުﷲ ނާޒިމް މި ޕޯޓަލް އިފްތިތާހް ކޮށްދެއްވަނީ
"މޯލްޑިވްސް އިންޓެގްރޭޓެޑް ހެލްތު އިންފޮރމޭޝަން ސިސްޓަމް" ( މިހިސް ) ގެ ޕަބްލިކް ޕޯޓަލް އިފްތިތާހްކޮށްފިއެވެ.
ބުދަ ދުވަހު މި ޕޯޓަލް އިފްތިތާހް ކޮށްދެއްވީ ހެލްތު މިނިސްޓަރު އަބްދުﷲ ނާޒިމް އިބްރާހީމްއެވެ.
"މިހިސް" ގާއިމުކުރުމުގެ މަސައްކަތްތަކަކީ ދިވެހިރާއްޖޭގެ ސިއްހީ ދާއިރާގައި މައުލޫމާތު އެއްކުރުމަށް ބޭނުންކުރަމުންދާ ސިސްޓަމްތަކުގައި ހިމެނޭ މައުލޫމާތު އެއްހަމަކޮށް، ސިއްހީ މައުލޫމާތު އެއްތަނަކުން ފޯރުކޮށްދިނުމަށް އެޅިގެންދާނެ މުހިންމު ފިޔަވަޅެކެވެ. މި ޕޯޓަލްގެ މަގުސަދަކީ އާންމުންނަށް މުހިންމު ސިއްހީ މައުލޫމާތު ހާމަކަން ބޮޑު ގޮތެއްގައި ރައްކާތެރިކަމާއިއެކު އަދި ފަސޭހައިން ލިބޭނެ މަގު ފަހިކޮށްދިނުން ކަމަށް ހެލްތް މިނިސްޓްރީން ބުނެއެވެ.
މި ޕޯޓަލް އިފްތިތާހް ކޮށްދެއްވާ މިނިސްޓަރު ނާޒިމް ވިދާޅުވީ ރާއްޖެ އުފެދިފައި އޮންނަގޮތުން ކުދި އާބާދީތަކަށް ފޯރުކޮށްދޭ ސިއްހީ ޚިދުމަތުގެ ފެންވަރު ރަނގަޅުކުރުމަށް މިއީ އެޅިގެންދިޔަ މުހިންމު ފިޔަވަޅެއް ކަމަށެވެ. އަދި ޕޯޓަލްއިން މައުލޫމާތުތައް ފެނުމަކީ ބަލި ޖެހިއްޖެ ހާލަތެއްގައިވެސް އަމިއްލަ ސިއްހީ ހާލަތު ގާތުން ބަލައި ލިބެންޖެހޭ ފަރުވާތައް ހޯދުމަށް އަމިއްލައަށް ބާރުވެރިވެގެންދާނެ ކަމަށް މިނިސްޓަރު ނާޒިމް ވިދާޅުވިއެވެ.
މި ޕޯޓަލްގައި 01 ޖެނުއަރީ 2025 އިން ފެށިގެން އުފަންވާ ތުއްތު ކުދިންގެ ވެކްސިން ކާޑުގައި ހުންނަ މައުލޫމާތު ފެންނަން ހުންނާނެއެވެ.
އެގޮތުން ޑިޖިޓަލް ވެކްސިނޭޝަން ކާޑާއި، ހެދި ބޮޑުވުމުގެ ޗާރޓާއި ހެދިބޮޑުވަމުންދާ މިންވަރު ދެނެގަނެވޭނެ ހަރުފަތްތަކާއި ކުއްޖާއަށް ދޭ ވިޓަމިން އޭ އަދި ފަނިބޭހުގެ މައުލޫމާތު ބެލެނިވެރިންނަށް މި ޕޯޓަލް މެދުވެރިކޮށް ލިބޭނެއެވެ. މީގެ އިތުރުން ހެދިބޮޑުވަމުންދާ މިންވަރު މޮނިޓަރކޮށް، ވެކްސިން ޖަހަންޖެހޭ ދުވަސް ކަރިވުމުން ބެލެނިވެރިންނަށް ހަނދާންކޮށްދިނުމަށް މި ސިސްޓަމް މެދުވެރިކޮށް ނޮޓިފިކޭޝަން ލިބޭނެ ކަމަށް ވެސް މިނިސްޓްރީން ބުނެއެވެ.
މީގެ އިތުރުން ހެލްތް މިނިސްޓްރީން ބުނީ ޕްރައިމަރީ ހެލްތު ކެއަރ މޮޑިއުލް ރޯލްއައުޓް ކުރަމުންދާ އަތޮޅު ތަކުގައި ދިރިއުޅޭ ފަރާތްތަކަށް އެފަރާތެއްގެ މައުލޫމާތު މި ޕަބްލިކް ޕޯޓަލް އިން ފެންނަން ހުންނާނެ ކަމަށެވެ. އަދި ޕްރައިމަރީ ހެލްތު ކެއަރ ޕްރޮގްރާމްގައި އެންރޯލްވެފައިވާ ފަރާތްތަކުގެ ތެރެއިން ފޮލޯއަޕް ހަދަންޖެހޭ ފަރާތްތަކަށް ޑޮކްޓަރަށް ދައްކަންޖެހޭ ދުވަސް ކައިރިވުމުން ނޮޓިފިކޭޝަނެއް ލިބޭނެ ކަމަށެވެ. ކުރިމަގުގައި މި ޕޯޓަލް އިތުރަށް ފުޅާކޮށް، އާންމު ސިއްހަތާއި ގުޅުން ހުރި މައުލޫމާތުތަކުގެ އިތުރުން ޑޮކްޓަރަށް ދައްކައިގެން ހޯދަމުންދާ ފަރުވާ އާއި ޑައިގްނޯސްޓިކްސް ޓެސްޓު ތަކުގެ ނަތީޖާތައްވެސް ފެންނަން ހުންނާނެ ކަމަށް މިނިސްޓްރީން ބުނެއެވެ.
މި ރަސްމިއްޔާތުގައި މިނިސްޓްރީގެ އިސްވެރިންގެ އިތުރުން، ރާއްޖޭގައި ހުންނަ ދުނިޔޭގެ ސިއްހަތު ޖަމްއިއްޔާގެ އިސްވެރިންވެސް ބައިވެރިވަޑައިގެންނެވިއެވެ.
